¹ Ino umwi mwalumi wezina lya Ananiyasi, O mwanakazi akwe Safira, bakauzya cibela cholubono, ² okusisa mali amwi ngiba kauzya (mwanakazi akwe awe walizi), pawo waketa cimwi cibela ca mali okuzo abika ku maulu abapostola. ³ Ponya Petro wakateti, ''Ananiyasi, kambo nzi Satani wazuzya moyo wako kuti ubeje ku Muuya Usalala kusisa mali amwi nguwa kauzya cibaka? ⁴ Niwatalina kuchuuzya, cibaka cali chako, ponya nicha kauzigwa, Sicalinsi munguzu zyako? Kambo nzi wayeya cho mushobo oyu mumoyo wako? Takwe niweena bantu, kono weena Leza.'' ⁵ Kumvwa buyo majwi aya, Ananiyasi wakawida ansi okuyeka kamamanino, pawo buyofu bupati bwaka bawida boonse bakacimvwa. ⁶ Bakubusi bashimani bakaza kunembo okumuvungaila, pawo bakamunyamuna okuyo muzika. ⁷ Nikwakainda buyo mbuli ma woola otatwe, mwanakazi akwe awe waka njila, katazi cha citikide. ⁸ Petro wakati kuli nguwe, ''Ndambile aya na nga mali ngimwa kauzya cibaka.'' Pawo wakati, ''Iyi, ngangawo.'' ⁹ Poonya Petro wakati kuli nguwe, ''Kambo nzi mwazumizyanya kuti musole Muuya wa Leza? Langa, maulu abaalumi baku zika mulumi- ako ali a mulyango, ayibo balakunyamuna okukutola.'' ¹⁰ Muciindi ciya conya wakawida ansi ku maulu a Petro okuyeka kamamanino. Bakubusi nibaka njila buyo mukati, bakajana ulifwide, pawo baka mubweza okuyo muzika kumbali omulumi akwe. ¹¹ Kuyowa kupati kwakaza a chikombelo ape ali abo boonse bakamvwa ezi zintu. ¹² Zitondezyo zinji amalele zyali kucitika akati ka bantu kwindila mumanza abapostola. Boonse bali antomwi mukota lya Solomoni. ¹³ Kono takwe naba omwi bali anze bajesi nguzu zyo kuvwanana ambabo; nekuba namu, bantu bali ku batembaula. ¹⁴ Bashomi banji baka yungizizigwa kuli Leza, mambunga abalumi abanakazi, ¹⁵ mane kusikila bali kweta balwazi mutuzila- zila okuno balazikide mumalo omu miseme, kutegwa Petro ainda, muzuzumbi wakwe ninga wabawida bamwi. ¹⁶ Ape kwakaza antomwi mbunga yabantu kuzwa muminzi izyungulukide Jerusalemu, kabeeta baciswa ape abaya bapenzigwa e -myuuya mibi, pawo bakapona boonse. ¹⁷ Pele mupaizi mupati waka nyamuka, abaya boonse mbali ambabo (kokuti cibela ca ba Sadduki); ponya bakazuzigwa munyono ¹⁸ oku bika maanza abapostola, oko bajalizya mu ntolongo i zibinkene. ¹⁹ Kakuli ciindi ca masiku mungelo wa Leza wakajula zitendele zye ntolongo oku bagwisya, okwamba kuti, ²⁰ ''Kamuya, mukaime mu tempele okwambola ku bantu majwi obuumi obu.'' ²¹ Nibakamvwa echi, bakanjila mu tempele nibwali kucha okwisya. Mupaizi mupati wakaza, abaya mbali ambabo, okwita nkamu yabendelezi antomwi, boonse baalu ba bana Iziraeli, batumine ku ntolongo kuti bapostola bakaze. ²² Kono balanga ntolongo bainkide takwe nibaka bajana muntolongo, pawo baka piluka oko balungulwida, ²³ ''Twajana ntolongo ili jalidwe kabotu aba lindizi balimvwi amulyango, kono nitwa zoijula, takwe ngutwajana mukati.'' ²⁴ Ino mupati- pati we tempele abapaizi bapati nibakamvwa majwi aya, baka komokwa kujatikizya mbabo mbuli mbucikonzya kuba. ²⁵ Pawo umwi muntu wakaza oku zobambila, ''Balumi mbimwabika mu ntolongo balimvwi mu tempele okunoisya bantu.'' ²⁶ Mpoonya silumamba mupati wakainka antomwi aba silumamba, oko bapilusya, kono kakutakwe kulwana, kambo bali kuyowa kuti inga bafuswa mabwe. ²⁷ Nibaka beeta, baka baimika kunembo lya bendelezi. Mupaizi mupati wakababuzya, ²⁸ kateti, ''Twakamulailila kuti mutanoisi muzina eli, ponya nywebo mwazuzya Jerusalemu okwisya kwenu obuyandisi bokweta bulowa boyu mwalumi ali swebo.'' ²⁹ Kono Petro abapostola bakataba kuti, ''Twelede kukuteka Leza kwiinda muntu. ³⁰ Leza wama tata waka busya Jesu, oyo ngumwaka jaya kwindila muku mwanzika a cisamu. ³¹ Leza waka musumpula ku jaanza lyakwe lye chilisya kuti abe Mwana omwami ape o Mufutuli, kupa kwempwa kubana Izraeli, oku jatilwa kwe zibi. ³² Tuli bakamboni be zintu ezi, mbuli mubede awe Muuya Usalala, oyo Leza ngwakapa kuli abo bamukuteka. ³³ Bendelezi nibakamvwa namu, chaka bacisa kumoyo okuyanda kujaya bapostola. ³⁴ Kono mu Farisi wezina lya Gamalieli, mwiiyi wo mulawo oyo waliku kutekwa abantu boonse, wakaiminina oku lailila kuti bapostola batolwe anze kaindi kanini. ³⁵ Pawo wakati kuli mbabo, ''Nobalumi ba Iziraeli, amuchenjele kuli chomuli kukanza kucitila bantu aba. ³⁶ Kambo mazuba ainda, Thiudasi wakanyamuka kalilia kuba umwi, pawo bantu banji, ku myanda yone bakaza ku cibela chakwe. Wakajaigwa, ponya boonse bali kumuchilila baka mwaikana kumaninina. ³⁷ Nikwakainda oyu mwalumi, Judasi oku Galili wakamvwika mumazuba okubala bantu oku zulwida banji. Awe waka nyonyoka, abaya boonse bali kumukuteka baka mwaikana. ³⁸ Ino ndamba kuli nywebo, amu tantamuke ku balumi aba oku baleka abalike, kambo kuti na aya makanze na mulimo ngwa bantu, iyo mwaisigwa. ³⁹ Kono kuti na njiya Leza, takwe nimuyokonzya kuba mwaisya; mane muyo jana kuti muli mukulwanisya Leza.'' Pawo bakamvwida. ⁴⁰ Mpoonya baka baita bapostola mukati oku bauma ponya oku balailila kuti bata chamboli muzina lya Jesu, okubaleka bainke. ⁴¹ Bakasiya nkamu yabendelezi kaba nonenidwe kuti baka balwa kwelela kupenga kuta kutekwa akambo ke Zina. ⁴² Mazuba woonse, mu tempele omumaanda, bakaindilizya kwiisya oku kambauka makani mabotu kuti Jesu ngu Kristu.