¹ Mukwelume apa ashimba mbuyama kumuyeka, ngeci kamuloelile mukonda onamono shinu sho shimango kukwenji, nehoni amuñolele liñolo lyo kumulukulula, alipake mu lyoko lyenji, ne amutundishe mu njiyo thzenji. ² Kunatunda mu njiyo thzenji, atwesha kukayekiwa kwa mukwelume yumweya. ³ Ngeci munu wenji o mushili ayepo muthzimba ne ayepo muñolela liñolo lyo kumulukula, kulimupaka mu lyoko lyenji, no kumutundisha mu njiyo thzenji; nji ngeci munu wenji o mushili ayepo fa, oyo mukwelume namushimbi kumuyeka eci akale munu wenji--- ⁴ nehoni munu wenji o mutatekelo, oyu natanga kumulukulula, katwesha kumushimba eci akale munu wenji, munyima thzo kukala o kukana kukena; mukonda eyo kenge ikala yo mathzilo kwa Shinda sha moyo. Lelo waletela litunga kukala no mulandu, litunga eli akupa Shinda sha moyo Nyambi woye eci olishwane. ⁵ Mukwelume apa ayeka mbuyama omupe, kathzi ku mvo no mashwalale, nji kupiwa shikwama shimweya; kenge akala okuliyala pa njiyo pa mwaka ofoci kuleta kunyanyuka kwa munu wenji oyu anayeka. ⁶ Munu lelo ashimba kakunju nji liwe lyo kulinyungisha eci amukwatelepo, mukonda oko po kushimba moyo o munu kuninga po kukwatela. ⁷ Ngeci munu ayepo waniwa kunaithzi mwapenji yupi nji yupi mukaci ko ana Isilaele, no kumukwama upika no kumuulisha, oyo mwithzi apaiwe; ne kenge otundisha omango mu mukaci kenu. ⁸ Mumamele ekola yo mbingwa, eci mumamele no kushupwela ituminino yoihe ipiwa kukwenu ei amifundisha, apulisita, awo Alivi; eci eli naniwatumina, mukwame kengeyo. ⁹ Muvuluke ei akwamine Shinda sha moyo Nyambi wenu kwa Miriami apa mwatundile mu litunga lya Engepita. ¹⁰ Apa opa mwapoe shikoloti shipi nji shipi, lelo wathza mu njiyo thzenji kukashimba eshi anapaka eci poliyo po kumukwatela. ¹¹ Oimane pola, ne oyo munu onapa shikoloti kenge aleta esho po kumukwatela pola kukoye. ¹² Ngeci oyo munu shihutu, lelo walala no nopa po kumukwatela. ¹³ Yoshemwa omuhushele apa po kumukwatela liyuwa apa litoka, eci alale mu lipai lyenji ne akufiyawele; kenge kukala kulika kukwoye pa meho a Shinda sha moyo Nyambi woye. ¹⁴ Lelo wanyandisha poi oyu onakumuna o shihutu no kupila, shianga eci mungenjoye mwana Isilaele nji anu o mu matunga ao awa ali mu mambongi enu. ¹⁵ Liyuwa no liyuwa omupe mali aa anakwamena; liyuwa lelo lyatoka koshime kumukula, mukonda shihutu ne poliyo anakulupela. Okwame kengeyo eci alilela kwa Shinda sha moyo kulila yowe, ne eci shakala shivi eshi onakwama. ¹⁶ Ashemi lelo apaiwa mukonda wa ano, ana nawo apaiwa mukonda wa ashemi o. Munu no munu apaiwe mukonda o shivi shenji aye shinda. ¹⁷ Lelo wa alula shiamba mukonda sha munu o ku litunga lyalo nji shiyana, kalo lelo washimba shito sha lifakathzi kushininga po kumukwatela. ¹⁸ Ovuluke eci kuma wakalile o munu o ku litunga lyalo mu litunga lya Engepita, ne eci Shinda sha moyo Nyambi oe yoliyo wakuamwenine kukutundisha mo. Honine nakutumina kumamela milao thzenji. ¹⁹ Apa oyanga ei onalimi mu shilwa shoe, ne ngeci onavulama shitungu sho uloto mu shilwa, lelo wahuka kukashishimba; shikale sha munu o ku litunga lyalo, shiyana, nji lifakathzi, eci Shinda sha moyo Nyambi oye akufiyawela mu ekwama yoihe yo moko oye. ²⁰ Apa okulumuna olive ku shitondo shoye sho olive, lelo wahukela ku mite thzasho kalo; kenge akala olive wa munu o ku litunga lyalo, shiyana, nji lifakathzi. ²¹ Apa oyanga oshuka o mu shilwa shoe sho veine, lelo wapupulula mo kalo. Ei inashiyala mo ya munu o ku litunga lyalo, shiyana, no lifakathzi. ²² Ovuluke eci kuma wakalile o munu o ku litunga lyalo mu litunga lya Engepita; honine nakutumina kumamela ou mulao.