¹ Ngeci munu ayepo waniwa kunapaiwa mu litunga akupa Shinda sha moyo Nyambi oye eci olishwane, kunalala mu shilwa, ne oyu namupaa kalimukiwa; ² nehoni akulu oye no aka kuatula oye athze ne akatepe kutunda apa ali munu napaiwa kuthza ku mambongi aa anamuthzinguluka. ³ Nehoni akulu o mbongi ethzi thzili popepi no shivimbi ashimbe lilole ku ngombe thzo, aka kashime kukwama, kalo kashime kukoka ku coko. ⁴ Nehoni atwale oyo lilole ku mulonga uli no meyu apupa, mulonga ou ushime kukekeliwa nji kukuniwa, ne omo mu mulonga moliyo akacolela oyo lilole thsingo. ⁵ Apulisita akelya a Livi, akeye ko, mukonda Shinda sha moyo Nyambi oye onawahangula kumukwamena no kufiyawela mu lithzina lya Shinda sha moyo no kuatula iamba yo muyoyo no matuma ko liywi lyo. ⁶ Akulu wahe o mbongi ethzi thzili popepi no munu napaiwa alihupe ku moko peulu thzo lilole linacoliwa thsingo mu mulonga; ⁷ ne alitawela ku shiamba ne aambe eci, 'Moko etu kamwaile manyinga enji, shianga meho etu kaamonine. ⁸ Otetele ku milandu, Shinda sha moyo, anu oye Isilaele, awa onaamwena, ne wapaka mulandu o kumwaa manyinga o kupila mulandu mukaci ko anu oye Isilaele.' Nehoni mulandu o kumwaa manyinga kenge uteteliwa kuko. ⁹ Omu moliyo otundishelela manyinga o kupila mulandu mukaci kenu, apa mukwama ei inaloo mu meho a Shinda sha moyo. ¹⁰ Apa othza kukalwisha akwethzimbo yoye ne Shinda sha moyo Nyambi oye akupa kuwatwesha no kuwapaka mushi thzoe eci owaendishe ne wawashimba kukawamuna, ¹¹ ngeci owepo mona mukaci kawa anamuniwa mbuyama o muwa, ne onamuloela ne wafota kumuyeka eci akale munu woye, ¹² nehoni omulete ku njiyo thzoye; aliteule ku mutwi no kuteta mayala enji. ¹³ Nehoni kenge ahulula ito ei navata apa nashimbiwa kukamuniwa ne kenge akala mu njiyo thzoye no kulila tata wenji no mama wenji ngonda thzo mutunu. Munyima pohuma wathza kukwenji no kukala munun wenji, ne kenge akala munu woye. ¹⁴ Ambene ngeci komuloelile, omushiye athze oku ahima kokuhe. Ambene lelo wamuulisha ko mali, kalo lelo wamukwama eci mupika, mukonda onamushomolola. ¹⁵ Ngeci mukwelume oli na ambuyama eli ne yumweya ahimiwa ne yumweya onathzimbiwa, ne wahe eli anamuelekela ana--- muwili wo oyu himiwa noyu nathzimbiwa--- ngeci mwana o mweli o mukwelume woyu nathzimbiwa, ¹⁶ nehoni pa liyuwa oyu mukwelume apa aela anenji kushwana ei ali nayo lelo akwama mwana o mukwelume wa mbuyama himiwa eci yoliyo mweli kushiya mwana o mukwelume wa mbuyama nathzimbiwa aye mweli shemwa. ¹⁷ Ambene, amonishe mweli shemwa, mwana o mukwelume wa mbuyama nathzimbiwa, ko kumupa mielelo thzili ku inu ali nayo yoihe, mukonda oyo mwana oliyo matatekelo o okolo wenji. Ei iloela mweli yenji. ¹⁸ Ngeci munu oli no mwana o mukwelume o mukalu no mukanayuva oyu kana kuyuva tata wenji no mama wenji, oyu ninga eci, shianga awa amukutulula, kawateelela; ¹⁹ nehoni tata wenji na mama wenji amukwate ne amulete kwa akulu o mu mbongi thzenji no ku mashelo o mbongi thzenji. ²⁰ Atongwele akulu o mu mbongi thzenji, 'Oyu mwanetu mukalu no mukanayuva; kateelela liywi lyetu; wakulya nene no ucakolwa.' ²¹ Nehoni anu wahe o mu mbongi thzenji kenge amupovaula no mwae kumupaa; ne kenge otundisha omango mukaci kenu. Isilaele yomuhe kenge ayuva ne kenge ayapa. ²² Ngeci munu onakwama shivi shininga eci aloela kupaiwa, ne wamupaka pa shitondo, ²³ nehoni ilama yenji lelo yakala pa shitiondo ushiku ouhe. Yoshemwa omuvumbeke elyo liyuwa mwene; mukonda munu yomuhe oyu kunjaela onakutiwa ko Nyambi. Lelo wathzilaula litunga eli akupa Shinda sha moyo Nyambi oye eci olishwane.