¹ Kumaninina, nobakwesu, twakumbila cokumaninina kulinwe okumusumpula muli mwami Jesu. Mbuli mbumwakatambula malalile kuzwa kuliswe mbuli mbumwelede kwenda oku botezya Leza, munzila njonya yokwenda, kutegwa mucite namuya olo kwinda. ² Kambo mulizi milawo njiwakamup kwinda muli mwami Jesu. ³ Kambo olu nduyando lwa leza , kusalala kwenu, kuti mukako buhule, ⁴ Kutegwa umwi oumwi wenu ulizi kuziba kuba amwanakazi wakwe mwini cakusalala ecokulemeka, ⁵ Kutainsi mukuyandisisya zisuzi zibi mbuli bamasi batamuzi Leza. ⁶ Kutabi muntu utyola nokuba kucitila mwenzinyina cibi munzila njonya eyi. Kambo mbotwaka wambila kale okumulungulwida. ⁷ Kambo Leza takwe nakatwita kutasalala, pele kukusalala. ⁸ Kambo kako, oyo ukaka eci takaki bantu, pele Leza upa muya wakwe usalala kulinwe. ⁹ Likute kuluyando lomubunyina , tamukwe ndaba kufumbwa kumutembela, ¹⁰ kambo kenu nobeni mwaisigwa o Leza kuyanda umwi oumwi. Loko, mulacita namuya kambo ka bakwesu bense bali mu makedoniya. Pele tulamusumpula, nobakwesu kucita eci olo kwinda. ¹¹ Tulakusumpula ape kumupa kukala cokumunizya, kubabalela zintu zyense zimwelede kucita, okubeleka amanza enu, mbuli mbutwa kamwambila kale, ¹² Kutegwa mukonzye kwenda kabotu kunembo lyabantu banze okutambula cimwi cintu. ¹³ Tatuyandi kuti muswane, nobakwesu, kujatikizya abo baona, kutegwa mutalili mbuli bamwi, batakwe bulangzi. ¹⁴ Kambo na twasyoma kuti Jesu wakafwa okubuka ape, mponya Leza uyoeta o Jesu abo bakaona mulinguwe. ¹⁵ Kambo eci twamba kulinwe ejwi lya mwami, kuti swebo totupona, basidwe okuza kwa mwami, ncozyo tatukoinka kunembo lyabo bakaona. ¹⁶ Kambo mwami nguwenya uyo seluka kuzwa kujulu. Uyoza okongolola, ejwi lya bangelo, omwembo wa Leza, abafwide muli kilisito bayobuka kusanguna. ¹⁷ Mponya swebo totupona, totwakasyala, antomwi ambabo tukaswanane mumayoba kuswana mwami muluwo. Munzila eyi njonyina tuyoba omwami cindi conse. ¹⁸ Kambo kako, amumbulizyane umwi oumwi jwi aya.