¹ Kwithsa mukwelume oyu nashanyauka okwelume nji oyu nacinuka okwelu oyu wakuingena mu shiwano sha Shinda sha moyo. ² Kwithsa mwana o mu upangala oyu wakuingena mu shiwano sha Shinda sha moyo; kukakuma ku shikuta sho ulikumi sha ekulyenji, kwithsa kukwo oyu wakuingena mu shiwano sha Shinda sha moyo. ³ Mu Amoni nji mu Amoabi kakuingena mu shiwano sha sha Shinda sha moyo; kukakuma ku shikuta sho ulikumi sha ekulyenji, kwithsa kukwo oyu wakuingena mu shiwano sha Shinda sha moyo. ⁴ Mukonda kamitambulile no ishima no meyu mu likuñwa apa mwatundile mu Engepita, kalo kuma akumunine Balaamu mwana Beori oku petori mu Arami Naharaimi, eci amikute. ⁵ Ambene Shinda sha moyo Nyambi wenu kateelelile kwa Balaami; unohoni, Shinda sha moyo Nyambi wenu ayepo pilula shikuto kushikwama fiyauthzi kukwenu, mukonda Shinda sha moyo Nyambi wonu amihima. ⁶ Lelo mwawafotela kuliyala nji kuyoya shuwana, mu mayuwa enu oahe. ⁷ Lelo wathzimba munu o Muedomo, mukonda mwapoe; lelo wathzimba munu o mu Engepita, mukonda kuma wakakalile mwenda mu litunga lyenji. ⁸ Ekulu o shikuta sho mushihatu shawa aelekiwa kukwo aingene mu shiwano sha Shinda sha moyo. ⁹ Apa muthza mu ushwalale kukalwa na akwethzimbo yenu, mulihenge ku enu yoimango yoihe. ¹⁰ Ngeci mukaci kenu kwali munu oyu nakana kukena mukonda o wei inamukeyela ushiku, atunde mu shilombo sho mashwalale; lelo ahuka mu shilombo. ¹¹ Lungulo apa likuma, alihupe mu meyu; liyuwa apa litoka, ahuke mu shilombo. ¹² Mukale no shivaka pola thzo shilombo oku othzanga; ¹³ ne okale no shimu shimweya mu itenga yoye sho kushimisha; apa onyotomana kulikwathsa owe shinda, oshime liteke ko esho shishimisho ne apa omana ovumbeke ei inatundu kukoye. ¹⁴ Mukonda Shinda sha moyo Nyambi woye aendenga mukaci ko shilombo shenu kumipa kutwesha no kupa akwethzimbo yenu mu moko enu. Honine shilombo shenu shikale sho kukena, eci lelo amona shinu sho kukana kukena mukaci kenu ne amishiye. ¹⁵ Lelo wahusha mupika kwa ñathsile wenji mupika oyu noomboloka kwa ñathsile wenji. ¹⁶ Omushiye akale noe, momuhe mu mbongi ethzi ahangula. Lelo wamunyandisha. ¹⁷ Lelo kwakala lihule mukaci ko ana Iilaele owambuyama, kalo lelo kwakala lihule mukaci ko ana Isilaele owakwelume. ¹⁸ Lelo waleta mali o uhule nji mali o muulo o mbwa mu njiyo thza Shinda sha moyo mukonda wei onalianga; mukonda ei muwili wayo ya mathzilo kwa Shinda sha moyo Nyambi woye. ¹⁹ Lelo wakolotisha mungenjoye mwana Isilaele ko kumukulisha shimweya peulu--- kumukulisha shimweya peulu ku mali, kumukulish shimweya ku shilya, nji kumukulisha shimweya peulu ku shinu shoshihe eshi shinakolotishiwanga ko kukulisha shimweya peulu. ²⁰ Kwa munu o ku litunga lyalo omukolotishe ko kumukulisha shimweya peulu, eci Shinda sha moyo Nyambi oye akufiyawele mu enu yoihe apa opaka lyoko lyoe, mu litunga eli othza kukalishwana. ²¹ Apa olianga shinu kwa Shinda sha moyo Nyambi woye, lelo wakatapa ku kushikwama, mukonda Shinda sha moyo Nymbi woye yoshemwa kenge ashifota kukwoye; kenge shikala shivi kukwoye kukana kushikwama. ²² Ambene ngeci olihenge ku kulianga, kashikala shivi kukwoye. ²³ Eshi shinatundu mu kanwa koe oshimamele no kushikwama; ko omu analiangela kwa Shinda sha moyo Nyambi woye, shinu shoshihe eshi onakulupelisha ko kanwa koe. ²⁴ Apa othza mu shilwa sha mwapoe sho veine, olye oshuka omu ohimena, ambene lelo wapaka shimweya mu katanda koye. ²⁵ Apa othza mu shilwa sha mwapoe sho uloto unapi, oyange uloto ko lyoko lyoe, ambene lelo wavuthza uloto okupya wa mwapoe no cekethsi.