¹ Mushe ayepo tunda mu lyanda Moabi kuthza ku mukinya wa Nebo, peulu o Pisiga, musambwa thzo Jeriko. Oko Shinda sha moyo ayepo mumonisha litunga lya Giliadi lyolihe kukauma ku litunga lya Dani, ² no litunga lya Nafetali lyolihe, no litunga lya Efraimi na Manase, no litunga lya Juda lyolihe kukakuma ku likulu lwale lo ku mutokoyuwa, ³ no ku Negevu(mumbulwa kukutu o ku mboela o litunga lya Isilaele), no lyanda lyo mulonga wa Jeriko, mbongi thzo makaka, kukakuma ku Zoari. ⁴ Shinda sha moyo ayepo aamba kukwenji, ''Eli lyoliyo litunga eli naliangile kwa Abrahama, kwa Isaka, no ku kwa Jakobo, eci, 'Kenge nilipa akulyoe.' Ninatakutawethza eci olimone no meho oe, ambene kothzi mo.'' ⁵ Ne Mushe mupika Shinda sha moyo, ayepo fela omo mu litunga lya Moabi, eci omu lyakulupelishile liywi lya Shinda sha moyo. ⁶ Shinda sha moyo ayepo muvumbeka mu litunga lya Moabi musambwa Beti Poeri, ambene kwithsa oyu limuka oku thzili mbumbo thzenji kuleta no lelo lino. ⁷ Mushe apa afile kuli no myaka thzikuma pa shita no myaka makumi eli (120); Meho enji kanailaula, shianga okolo wenji kanauhuka munyima. ⁸ Anu o Isilaele awopo alila Mushe mu lyanda lya Moabi pa mayuwa makumi ahatu, nehoni mayuwa okulila Mushe aopo apwa. ⁹ Joshua mwana Nuni kuma ayalile mupepo o unyanyami, mukonda Mushe kuma amupakile moko. Anu a Isilaele awopo ateelela kukwenji no kukwama eyo Shinda sha moyo atuminine Mushe. ¹⁰ Kutunda apo kakukalile mupolofita mu Islaele o kulipitula na Mushe, oyu nalimukakiwa kwa Shinda sha moyo shihanga no shihanga. ¹¹ Kakukalile mupolofita o kulipitula nenji mu imonisha no ikomokisha ei namutunga Shinda sha moyo kukakwama mu litunga lya Engepita, kwa Faro, no ku apikenji wahe, no ku litunga lyenji lyolihe. ¹² Kakukalile mupolofita o kulipitula nenji mu ekwama yo ikulu yo kuyapisha ei nakwama Mushe mu meho o Isilaele yomuhe.