¹ Mushe no akulu o Isilaele awopo atumina anu kuamba eci, ''Mumamele ituminino yoihe ei nimitumina lelo. ² Pa liyuwa mwa kuyavuka Jodani kuthza mu litunga eli amipa Shinda sha moyo Nyambi wenu, mukashishe mawe o akulu ne muaweshe memba. ³ Muñole po maywi oahe ou mulao apa mumana kuyavuka, eci mukaingene mu litunga eli amipa Shinda sha moyo Nyambi wenu, litunga omu kupupa mahwe no oki, eci eli amikulupelishile, Shinda sha moyo, Nyambi wa akwathsañulu enu. ⁴ Apa mumana kuyavuka Jodani, mukashishe aa mawe aa nimitumina lelo, pa mukinya o Ebali, ne muaweshe memba. ⁵ Mukaumbeleko Shinda sha moyo Nyambi wenu aletare, aletare thzo mawe; ambene lelo mwalikwathsisha shifu kuyuwa mawe. ⁶ Mukaumbe aletare thza Shinda sha moyo Nyambi wenu ko mawe o kukana kuyuwa; mukwamene po Shinda sha moyo Nyambi wenu shitavelo sho kutumeka no muilo, ⁷ kalo kenge mukwamena po itavelo yo kukandelela ne kenge muilyelako; kenge munyanyuka pa posho thza Shinda sha moyo Nyambi wenu. ⁸ Kenge muñola pa mawe maywi oahe ou mulao. Muañole eci amonahale shuwana shuwana.'' ⁹ Mushe no apulisita, Alivi, awopo aamba kwa ana Isilaele wahe eci, ''Otutwale ne oteelele, Isilaele: Lelo onapiluka anu a Shinda sha moyo Nyambi oe. ¹⁰ Honine oyuve liywi lya Shinda sha moyo Nyambi oe kalo omamele ituminino no milao thzenji ethzi nikutumina lelo.'' ¹¹ Mushe ayepo tumina anu mwelyo liyuwa kuamba eci, ¹² ''Ei ikuta kenge iimana pa mukinya wa Gerizimi kufiyawela anu apa mumana kuyavuka Jodani: Simioni, Livi, Juda, Isakare, Josefa, no Benjamine. ¹³ Ei yoiliyo ikuta ei yakuimana pa mukinya wa Ebali kuamba ikuto: Rubeni, Gadi, Ashere, Zebuluni, Dani, no Nafetali. ¹⁴ Alivi kenge akutawa no kuamba kwa anu wahe o Isilaele ko liywi lyoshokulu: ¹⁵ 'Munu oyu kwama shikupulo sho kuyuwa nji sho kuumba pa shifu akutiwe, ya mathzilo kwa Shinda sha moyo, ekwama yo munu omuñulungu, noyu okushishisha ku mukunda.' Nehoni anu wahe kenge atawa no kuamba eci, 'Ameni.' ¹⁶ 'Munu o kukana kulemeka tata wenji nji mama wenji akutiwe.' Nehoni anu wahe kenge aamba eci, 'Ameni.' ¹⁷ Munu o kuhenyisha maenje a mungenjenji akutiwe.' Nehoni anu wahe kenge aamba eci, 'Ameni.' ¹⁸ Munu oku kushiisha likuñwa munu o kukana kumona akutiwe.' Nehoni anu wahe kenge aamba eci 'Ameni.' ¹⁹ Munu o kulyatalyata iamba ya munu o ku litunga lyakyo, shiyana, nji lifakathzi akutiwe.' Nehoni anu wahe kenge aamba eci, 'Ameni.' ²⁰ 'Munu o kulala na munu wa tata wenji akutiwe, mukonda onathsikula tata wenji.' Nehoni anu wahe kenge aamba eci, 'Ameni.' ²¹ 'Munu o kulala no shiyama akutiwe.' Nehoni anu wahe kenge aamba eci, 'Ameni.' ²² 'Munu o kulala na ndumbu thzenji akutiwe, mwana tata wenji o mbuyama, nji mwana mama wenji o mbuyama.' Nehoni anu wahe kenge aamba eci, 'Ameni.' ²³ 'Munu o kulala na ngumwenyenji akutiwe.' Nehoni anu wahe kenge aamba eci, 'Ameni.' ²⁴ 'Munu o kupaela mungenjenji ku mukunda akutiwe.' Nehoni anu wahe kenge aamba eci, 'Ameni.' ²⁵ 'Munu o kutambula shipiwa sho kupaa munu o kupila mulandu akutiwe.' Nehoni anu wahe kenge aamba eci, 'Ameni.' ²⁶ 'Munu o kukana kutawa maywi ou mulao, eci kenge aamamela akutiwe.' Nehoni anu wahe kenge aamba eci, 'Ameni.'