¹ "Mponya bwami bokujulu buyoba mbuli bana bwinga baki kumi bakabweza malambi abo okwinka kuti bakacinguzye sibwinga. ² Bosanwe balibafubafuba ape bosanwe bali basongo. ³ Mponya abo basimbi bafubafuba nibakabweza malambi abo, takwe nibakabwezelezya amafuta. ⁴ Pele basimbi basongo bakabwezelezya mafuta antomwi amalambi abo. ⁵ Ino awo sibwinga wakacedisigwa, bense bakafwa ngonzi mponya bakona. ⁶ Pele akati kamasiku kwakaba cipoyili, amulange sibwinga! Amwinke anze mumutambule? ⁷ Mponya bense basimbi bakabuka okuyasya malambi abo. ⁸ Bafubafuba bakati kubasongo, Amutupe mafuta enu amwi nkambo malambi esu ayanda kuzima. ⁹ "Pele basongo bakataba bakati, mbukunga takokwana esu anywibo, amwinke kuli abo bauzya mukaulile enu nobeni. ¹⁰ Kabali baunka kuyoula, sibwinga wakasika, mponya abo bakalibambilide bakainka anguwe mu pobwe lyo bwinga, mponya mulyango wakajalwa. ¹¹ "Kuzwa awo abo basimbi bamwi bakasika okwamba kuti,'mwami, mwami, tujulile. ¹² "Pele wakataba wakati nconzyo ndamwambila, tandimwizi. ¹³ Mulindile nkambo tamuzi buzuba nanga wola. ¹⁴ "Nkambo cili mbuli muntu walikuyanda kwinka kucisi cimbi, wakaita bazike bakwe okupapa lubono lwakwe. Kuli umwi wakapa matalenta osanwe, ¹⁵ kuli umwi wakapa obile, ape kuli umwi wakamupa lyomwi, umwi oumwi wakatambula mbuli celelo cakwe, mponya muntu ulya wakainka mu lwendo lwakwe. ¹⁶ Oyo wakatambula matalenta osanwe wakainka mponya mponya okuyoabelesya ape okujana amwi matalenta osanwe. ¹⁷ Munzila njiyonya, oyo wakatambula matalenta obile wakajana ape obile. ¹⁸ Pele muzike oyo wakatambula talenta lyomwi wakainka, wakusya mugodi mumuse okusisa mali a simalelakwe. ¹⁹ Ino nikwakainda cindi cilamfu simalelo wababelesi abo wakapiluka okupandulwidana ambabo. ²⁰ Mubelesi wakatambula matalenta osanwe wakaza okweta amwi matalenta osanwe wakaza okweta amwi matalenta osanwe. Wakati, 'mwami wakandipa matalenta osanwe bona ndajana amwi matalenta osanwe. ²¹ "Mwami wakwe wakati kulinguwe, wacita kabotu, mubelesi mubotu ushomeka! wakashomeka kuzintu zinini. Ndiyo kubika kuba mwendelezi we zintu zinji mukusekelela ko mwami wako. ²² "Mubelesi wakatambula matalenta obile wakaza wakati, "mwami wakandipa matalenta obile langa ndajana amwi matalenta obile.' ²³ Simalelo wakwe wakati kulinguwe, "wacita kabotu omubelesi ushomeka! wakashomeka kuzintu zinini. Ndiyokubika kuti ube mwendelezi kuzintu zinji. Njila mukusekelela komwami wako. ²⁴ "Mponya mubelesi wakatambula talenta lyomwi wakaza wakati, "mwami, ndilizi kuti uli muntu muyumu. Ulatebula mpuwatakabyala, ape okubungika mpuwakamiza. ²⁵ Ndakayowa, mponya ndakainka okuyosisa talenta lyako mumuse. Langa, ujisi ano cizwa kuli yebo. ²⁶ Pele simalelo wakwe wakamutaba wakati kulinguwe,'yebo mubelesi mubi mukandu , ulizi kuti ndilatebula mudatabyala ape okubungika awo mpundakaminza. ²⁷ Nkambo niwakapa mali angu kuli basimpindu, mponya kukupiluka kwangu nindazobambulula twangu antomwi empindu. ²⁸ Mponya amumunyange matalenta mupe kumubelesi ujisi matalenta ali kumi. ²⁹ Pele kuli wense ujisi zinji uyopegwa, ape uyoyungizizigwa. Pele kuli esnse utajani kufumbwa, nikuba eco ncajisi uyonyangwa. ³⁰ Amusowe mubelesi mukandu anze mumudima wanze, oko nkwayolila okulumanya ntwino? ³¹ Äwo mwana muntu nayosika mubulemu bwakwe abangelo bense anguwe, mponya uyokala acibula cabulemu bwakwe. ³² Kumenso akwe mishobo yense yabantu izobunganizigwa, mponya uyoanzanya bantu kuli umwi oumwi, mbuli mwembezi mbwanzanya mbelele kuzwa kumpongo. ³³ Uyobika mbelele kujanza lyakwe lye cilisya, pele mpongo kucigoyo cakwe. ³⁴ Mponya mwami uyoti kuli balikucilisya cakwe,'kamuza, nywebo nomwakalelekwa otata, amukone bwami mbumwakabambilwa kuzwa kumalengelo anyika. ³⁵ Ndafwide nzala mwakandipa cokulya, ndali mwenzu mwakanditambula; ³⁶ ndali ecinkuna mwakandizwatika; ndali mulwazi mwakandibamba; ndali muntolongo mwakaza kuli mebo. ³⁷ "Mponya baluleme bayotaba kuti,"mwami ndelili nitwakakubona kofwide nzala twakupa cokulya? nanga nyota mponya twakupa cokulya; ³⁸ ndelili nitwakubona koli mwenzu twakutambula? nanga cinkuna twakuzwatika; ³⁹ Ndelili nitwakakubona kucisidwe nanga muntolongo ape twaza kuzokubona? ⁴⁰ Mponya mwami uyotaba okuti kuli mbabo, nconzyo ndamwambila kuti ncimwakacitila kuli umwi wabazyalwama mwakacitila mebo. ⁴¹ Mponya uyoamba kuli abo balikucigoyo cakwe kuti, Amundizwide, nomukutidwe, mumulilo utazimi oyo wakabambilwa satani abangelo bakwe. ⁴² Nkambo ndafwide nzala, pele takwe nomwakandipa cokulya; ndali enyota, pele takwe nimwakandipa cokunywa; ⁴³ ndali mwenzu, pele takwe nimwakanditambula; ndali cinkuna, pele takwe nimwakandizwatika; ndali mulwazi ape ndali muntolongo, pele takwe nimwakandibamba! ⁴⁴ "Mponya ambabo bayotaba okwamba kuti, mwami, ndelili nitwakubona kofwide nzala nanga nyota, nanga kuba mwenzu, nanga cinkuna, nanga kuciswa nanga muntolongo, mponya takwe nitwakakugwasya? ⁴⁵ "Mponya uyobataba uyoti, nconzyo ndamwambila, eco ncimwatabacitila niciba comwi ali ezi, takwe nimwakacitila mebo; ⁴⁶ Abo bayoinka mumapenzi atamani, pele baluleme mu bumi butamani.