¹ Pele amuzibe eci kucindi camamanino kuyoba zindi zikatazya. ² Kambo bantu bayoba basikuliyanda lwabo beni, basikuyanda mali, kulivuna, kulisampula, basikutukana, batalemeki kubazyali, batalumbi, abatasalali. ³ Bayobula cintu cijisilide, batayandi kulekelela, basikubejelezya, batakwe kulijata, basikulwana, batayandi zibotu. ⁴ Bayoba basikutama, basofwazyi, basikulikankaizya, bayandola kusana kwinda kunonezya leza. ⁵ Bayoba ecimo co buleza, pele bayokaka nguzu zyabo, amutantamuke kubantu aba. ⁶ Kambo bamwi babo mbalumi banjila mumanda oku bweza banakazi bafubafuba aba mbabaya banakazi ba zwide e zibi ape balaendelezigwa ezimwi zintu zindene. ⁷ Abanakazi cindi cense balaiya, pele takwe nibakonzya kuza kukuziba zyamasimpe. ⁸ Munzila njonya eyi Janisi o Jambolosi, bakamusandukila Mozesi aba basikwiya babeji ape ba sandukila kasimpe. Mbalumi balamiyeyo mibi ape kwindila mulusyomo bakaziba kuti mbabeji. ⁹ Pele takwe kwatabaye kule. Kambo bufuba fuba bwabo buyoboneka kuli bense, mbonya mbuli baya balumi. ¹⁰ Pele mbuli nywebo, mwakacilila kwisya kwangu, micito mizezo, lusyomo, kupenga cindi, luyando, kulicesya. ¹¹ Kusampulwa, kupenga, ape ecakacitika kuli mebo ku Antiyoki, Ikoniyumu, oku Lisituka. Ndakazumanana mukupenzigwa. Kulezi zyense mwami wakandifutula. ¹² Kufumbwa abo bayanda kupona munzila leza muli kilisito Jesu bayo penzigwa. ¹³ Bantu babi abasinganga bayoinka ku bubi okwindilizya, kutondezya bamwi bubi okubatola ku bubi. ¹⁴ Pele kuli nywe, amukalae muzintu zimwakaiya okuyama kulusyomo. ¹⁵ Mulizi kuli oyo ngumwakaiya. Ulizi kuti kuzwa kubunini wakaziba malembe asalala. Ezi zila konzya kukucita kuba musongo ku lifutuko kwindaila mulusyomo muli kilisito Jesu. ¹⁶ Ense malembe akalembwa o leza. Alempindu mukwisya zinvwika, kukusendulula, okwisya munusalali. ¹⁷ Eci camba kuti muntu munaleza welede kuba mubotu, ulibambilide kubeleka mulimo mubotu.