¹ Ngeci kuli muzeko mukaci ka anu eli ne athza ku kuta, ne aatuli awa atula, nehoni kenge ashiya okupila mulandu eci athze ko kuliyala ne kenge apa mulandu oyu nepisha. ² Ngeci oyu li no mulandu aloela kufuliwa, nehoni muatuli kenge amulalilsha pashi eci afuliwe pa meho enji no mambafa anamutomena, kuthza ko omango wenji. ³ Muatuli amufule mambafa makumi ane (40), ambene lelo apitelela mambafa akukuma apo; mukonda ngeci apitelele mambafa akuma apo kumufula mambafa amweya kalo, nehoni mungenjoye mwana Isilaele kenge ashwauka pa meho oye. ⁴ Lelo wavuka pulu ku kanwa apa atafuna uloto. ⁵ Ngeci ana munu yofoci anatungu pofoci ne yumweya kukwo afa, kunapili mwana, nehoni munu woyo nafu lelo akayekiwa kwa mukwelume wao o mulila lyalyo. Ambene, mwapa munu wenji amushimbe amuyeke eci akale munu wenji, ne akwame kukwenji ei iloela mwapenji nafu. ⁶ Eipo ili kengeya eci mwana o mweli oyu aeleka kenge ashwana mu lithzina lya mwapenji nafu, eci lithzina lyenji lelo lyapwa mu Isilaele. ⁷ Ambene ngeci mukwelume kahimine kuyeka munu wa mwapenji, nehoni munu wa mwapenji athze kwa akulu akaambe eci, 'Mwapa munu wange akana kupindula lithzina lya mwapenji mu Isilaele; kakwama ei iloela mwapenji kukwange.' ⁸ Nehoni akulu o mu mbongi amuishe ne aambe kukwenji. Ambene ngeci oyo mukwelume aotelela kuamba eci, 'Kanihimine kumushimba.' ⁹ Nehoni munu wa mwapenji akeye kukwenji pa meho a akulu, ahulule likatulo lyenji ku liulu lyenji, no kumuthsipela mate ku meho. Amutawe no kuamba eci, 'Ei yoliyo anakwamanga kwa mukwelume oyu kana kuumba njiyo thza mwapenji.' ¹⁰ Lithzina lyenji kenge iliishiwa mu Isilaele eci, 'Njiyo thzoyu nahululiwa likatulo.' ¹¹ Ngeci mukwelume alwa namungenjenji mukwelume, ne munu wayumweya akeya kunaamwena munu wenji mu moko oyu mufula, ne ngeci aolola lyoko lyenji kumukwata ku ukwelume, ¹² nehoni oyo mbuyama omutete lyoko lyenji; lithziho lyoe lelo lyayuva ñeke. ¹³ Mu mukota woye lelo kwakala inu yo ulemu o kulishiya, sho shikulu neshi sho shionye. ¹⁴ Mu njiyo thzoye lelo kwakala ipimo yokulishiya, sho shikulu neshi sho shionye. ¹⁵ Okale no inu yo ulemu ouwa ou uloela; okale no shipimo sho shiwa eshi shiolela, eci mayuwa oye akale o ale mu litunga eli akupa Shinda sha moyo Nyambi oye. ¹⁶ Mukonda anu wahe awa akwama enu yokengeyo, wahe awa akwama ko kukana kuluka a mathzilo kwa Shinda sha moyo Nyambi oye. ¹⁷ Ovuluke ei akwamine Ameleki kukwoe mu likuñwa apa mwatundile mu Engepita, ¹⁸ omu aliwanenine noe mu likuñwa no kulwisha awa akalile munyima, wahe awa avapile munyima thzoe apa wafayukile no kuaya; kalemekile Nyambi. ¹⁹ Honine, Shinda sha moyo Nyambi oye apa akupa kulitulumwisha kwa akwethzimbo yoye wahe awa anakuthzinguluka, mu litunga eli akupa Shinda sha moyo eci olishwane, lelo wavulama kuyundisha lithzina lya Ameleki mushi thzo liwilu eci ovulukelange po.