¹ Apa othza kukalwisha akwethzimbo yoye, ne wamona tukambe, makoloi, no anu oangi kukupita, lelo wawayapa; mukonda Shinda sha moyo oli noe, aye wakutundishile mu litunga lya Engepita. ² Apa muingene mu mvo, mupulisita ahenyene kwa anu no kuamba kukwo. ³ Awaambele eci, 'Oteelele, Isilaele, wathza kukulwa na akwathzimbo yoye. Lelo mwaleya micima. Lelo mwayapa no kututuma. Lelo mwawayapa. ⁴ Mukonda Shinda sha moyo yoliyo thza nenu kukalwisha akwethzimbo yenu no kumiyoyisha.' ⁵ Aka kuendisha aambe kwa anu kuamba eci, 'Elye munu kukwenu oyu naumbu njiyo thzo thzipe ne oshime kuloelela shikwama yathzo? Athze ahuke ku njiyo thzenji, eci lelo akafela mu mvo ne eci munu yumweya athziloelele. ⁶ Eine kwali munu kukwenu oyu nalimi shilwa sho itondo yo veine ne oshime kulya ku oshuka omo mu shilwa? Athze ku njiyo thzenji, eci lelo akafela mu mvo ne eci munu yumweya alye oshuka omo mu shilwa. ⁷ Eine kwali munu kukwenu oyu naungela mbuyama ambene oshime kumuyeka? Athze ku njiyo thzenji eci lelo akafela mu mvo ne eci munu yumweya ayeke oyo mbuyama.' ⁸ Aka kuendidsha aambe kalo na anu kuamba eci, 'Eine kwali munu kukwenu o lipyeha nji o mucima o wowa? Athze ahuke ku njiyo thzenji, eci mucima wa mwapenji lelo wayapa eci mucima wenji.' ⁹ Aka kuendisha apa amana kuamaba kwa anu, ahangule aka kuendisha mashwalela eci awaendishe. ¹⁰ Apa othza kukalwisha mbongi, oipule anu alimo ngeci ahima kuliyala. ¹¹ Ngeci akutawa ko kuliyala ne akuyanjulule mashelo oo, wahe anu alimu apiluke aka kukukwamena ne akukwamene. ¹² Ambene ngeci kahimine kuliyala kukwoye, ne akulwisha, nehoni othzithzinguluke kuthzipaka mukaci, ¹³ ne Shinda sha moyo Nyambi oye apa akupa kuwatwesha no kuwapaka mushi thzoye eci owaendishe, opae mukwelume yomuhe mu mbongi ko utwe o mwele. ¹⁴ Ambene ambuyama, anuke, emunanu no inu yoihe ei ili mu mbongi, no lufumo lwathzo loluhe oishimbe. Kenge olya ei onanyanga akwethzimbo yoye, awa anakupa Shinda sha moyo Nyambi woye. ¹⁵ Okwame kengeyo ku mambongi oahe aa ali kokule noe, mambongi aa aninga eci kali mambongi aa anu. ¹⁶ Mu mambongi a anu awa akupa Shinda sha moyo Nyambi oye eci oashwane, lelo wayoyishamo shianga shofoci eshi shipuya. ¹⁷ Owapaelele wahe: Ahiti, no Amori, Akanana, Aperizi, Ahivi no Ajebusi eci eli ana kutumina Shinda sha moyo Nyambi oye. ¹⁸ Okwame kengeyo eci lelo akufundisha ku mikalaelo thzo thzo mathzilo, ethzi anakwamena athzimu o. Ngeci amwe po muikwama, kenge mukwama shivi kwa Shinda shanmoyo Nyambi wenu. ¹⁹ Apa opaka mbongi mukaci pa shikati sho shile, ko muthzilwisha eci muthzishimbe lelo waipisha itondo yathzo ko kuitetaula no kamo. Mukonda koliyo oloela kulya, ne lelo waiteta. Mukonda shitonda sho mu shilwa ne munu eci omulwishe? ²⁰ Shime itondo ei olimuka eci kali yakulya ei oloela kuipisha no kuiteta; kenge oumba shipatango kuthzingulukisha mbongi ethzi thzilwa nenu, kutwala apa thzikawela.