¹ Ngeci amwepo muteelela shuwana ku maywi a Shinda sha moyo Nyambi wenu kukwama ituminino yenji yoihe ei nimitumina lelo, Shinda sha moyo Nyambi wenu kenge amipaka peulu thza anu wamweya wahe o pa kaye. ² Thzothzihe ethzi fiyauthzi kenge thzikala peulu thzenu ne kenge thzikala kukwenu ngeci mwateelela liywi lya Shinda sha moyo Nyambi wenu. ³ Kenge mufiyaweliwa mu mbongi kalo kenge mufiyaweliwa mu ilwa. ⁴ Anenun kenge afiyaweliwa, ei munalimi kenge ifiyaweliwa no ana ieleka imunanu yenu kenge afiyaweliwa no kuvula ko ngombe thenu no ana o mangu enu. ⁵ Katanda kenu kenge kafiyaweliwa no kanyungu kenu ko kupondela. ⁶ Kenge mufiyaweliwa apa muingena, kalo kenge mufiyaweliwa apa mupuna. ⁷ Shinda sha moyo kenge aletishela akwethzimbo yenu awa amilwisha kutweshiwa pa pasho thzenu; Kenge akeya mu likuñwa lyofoci kunamilwisha ambene kenge acila pa posho thzenu kwanalihanda mu makuñwa mutanu na eli(7). ⁸ Shinda sha moyo kenge atumina fiyawethzi kukeya ku ishete yenu no ku enu yoihe oku mupaka lyoko lyenu; kenge amifiyawela mu litunga eli amipa. ⁹ Shinda sha moyo kenge amikwama anu enji o kukena, eci eli aliethzile kukwenu, ngeci amwepo mumamela ituminino ya Shinda sha moyo Nyambi wenu, no kuenda mu makuñwa enji. ¹⁰ Anu wahe o pa kaye kenge amoni eci mwaishiwa ko lithzina lya Shinda sha moyo, ne kenge amiyapa. ¹¹ Shinda sha moyo kenge akwama eci enu ikuendele shuwa kwa anoe, kwa ana o imunanu yoye, no ku ilwa yoye mu litunga eli aliethzile kowa tata oe eci kenge alikupa. ¹² Shinda sha moyo kenge akuyanjululela ku shitulekelo shenji sho kuwilu kulokisha mvula mu litunga lyoe pa shikati shiloela, no kufiyawela ekwama yoihe yo moko oe; kenge wakukolotisha ku matunga oangi, ambene owepo kowa kukolota. ¹³ Shinda sha moyo kenge akukwama mutwi, kali muthsila; kenge okala peulu pohuma, ne kowa kukala mushi, ngeci owepo teelela ku ituminino ya Shinda sha moyo Nyambi oe ei nikutumina lelo, kuimamela no kuikwama, ¹⁴ kalo ngeci ko shiuluka kutunda ku maywi oahe aa nikutumina lelo, kuhuka ku lyoko lyo shilyo nji lyo shimoho, kushupwela athzimu amweya no kuwakwamena. ¹⁵ Ambene ngeci ko teelela liywi lya Shinda sha moyo Nyambi oe, kumamela ituminino yenji yoihe no milao thzenji ethzi nikutumina lelo, nehoni yoihe ei ikuto kenge ikeya kukwoye no kunakuthsika. ¹⁶ Kenge okutiwa mu mbongi, kalo kenge okutiwa mu shilwa. ¹⁷ Katanda koye no kanyungu koe ko kupondela kenge ikutiwa. ¹⁸ Kenge kukutiwa anoe, ei onalimi, tunamani to ngombe thzoe, no ana o mangu oe. ¹⁹ Kenge okutiwa apa oingena, kalo kenge okutiwa apa opuna. ²⁰ Shinda sha moyo kenge atuma shikuto, kulyangana, no kukanishiwa mu enu yoihe oku opaka lyoko, kukakuma apa oyundela, no kutwala apa okapwela mukonda o omango o ekwama yoye ei inaletisha eci onishiyelele. ²¹ Shinda sha moyo kenge akwama kashitiko ko kukola kukukakatela kutwala apa aka kumanena mu litunga eli othza kukalishwana. ²² Shinda sha moyo kenge akufula no ikola iyambukela, no kupya nene elama, no muili, no lingange, no mwele, no mupepo o kupya, no mbimbia. Ei kenge ikukakatela kutwala apa okafela. ²³ Liwilu lili peulu o mutwi oe kenge likala shifu sho kopa, no kaye kali mushi thzoe kenge kakala shifu sho shilu. ²⁴ Shinda sha moyo kenge akwama mvula o mu litunga lyoe likungu; eli litunda kuwilu kuulumuka kukwoe, kutwala apa okafela. ²⁵ Shinda sha moyo kenge aletisha eci otweshiwe pa pasho thza akwethzimbo yoye; Kenge othza mu likuñwa lyofoci kukawalwisha ambene kenge okacila pa posho thzo mu makuñwa muanu