¹ Lelo watanekela pulu wa mungenjoye mwana Isilaele nji lingu lyenji koiyonga ne owe waliholeka; yoshemwa oihushe kukwenji. ² Ngeci mungenjoye mwana Isilaele kali po pepi noye, nji ngeci komulimuka, nehoni olete esho shiyama ku njiyo thzoe, ne kenge shikala noye kutwala apa akushifotela, nehoni pohuma washihusha kukwenji. ³ Okwame kengeyo no ku shindongi shenji; okwame kengeyo no ku shivata shenji; okwame kengeyo ku shinu shoshihe shinayongo sha mungenjoye mwana Isilaele, shinu shoshihe eshi anayongisha ne onashiwana; ⁴ Lelo wamona shindongi nji pulu wa mungenjoye mwana Isilaele koinawela mu likuñwa ne owe waliholeka; yoshemwa omukwathse kushiimeka mo kalo. ⁵ Mbuyama lelo avata inu yo shikwelume, ne mukwelume naye avata evata yo shimbuyama; mukonda munu yomuhe oyu kwama ei enu wa mathzilo kwa Shinda sha moyo Nyambi oye. ⁶ Ngeci shitalatala sho shinyunyi shili kuposho thzoe mu likuñwa ku shitondo shipi nji shipi nji pashi, no twana mo nji mayaki ne mama wato onafulumana pa twana nji mayaki, lelo washimba mama wato pofoci no twana. ⁷ Yoshemwa oshiye mama wato athze, ambene twana ato watwesha kutulishimbela. Omamele ou mulao eci yoye iloe, ne kalo eci ovulishe mayuwa oye. ⁸ Apa oumba njiyo thzo thzipe, okwamene shituwa shathzo shipatango eci lelo waleta manyinga pa njiyo thzoye ngeci munu oyu li po awa po. ⁹ Mu shilwa shoye sho itondo yo veine lelo wakuna mo mbuto thzo mishovo thzili, eci ei onakunu no oshuka o veine lelo yaipa. ¹⁰ Lelo wakekelisha pulu no shindongi pofoci. ¹¹ Lelo wavata shito shinakwamiwa pa ohunga o lingu no line pofoci. ¹² Okwame minganja ku mapeta o canthzi omu onavatanga. ¹³ Ngeci mukwelume ayeka mbuyama, ne athza kukwenji, nehoni amuthzimba, ¹⁴ ne amulundela inu yo imango ei iipisha lithzina lyenji, ne aamba eci, 'Kuma naniyeke oyu mbuyama, ambene apa nanihenyena kukwenji, kuma naniwana eci kali mwalanjo.' ¹⁵ Nehoni tata wa mumbanda no mama wenji atwale upaki umonisha eci mwalanjo kwa akulu ku mashelo o mbongi. ¹⁶ Tata wa mumbanda atongwele akulu eci, 'Kuma naniyekisha mwanange koyu mukwelume, ne onamuthzimbi. ¹⁷ Mumone, onamulundela inu yoimangone onaamba eci, ''Kwa mwanoe kaniwanineko upaki umonisha eci mwalanjo.'' Ambene upaki umonisha eci mwanange mwalanjo ou.' Nehoni kenge ayandumuna shito pa posho thza akulu o mbongi. ¹⁸ Akulu o ethzo mbongi ashimbe oyo mukwelume no kumupa kashitiko; ¹⁹ no kumukulisha mulandu oukama pa mashekele o shilivera likumi, no kuapa kwa tata wa mumbanda, mukonda oyo mukwelume onaipisha lithzina lya mwalanjo wa Isilaele. Akale munu wenji; lelo amucithza mu mayuwa enji o kuyoya oahe. ²⁰ Ambene ngeci yashemwa, eci kwithsa upaki o walanjo unawaniwa koyu mumbanda, ²¹ nehoni alete oyo mumbanda ku shelo thzo njiyo thza tata wenji, ne anu omo mu mbongi amupovaule no mawe kumupaa, mukonda onakwama shinu shoshimango mu Isilaele, kukwama uhule mu njiyo thza tata wenji; ne kenge otundisha omango mukaci kenu. ²² Ngeci mukwelume awaniwa kunalala no mbuyama nayekiwa kwa mungenjenji mukwelume, nehoni muwili wo afe, oyo mukwelume nalala no mbuyama naye mbuyama; ne kenge otundisha omango mu Isilaele. ²³ Ngeci mumbanda o mwalanjo, onaungekeliwa ko mukwelume, ne mukwelume yumweya amuwana mu mbongi ne alala nenji, ²⁴ owashimbe muwili wo owatwale ku shelo thzo mbongi, no kuwapovaula kuwapaa. Mupovaule mumbanda, mukonda kanakuwu, shianga eci kuma nakala mu mbongi. Mupovaule mukwelume, mukonda onepisha munu wa mungenjenji; ne kenge otundisha omango mukaci kenu. ²⁵ Ambene ngeci mukwelume awana mumbanda oyu naungekeliwa mu shilwa, ne ngeci amukwata no kulala nenji, nehoni mukwelume pohuma oyu nalala nenji yoliyo paiwa. ²⁶ Ambene mumbanda lelo wamukwama shimweya; kwithsa shivi anakwama eshi aloela kupaeliwa. ²⁷ Mukonda kuma namuwana mu shilwa; oyo mumbanda naungekeliwa kuma nakuwu, ambene kanakula munu o kumuamwena. ²⁸ Ngeci mukwelume awana mumbanda o mwalanjo ambene kali wakuungekeliwa, ne ngeci amukwata no kulala nenji, ne ngeci anawaniwa, ²⁹ nehoni oyo mukwelume nalala nennji akule mashekele o shilivera mutanu kwa tata wa mumbanda, ne akale munu wenji, mukonda onamuipisha. Lelo amucithza mu mayuwa enji o kuyoya oahe. ³⁰ Mukwelume lelo ashimba munu wa tata wenji kumuyeka; Lelo ashimba maluwo a tata wenji.