¹ Apa okuma mu litunga eli akupa Shinda sha moyo Nyambi oe eci olishwane, ne apa olishimba no kutunga mo, ² nehoni kenge oshimba imweya ku ilya yoye yoihe yo mutatekelo kwei onalimi mu ilwa yoye mu litunga eli akupa Shinda sha moyo Nyambi oye. Oipake mu katanda no kuthza ku shivaka eshi akuhangula Shinda sha moyo nyambi oye eci koliyo kukala lithzina lyenji. ³ Kenge othza kwa mupulisita oyu wakukwama omo mu mayuwa no kukamuambela eci, 'Lelo naamba kwa Shinda sha moyo Nyambi oye eci ninakumu mu litunga eli aliethzile Shinda sha moyo kwa akwathsañulu etu eci kenge alitupa.' ⁴ Mupulisita kenge ashinda katanda kutunda mu lyoko lyoe no kukateneka pa posho thzo aletare thza Shinda sha moyo. ⁵ Kenge oamba pa meho a Shinda sha moyo Nyambi oe eci, 'Tata po kuma akalile Muaranmi o kuendaula. Ayepo ulumuka mu Engepita no kukatunga mo, ne anu enji po kuma akalile owapu kukuwatala. Oko awopo akapiluka mbunga thzo thzilkulu, ukolo, no ungi nene. ⁶ Akwa Engepita awopo atukwama omango no kutunyandisha. ⁷ Awopo atukwamisha ekwama yo ikalu. Atwepo tulilela kwa Shinda sha moyo, Nyambi owatata wetu, ne ayepo yuva liywi lyetu no kumona likando lyetu, no kulyateleliwa kwetu. ⁸ Shinda sha moyo ayepo tutundisha mu Engepita ko lyoko lyo likolo, no lyoko lyo kuoloka, no kuyapisha ko kukulu nene, no imonisha no ikomokisha; ⁹ ne onatuleta kuno kushivaka no kutupa lino litunga, litunga omu kupupa mahwe no oki. ¹⁰ Nehoni omone, ninaleta ilya yo mutatekelo yo mu litunga eli onanipa, owe, Shinda sha moyo.' Oiteneke pa posho thza Shinda sha moyo Nyambi oe no kulombela pa posho thzenji; ¹¹ ne onyanyuke mu enu yoiwa yoihe ei anakukwamena Shinda sha moyo Nyambi oe, nei anakwamena njiyo thzoe---owe no mulivi, no munu o kulitunga lyalo oyu li mukaci kenu. ¹² Apa omana kupa yo ulikumi yoihe kwei onayanga mu mwaka omushihatu, owo, mwaka okupa yo ulikumi, nehoni oipe Mulivi, munu o kulitunga lyalyo, shiyana, no lifakathzi, eci alye mu mambongi enu ne aikute. ¹³ Oambe pa posho thza Shinda sha moyo Nyambi oye eci, 'Ninatundishelela mu njiyo thzange enu ya Shinda sha moyo, ne ninaipa Mulivi, munu o ku litunga lyalyo, shiyana, no lifakathzi kuthza ko ituminino yoye yoihe ei onanipa. Kanileile shituminino shanga shofoci ku ituminino yoye, nji kuivulama. ¹⁴ Kanilileko shanga shofoci apa nanikala mu kulila, nji kushimba po apa naniala o kukana kukena, nji kupako awa anafu. Ninayuvu liywi lya Shinda sha moyo Nyambi wange; ninashupwela enu yoihe ei onanitumina kukwama. ¹⁵ Otaneka pashi kouli mu shivaka sho kukena, kouli kuwilu, ne afiyawele anu oe Isilaele, no litunga eli onatupa, eci eli waliethzile kowatata wetu, litunga omu kupupa mahwe no oki.' ¹⁶ Lelo Shinda sha moyo Nyambi oe akutumina kumamela ethzi milao no ituminino; honine othzituleke no kuthzikwama no mucima oe ouhe no mwoyo oye ouhe. ¹⁷ Lelo onatawa eci Shinda sha moyo yoliyo Nyambi oe, ne eci kenge oenda mu makuñwa enji kalo kenge omamela milao thzenji, no ituminino yenji, ne eci kalo kenge oyuva liywi lyenji. ¹⁸ Lelo Shinda sha moyo onatawa eci mwa anu enji shemwa, eci eli amikulupelishile, ne eci mumamele ituminino yenji yoihe, ¹⁹ ne kenge amikulisha kupita anu wamweya wahe awa anombu, ne kenge mushangaliwa, kulimukiwa, no kulemekiwa. Kenge mukala anu o kukena kwa Shinda sha moyo Nyambi wenu eci eli aambile.''