¹ Ku Mafalisi mono kwi kala o munu no isaniwa Nekudema, neli naye nduna mu mushobo no Majuda. ² Nekudema mwana wiya kwa Jesu e nako no usiku na ku wiya kwamba ngao, ''Muluti, twa limuka ngao o muluti wa ku panena kwa Mulimu, ka kuli njeko wa ku twesa ku tenda e isupo otha na ku tenda aiba ndi Mulimu kali naye kao.'' ³ Jesu keo o mutambula ngao, ''Niti, niti, ku mona ndi munu ona kana kwelekiwa sinja, ka twese ku ka mona o mubuso wa Mulimu kao.'' ⁴ Nekudema keo o mwambela ngao, ''Kandi munu a twesa ngepi kwelekiwa kame ku mona ona mana ku kula? Ngao mwa ukela kame mu libumo lya inawaye na kwelekiwa kawili, kwa twesala ngeyo ndi?'' ⁵ Jesu keo o mutambula ngao, ''Niti, niti, namba ngao kumona munu ona kana kwelekiwa na meyu na mepo, keo ka twese ku ke ngena mu muso wa Mulimu kao. ⁶ Sa kwelekiwa ku nyama naso nyama, kame siya sina elekiwa ku mepo naso mepo. ⁷ Kona komoka apa ni kwambela ngao, 'Mwa swanela kwelekiwa sinja.' ⁸ E mepo tha kuyela oku thi wapela; kame wa yuba o mulumo watho, kono ko limuka oku thi tundela kapa kutha kao. Kwa feka ngeyo na munu yoshe oyu elekiwa ku mepo.'' ⁹ Nekudema keo o alaba ngao, ''Eyo eni mo itendala ngepi?'' ¹⁰ Jesu keo o alaba na ku mwambela ngao, ''Owe o muluti wa Isislaele, kono ko yubisisa eyi inu kao? ¹¹ Niti, niti, na kwambela ngao, twambaula esi tu limuka, mane kame twapa upaki wesi tuna mono. Kono ko mwitana eyi no upaki wetu kao. ¹² Ku mona mu kana kwitana apa ni miambela eyi no pano pa kaye, keo mo mwitana ngepi eni apa ni miambele eyi no ku wilu? ¹³ Njeko oyu no kambama ku wilu keti oyo no tuluka ku wilu---- oye o mwana munu. ¹⁴ Wetini muya Mushe na tulekela e liyoka ku wilu mu liyungu, kona kuli na mwana munu naye a swanela ku yoyoliwa na ku tulekiwa ngeyo, ¹⁵ ngao anu oshe etana mu lithina lyaye nga wane moyo. ¹⁶ Ka kuli Mulimu mwana wapela a kaye yonene, mane keo o kapa mwanaye yofochi, ngao yoshe o munu tamba kwitana mu lithina lyaye kanafa kono nga wane moyo wa ku yoya ku twalela. ¹⁷ Ka kuli Mulimu no imwa ku tuma mwanaye mu kaye ngao a wiye kwatula a kaye, kono ngao a kaye ngo ka wane kuyoisiwa o kwaye. ¹⁸ Yoshe oyu itana mu lithina lyaye ka yatuliwa kao, kono oyu kana kwitana mu lithina lyaye oye ona atuliwa kale ka kuli ona kana kwitana mu lithina no mwana yofochi wa Mulimu. ¹⁹ Eli lyo libaka no katulo: E liseli mono li wiya mu kaye, kono anu mwana wapela e lififi kupita e liseli ka kuli e mitendelo tho tha sibi. ²⁰ Ka kuli munu yoshe wa ku tenda sibi wa ku ku thimba na liseli, kame ka wiyanga ku liseli kao, ngao e mikaelo thaye ko thina bumbuka. ²¹ Shiwa ngao, yoshe o munu o tundamena ku tenda eyi no niti mwa wiya ku liseli ngao ku monale siwana ngao e mitendelo thaye tha ku tendela kwa Mulimu.'' ²² Ku tundapo, Jesu na lutiwa aye keo atha mu litunag lya Judea. Omo no ke malamo noo maiwa mangi kanyonyo mane keo oka kalisa ku kolobetha. ²³ Apo Joani naye mwanatha na ku kolobetha mu Enoni mu pepi na Salimi ka kuli a meyu neli mangiko. Anu mwanatha na ku wiya o kwaye mane keo otha na kwa kolobetha, ²⁴ ka kuli Joani apo kale no imwa ku pakiwe mutolongo. ²⁵ Keo ku kwinguka likañi mu kachi no a lutiwa a Joani na Mujuda o mweya pa siambo no ku ku kenisa. ²⁶ Na wiya kwa Joani na ku wiya ku mwambela ngao, ''Muluti, o munu oya no ikala naye mu shambwaliya wa Jordani, oyo notha na kupa o upaki waye, o mone,seli naye a kolobetha, mane o ungi no anu a pwela o kwaye.'' ²⁷ Joani keo o tmbula ngao, ''Munu ka twese ku ku shimbela simweya kao keti aiba ndi mwana sipiwa ku tunda ku wilu. ²⁸ Mwofochi mwa twesa kwanuka ngao mono ni amba ngao, 'Kome no Kreste kao; kono, 'mo ina tumiwa poso thaye.' ²⁹ Oyu kwite oyu no ku lama yonyiko omu lami. Pano eni ku mona o mwonyi noyu no ku lama, o nemana na ku mu yuba yo kuwa, mwa wapela yonene kabakala e lii lyaye. Aka, keo , konyiko aka wapethi kange kana kumekiwa.. ³⁰ Oye a swanela ku pafuka, kono ome na swanela ku pupuka. ³¹ Oye o tunda ku wilu yonyiko oli peulu no a kwaye oshe. Oyu tundela mu kaye oye wa muno mu kaye kame ambaula weti wa muno mu kaye. Oyo tuda ku wilu oye e kala peulu no anu oshe. ³² Apakulanga eyo ana mono na ku yuba, kono ko mwitana o upaki waye kao. ³³ Oyo itana o upaki waye etqna ngao Mulimu kandiwa sikuma. ³⁴ Ka kuli o munu oyo Mulimu na tuma ambaulanga a mai a Mulimu. Ka kuli Mulimu ka mupa e mepo kwelela kao. ³⁵ O Iwa munu a wapela mwana mane ona e inu yoshe mu likaa lyaye. ³⁶ Oyu eni o itana mu lithina lya mwana munu mwa wana moyo wa ku yoya ku twalela, kono oyo shwaula o mwana munu komba wana kuyoya kao, kono oungu wa Mulimu mo umu tomana.''