na eli(7). Kenge ohushiwa oku noku mukaci ko mivuthso thzo pa kaye thzothzihe. ²⁶ Shivimbi shoye kenge shikala ilya yo inyunyi yo muwilu no iyama yo mukaye; kakwa kukala munu o kuicilisha. ²⁷ Shinda sha moyo kenge akufula no ilonda yo mu Engepita no mambongola, linjandi, no kuyuwa, yo kukana kupola. ²⁸ Shinda sha moyo kenge akufula no kuthzaluka, no kukana kumona, no kulyangana. ²⁹ Kenge ofafatela mutanya eci munu o kukana kumona oyu fafatela mu milema, kalo enu kaya kukuendela shuna mu makuñwa oe; Shikati shoshihe kenge olyateleliwa no enu yoye kenge ishimbiwanga, ne kakwakukala munu o kukuamwena. ³⁰ Kenge oungekela mbuyama, ambene mukwelume yumweya kenge amushimba no kulala nenji. Kenge oumba njiyo ambene kowa kukalamo; kenge okuna itondo yo veine ambene kowa kulya oshuka wayo. ³¹ Pulu oye kenge apaeliwa pa meho oe, ambene kowa kulya nyama wenji, shindongi shoye kenge shishimbiwa pa posho thzoe ne kakushikuhushela. Mangu oe kenge akupiwa kwa akwethzimbo yoye, ne kowa kuwana munu o kukuamwena. ³² Anoe owakwelume nawa owambuyama kenge akupiwa ku anu ao; meho oe kenge akkuwatanekela liyuwa lyolihe, ambene kenge akwanga no kuwaloela. Kakwakukala okolo mu lyoko lyoye. ³³ Ilya yo mu litunga lyoe nei onakwama yoihe--- anu awa okana kulimuka kenge ailya; shikati shoshihe kenge onyandishiwa no kulayteleliwa, ³⁴ eci othzalukishiwe ko ei wakumona ko ikwamahala. ³⁵ Shinda sha moyo kenge akufula mu manwi no maulu ko mambongola o kukola nene o kukana kupola, kutatekela mu ilyatelo yo maulu oe kukakuma peulu o mutwi oye. ³⁶ Shinda sha moyo kenge amitwala owe no fumu oyu ahangula eci akuendishe kwa anu mukana kulimuka, owe na akwathsañulu oye; oko wakukakwamena athzimu ao o kukwama pa itondo no mawe. ³⁷ Kenge wakukapiluka shinu shikomokisha nene, nguli, no kuhekiwa, mukaci ka anu wahe oku akukutwala shinda sha moyo. ³⁸ Kenge okuna mbuto thzo thzingi mu shilwa, ambene ei wakuyangamo ipu, mukonda mbimba kenge thza kuilya. ³⁹ Kenge wa kulima ilwa no kukunamo itondo yo veine, ambene kowa kunwa ku waine oyu tunda mo, inji kuyangamo oshuka, mukonda mavinyo kenge akuilya. ⁴⁰ Kenge wakukala no itondo yo olive mu litunga lyoe, ambene kowa kuliwesha maathzi o oli wayo mukonda itondo yoye yo olive kenge yakuwisha oshuka wayo koushime kukola. ⁴¹ Kenge wakukala no ana o akwelume nawa o ambuyama, ambemne kakukalelela anoe, mukonda kenge akushimbiwa kukamuniwa. ⁴² Itondo yoye yoihe nei onalimi mu ilwa yoye ⁴³ ---mbimba kenge thzakuilya. Munu o ku litunga lyalo oyu li mukaci kenu kenge akula nene kukupita; owe kenge ohuka munyima nene. ⁴⁴ Kenge akukukolotisha, ambene owe po kowa kumukolotisha; aye kenge akukala mutwi owe kenge wakukala muthsila. ⁴⁵ Yoihe ei ikuto kenge yakukeya kukwoe, ne kenge iotelela kukwoye no kukukwata kutwala apa wakufela. Ei kenge yakukwamahala mukonda koyuvile liywi lya Shinda sha moyo Nyambi oye, kumamela ituminino no milao ethzi nakutumina. ⁴⁶ Ei ikuto kenge yakukala peulu thzoye kukala imonisha no ikomokisha, no kukala peulu thza ekulyoe kokukana kupwa. ⁴⁷ Mukonda ko kokwamenine Shinda sha moyo Nyambi oye ko kunyanyuka no kuloela ko mucima oye apa nokala mu shihuno, ⁴⁸ honine kenge okwamena akwethzimbo yoye awa atuma Shinda sha moyo kukwoye; kenge owakwamena no njala, no linotwa, mu wila no mu uhutu. Kenge apaka joko thzo shifu pa thsingo thzoye kutwala apa akukumana. ⁴⁹ Shinda sha moyo kenge akuleta amu awa atunda ko kule kunakulwisha, kutunda ku mahulelo o kaye, kenge akeya eci ngonga oyu