¹ Shinda sha moyo Nyambi oye apa apaa anu, awo ashinda sho litunga eli akupa Shinda sha moyo Nyambi oye, no apa oshimba litunga lyo no kukala mu mambongi o no manjiyo o, ² ohangule mambongi ahatu pakaci ko litunga lyoe eli akupa Shinda sha moyo eci olishimbe. ³ Okwame likuñwa lyoshokulu ne otepe maenja o litunga lyoe luhatu, litunga eli akupa Shinda sha moyo Nyambi oye eci olishwane, eci munu yomuhe oyu paa munu acileleko. ⁴ Ou oliyo mulao o munu oyu paa mungenjenji no kucilelamo eci ayoyishe moyo wenji---munu oyu paa mungenjenji ko kukana kuhima no kukana kumuthzimba pa shikati ukwamahala owo ukalu. ⁵ Eci kenge, ngeci munu athza mu mulundu na mungenjenji kukateta itondo, ne ashinja shitondo no kamo ne kamo kasokoka mu mupinyi no kushinja mungenjenji no kumupaa---nehoni oyu munu acilele ku thzimweya thzo ao mambongi no akayoyishe moyo wenji. ⁶ Apa kukana kukala kengeyo muka kukulisha manyinga anamwaala atwesha kushupwela oyu napaa, ne mukuangipa nene amukwata, ngeci kule nene, amufula no kumupaa, shanga eci oyu munu kaloelile kufa, amona ayepo kanathzimbi oyo mungenjenji nafu. ⁷ Honine nakutumina ci ohangule mambongi ahatu. ⁸ Ngeci Shinda sha moyo Nyambi oye ayepo kulisha maenje oye, eci eli aliethzile kwa akwathsañulu oye eci moliyo akwamena, ne ayepo kupa lyolihe litunga eli akulupelishile kupa akwathsañulu oye; ⁹ ngeci owepo mamela yoihe ei ituminino no kuikwama, ei nikutumina lelo---ituminino yo kuhima Shinda sha moyo Nyambi oye no kuenda mu makuñwa enji shikati shoshihe, nehoni olipakele mambongi ahatu, kupaka kwaa mambngi ahatu. ¹⁰ Okwame kengeyo eci manyinga okupila mulandu lelo amwaala mu litunga akupa Shinda sha moyo eci olishwane, ne kupile mulandu o manyinga ou ukala kukoye. ¹¹ Ambene ngeci munu onathzimbi mungenjenji, amuundamena, akatuka kumulwisha, no kumufula ayepo fa, ne ngeci ayepo cilela ku thzimweya thzo aa mambongi--- ¹² nehoni akulu o mumbongi thzenji amutumena anu akamushimbeko, no kumupa mu moko a mukwa kukulisha manyinga, eci apaiwe. ¹³ Lithziho lyoe lelo lyamufela ñeke, ambene, otundishelele mulandu o manyinga mu Isilaele eci inu yoye iloe. ¹⁴ Lelo wahenyisha maenja a mungenjoye aa apakile okukale, mukushwana okashwana, mu litunga eli akupa Shinda sha moyo Nyambi oye eci likale lyoe. ¹⁵ Paki yofoci pohuma katwesha kupaka yo umango upi nji upi nji shivi shipi nji shipi eshi anakwama munu, momuhe omu anakwamena shivi; mutunwa to mapaki eli nji mutunwa to mapaki ahatu shiamba shipi nji shipi pohuma shatawiwa eci shahsemwa. ¹⁶ Ngeci paki oñanda apaka kulundela munu yo mulandu anakwama. ¹⁷ Nehoni awo anu eli, awa alithzekisha, aimane pa posho thza Shinda sha moyo, pa posho thza apulisita na aka kukatula awa akwama omo mu mayuwa ao. ¹⁸ Aka kuatula afotishishe shuwana; amone, ngeci oyo paki wa ñanda ne onapaka yo ñanda kwa mwapenji, ¹⁹ nehoni okwame kukwenji, omu anafotela eci kukwamiwe kwa mwapenji; ne kenge otundisha omango mukaci kenu. ²⁰ Nehoni wamweya kenge ayuva no kuyapa, ne kutunda apo kakukwama kalo omango o kengeyo mukaci kenu. ²¹ Meho oye lelo afela munu ñeke; moyo kenge ukuliwa ko moyo kalo, lithziho ko lithziho, lieo ko lieo, lyoko ko lyoko, liulu ko liulu.