¹ Awo Petro O Joni nibali kwambola kubantu, bapaizi mwendelezi we tempele ama Sadduki bakasika ali mbabo. ² Baka pengana loko kambo Petro O Joni bali kwisya bantu okwamba kubuka kwa Jesu kuli bafwide. ³ Baka bajata oku babika muntolongo kusikila mafumina aka chilila, mukubona kuti kwali ku jolezya. ⁴ Kono bantu banji bakamvwa mulumbe bakashoma; omweelwe wabalumi bakashoma wali kusika ku myanda yosanwe. ⁵ Chakacitika mubuzuba bwaka chilila kuti baleli babo, amalu, abalembi bakabungana antomwi mu Jerusalemu. ⁶ Annasi mupaizi mupati waliwo, Kaifasi, O Joni, Alexanda, abo boonse bali bomukowa omupaizi mupati. ⁷ Nibaka babika Petro O Joni akati kabo, baka babuzya, ''Kwindila munguzu nzi na zina nzi, mumwacita ezi?'' ⁸ Pawo Petro, kazwide muuya usalala, wakati kuli mbabo, ''Nywebo nobaleli babantu, amalu, ⁹ kuti tuli muku zekisigwa sunu akambo komulimo mubotu wacitwa ku mwalumi mulwazi, enzila njaponisigwa, ¹⁰ akuzibwe kulinywe noonse oku bantu boonse ba Isilayeli kuti oyu muntu waima kunembo lyenu kali aseba zibotu muzina lya Jesu Kristu oku Nazareta, oyo ngumwaka bambula, pele we Leza ngwakabusya kuzwa kubafu. ¹¹ Jesu Kristu ndibbwe elyo nywebo nobayaki ndimwaka sampaula kono ino lyaba ndyebbwe liyandikana. ¹² Takwe lufutuko muli umbi muntu, kambo takwe zina limbi kunsi E julu lipedwe akati kabantu mbutwelede kufutulwa.'' ¹³ Pawo nibakabona chamba ca Petro O Joni okwibaluka kuti bali bantu buyo, balumi batayide, bakakomokwa, nibakaziba kuti Petro O Joni bali O Jesu. ¹⁴ Kambo bakabona mwalumi wakaponisigwa kaimvwi ambabo, ponya baka bula chokwamba. ¹⁵ Ino nibakalailila bapostola kuti bazwe mumuswangano wabendelezi, bakalyambozyanya muli chabo. ¹⁶ Bakati, ''Tulachita nzi kuli aba balumi? mukasimpe mukuti cintu cipati chachitwa muli mbabo chazibwa kuli oonse ukala mu Jerusalemu; tatukonzi kuchikaka. ¹⁷ Ino kuti kambo katainki kunembo akati kabantu boonse, atubachenjezye kuti batachambi limbi kuli oonse muzina eli.'' ¹⁸ Ponya baka baita oku balailila kuti balekele cimo kwamba na kwiisya muzina lya Jesu. ¹⁹ Ino Petro O Joni bakataba okuti kuli mbabo, ''Kuti na chibotu ku menso a Leza kumvwida nywebo kwinda nguwe, amuyatule nobeni. ²⁰ Tatukonzi kuleka kwambola a zintu zitwakabona okumvwa.'' ²¹ Nikwakamana kucenjezigwa kunji kuli Petro O Joni, baka baleka kuti bainke. Bakabula kambo koku bapeda cisubulo, kambo kokuti bantu boonse balikulumbaizya Leza kuli chakacitika. ²² Mwalumi oyo wakacitwa malele aya okuponisigwa walindide kale myaka ili makumi one. ²³ Nibakalekwa buyo, Petro O Joni bakabweda kubenzinyina, okubalungulwida zyoonse zibaka bambila bapaizi bapati abaalu. ²⁴ Nibakamvwa buyo, bakongolola chomoyo omwi kuli Leza okuti, ''Mwami, wakalenga julu enyika O lwizi, ezyonse zili mumo mukati. ²⁵ Wakamba O Muuya Usalala kwindila kumulomo wo muzike wako, tata esu Davida, 'Kambo nzi nchibatingilala ba simasi, abantu bayeyela nzi zyo buyo?' ²⁶ Wakamba, 'Bami bansi bakaza antomwi, abendelezi bakabungana antomwi kulwanisya Leza, ape O Kristu wakwe.' ²⁷ Kasimpe, bonse bobile Herodi O Pontiasi Pilato, antomwi aba simasi abana Israeli, bakali bunga antomwi mumunzi oyu kulwanisya muzike wako Jesu oyo usalala, nguwaka nanika. ²⁸ Bakalibunga antomwi okucita echo janza lyako oluyando lwako mbuli mbuwaka zikanza kuzocitika. ²⁹ Ino, O Mwami, langa akucenjezya kwabo okupa babelesi bako bambole jwi lyako chokutayowa. ³⁰ Vungununa janza lyako kukuponya okupa zitondezyo amalele kwindila muzina lyo muzike wako usalala Jesu.'' ³¹ Nibakamana kukomba, busena mubabungene bwaka zunganisigwa, poonya boonse baka zuzigwa O Muuya Usalala pawo bakambola jwi lya Leza chokuta yowa. ³² Mbunga inji yabo bakashoma yali O moyo omwi omuuya. Takwe muntu akati kabo walikwamba kuti zintu zyejesi nzizyangu endike, pele zyonse zyali zyabana muleya. ³³ Munguzu zipati bapostola bali kulungulula bumboni bwabo abubuke bwa Mwami Jesu, pawo luzyalo lupati lwali alimbabo boonse. ³⁴ Kakutakwe muntu akati kabo wali kukonzya kubula cintu nichiba comwi, kuli boonse bajesi maanda e myuunda baka zyuuzya okweta mali kuzwa kuzintu zyaka uzigwa ³⁵ okwabika ku maulu abapostola, pawo akaabwa kuli umwi oumwi mbuli mwakabulide. ³⁶ Ino Josefa, oyo bapostola ngubali kwita kuti Barnabbasi (kokwamba kuti Mwana Udiisya), mu Levi, uzwa kunyika yoku Syplusi, ³⁷ wakauzya muunda ngwajesi pawo wakeeta mali okwabika kumaulu abapostola.