undukela eshi afota kukwata, anu awa aamba mushovo ou okana kuyuva; ⁵⁰ anu awa ali no ihanga yo kuyapisha awa akana kukuteka akulu no kukana kuyuvela anuke ñeke. ⁵¹ Kenge akulya ana o emunanu yoye no nei onalimi mu litunga kutwala apa wakafela. Kakukushiyela uloto, waine o mupe, nji oli, kakushiya tunamani to ngombe thzoye nji manguana o mangu oye, kutwala apa wakufela. ⁵² Kenge akukuthzinguluka kukupaka mukaci mu mambongi oye oahe, kutwala apa akuwela pashi mamota o ipatango yo mu litunga lyoe. Mamota aa nokulupela. Kenge akukuthzinguluka kukupaka mukaci mu mambongi oeye oahe mu litunga lyolihe eli anakupa Shinda sha moyo Nyambi oye. ⁵³ Kenge wakulya ana awa onalielekela, nyama thza anoe owakwelume no anoe owambuyama, awa nakupa Shinda sha moyo Nyambi oye, kouli mu kuyanjeleliwa no likando eli akukunyandisha akwethzimbo yoye. ⁵⁴ Mukwelume o honyi no kulihenge mukaci kenu---kenge ayuvela shipululu mwapenji no munu wenji oyu ahima, no anenji wahe awa anashiyalako. ⁵⁵ Ne kenge akuwayumena wahe ku nyama wa anenji o kulielekela oyu akulya, mukonda kwithsa eshi shakushiyala kukwenji koli mu kuyanjeleliwa no mu likando eli akukunyandisha akwethzimbo yoye mu mambongi oye oahe. ⁵⁶ Mbuyama o shihemo no kulihenga mukaci kenu, oyu nakana kulyata shilyatelo sho liulu lyenji pashi mukonda o kulihenga no shihemo---kenge ayuvela shipululu munu wenji ahima, mwanenji o mukwelume, no mwanenji o mbuyama, ⁵⁷ no kambu kennji aka katunda mukaci ko maaulu enji, no anenji awa akueleka. Kenge akuwalyela ku mukunda mukonda o kupila enu, mu shikati akuyanjeleliwa no mu likando eli akukunyandisha akwethzimbo yoye mu mambongi oye. ⁵⁸ Ngeci ko mamela maywi ou mulao aa anañoliwa omu mu buka, eci olemeke eli lithzina lyo kutethzima no kuyapisha, shinda sha moyo Nyambi oye, ⁵⁹ nehoni Shinda sha moyo kenge akwama tushitiko toe kuyapisha nene, no tushitiko twa ekulyoe; kenge tukala tushitiko totukulu nene, to kuthzihama, no ekola yo imango, yo kuthzihama. ⁶⁰ Kalo kenge akuletela ekola yo mu Engepita ei noyapa; kenge ikukwatelela. ⁶¹ No ekola yoihe no tushitiko totuhe ei inañoliwa omu mu buka thzo ou mulao, nayo eyo kalo Shinda sha moyo kenge aileta kukwoye kutwala apa okafela. ⁶² Kenge mushiyala mwaapu, shianga eci kuma namuvulu eci matungwethzi o kuwilu, mukonda ka muteelelile liywi lya Shinda sha moyo Nyambi wenu. ⁶³ Eci eli anyanyukile Shinda sha moyo papenu mu kumikwama shuwana, no mu kumivulisha, ne kenge anyanyuka papenu mu kumipaa no kumimana. kenge mutundishiwa mu litunga eli muthza kukalishwana. ⁶⁴ Shinda sha moyo kenge amihanda mukaci ka anu wahe kutunda kuhula thzofoci thzo kaye kukakuma kuhula thzimweya thzo kaye; oko kenge mwakukalombela athzimu amweya awa mukana kulimuka, amwe no akwathsañulu enu, athzimu o itondo no mawe. ⁶⁵ Mukaci ko awa anu kowa kuwanamo woto, ne elyatelo yo maulu oye kaya kulitulumwisha; oko Shinda sha moyo kenge akukupa mucima o kuleyaleya, kukiha meho, no mwoyo o kulila. ⁶⁶ Moyo oye kenge upila po kutanalela; ushiku no mutenya kenge oyapa ne kowakukala napa unakupela moyo woye. ⁶⁷ Mashikushiku kenge oambanga eci, 'Inga lingulo!' kalo lungulo kenge oambanga eci, 'Inga mashikushiku!' mukonda o wowa ou wakukala mu mucima woye no enu ei akumona meho oye. ⁶⁸ Shinda sha moyo kenge akukuhusha mu Engepita kalo ko isepe, ko likuñwa eli nanikuambela eci, 'Kowa kumona Engepita kalo.' Oko kenge mwa kuliulisha kwa akwethzimbo yenu eci mukale apika o akwelume no apika o ambuyama, ambene kwithsa oyu wakumiula.