¹ Apa Jesu na lemuwa ngao a Mafalisi a na yubu ngao a tenda na ku kolobetha a lutiwa angi kupita Joani, ² (Shiwa ngao Jesu oye no imwa ku kolobethanga, kono mwana sebeisanga a lutiwa aye), ³ no funduka ku tunda mu Judea na ku ku thika kame ku Galilea. ⁴ Kono no ku konala ngao a pite tha Samaria. ⁵ Keo o wiya ku pita mu munthi u mweya no minthi tha Samaria, no wisaniwa Sikere, owo nou kwaata na silwa sa Jacobo eso napa mwanaye Josefa. ⁶ E lisima lya Jakobo lya waniwa omo. Jesu mwana yuba mabote kabakala o mweendo mane keo o wiya ku tomana ku nyonga na lisima. Neli mono thi piluka nako tha mwinonga. ⁷ O mukathi no mu samaria keo o wiya ku beta meyu, mane Jesu keo o mwambela ngao, ''O nipeko meyu a kunwa.'' ⁸ Ka kuli apo a lutiwa aye mwana ku thela mu tolopo ku ka ula ya kulya. ⁹ Keo o mukathi no mu Samaria o mwambela ngao, ''Kwa konala ngepi ngao, owe o mujuda, keo wa lomba, ome ku piluka mukathi wa mu Samaria, meyu a kunwa?'' Ka kuli a Majuda ka kwite wonyi na Masamaria kao. ¹⁰ Jesu keo o mwalaba na ku mwambela ngao, ''Nga wa limuka e mpo tha Mulimu, ngao thonyiko thino thi ku lomba ngao, ''Onipeko meyu,'' nga ona mu lombo, mane ngo ona kupu a meyu no moyo no ku yoya.'' ¹¹ O mukathi keo o mwambela ngao, ''Mulena, ko kwite sibetiso kao kame eli lisima lya ku noña. Kupi eni oku kwite a meyu a yoisa? ¹² Ko mukulu kao, ndi ngepi, ku pita iwetu Jakobo, oyu no tupa eli lisima mane na ku nwenamo oye yoñene, ku paka pa mweya na anaye na iyamana yaye?'' ¹³ Jesu keo o mutambula na ku mwambela ngao, ''Munu yoshe onwa kwaa meyu mwafa liwila kame, ¹⁴ kono oyu nwa ku meyu a ni tamba ku mupa kafu liwila kao. Kona kuli, a meyu ni tamba ku mupa mwa piluka liwelu welu o kwaye, ku sika ku twala ku moyo no kuyoya ku twalela.'' ¹⁵ O mukathi keo o mwambela ngao, ''Mulena, o nipe ao meyu ngao ko ina yubanga liwila na ku wiya ku betanga meyu.'' ¹⁶ Jesu keo o mwambela ngao, ''O the, o ka isane mu kwanthu woye, mu ka wiye kuno.'' ¹⁷ O mukathi keo o alaba na kwamba ngao, ''Koni kwite mulume kao.''Jesu keo omu tambula ngao, ''Wamba uniti, 'Kandi ko kwite mulume kao,' ¹⁸ ka kuli mono kwatanga a lume mutanu, mane o mulume oyu kwite ngeno ka mukwanthu woye kao. Eyi onamba ya niti.'' ¹⁹ O mukathi keo o amba ngao, ''Mulena, ina mono ngao kandi o mupolofita. ²⁰ Aka nyakulyetu mwana lapeelanga palino lilundu, kono owe ngeno wamba ngao Jerusalema so nyiko e sibaka anu a swanela ku lapelela.'' ²¹ Jesu keo o ambela o mukathi ngao, ''Oni yubisise, woyu mukathi, ngao e nako theya apa mbo mu lapela Tate ku piluka pano pa lilundu kapa mu Jerusalema. ²² Mwa tha na ku lapela esi mu kana ku limuka. Otwe twa lapela esi tu limuka, ka kuli o ku yoisiwa kwa wiya kabakala a Majuda. ²³ Kono shiwangeyo, e nako tha wiya, mane seli thina kumu, apo a lapeli no niti mba lapela Tate na mepo na niti, ka kuli Tate atha na ku saela anu no ngeyo ku piluka aku mu lapela. ²⁴ Mulimu mepo, mane nanu ao a mulapela a swanela ku mulapela mu mepo na mu niti.'' ²⁵ O mukathi keo o mwambela ngao, ''Na limuka ngao Mesia a wiya (oyu isaniwa Kreste), Apa kuma, mwa wiya ku tu tolokela e inu yoshe.'' ²⁶ Jesu keo o mwambela ngao, ''Ome yonyiko Kreste, ome emwa ni ambaula o koye pano.'' ²⁷ Mwetho nako a lutiwa aye na kaukuluka. Mwana ku komokela ngao atha na kwambaula na mukathi, kono njeko oyu no amba ngao, ''Wa saela ike?'' kapa ''Ike apa o ambaula naye?'' ²⁸ Kona kuli o mukathi keo o siya a kaula kaye, ku tha ku munthi, na ku kambela anu ngao, ²⁹ ''Mu wiye, mu mone o munu ona ni tonwele yoshe e inu no nitha na ku tendanga. Oyu mwendi yo Kreste, ka mwendi?'' ³⁰ Na siya o munthi na ku wiya o kwaye. ³¹ Mu ka nako kanyonyo, a lutiwa aye na mu shwelela, kwamba ngao, ''Muluti, olye.'' ³² Kono oye keo o ambela ngao, ''Nikwite sa kulya eso mu kana ku limuka.'' ³³ Kona kuli a lutiwa aye keo a ku yewetela ngao, ''Kwali munu oyu na mu letele sa kulya, kwali ndi?'' ³⁴ Jesu keo o ambela ngao, ''E silya sange sa kwamba ngao ni tende e tato thoyo no ni tuma mane na ku manisa o musebethi waye. ³⁵ Kandi ko mwamba ngao, 'Kwi sialela makwethi mane ku twala apo oku chola mbo ku ka tatekela kao? Na mi ambela ngao, mu nanule a meo enu mu topele e ilwa omu imonalela, ka kuli seli ya monala kwimva ku shenyena ngao i choliwe! ³⁶ Oyo tamba ku chola mwa piwa muputho kabakala o musebethi waye kame e yuyanu mwa i wanathekela ku moyo nombula kupwa, ngao o mu kuni no mbuto na mu choli nga kinene pa mweya. ³⁷ Ka kuli po nyiwo kwambiwa niti ngao, ''O mukuni wawo, na mu choli wawo; ³⁸ Mo ina mi tumu ku ka chola e ilya eyo no mu kana ku sebetha. A kwenu o nyiko na isebethe, kono omwe mu nengene mu muesbethi no akwenu.'' ³⁹ O ungi no Masamaria mwowo munthi na tateka kwitana ya Jesu kabakala o mwambelo woyo mu kathi nopa o upaki ngao, ''Jesu mwana ni ambele e inu yoshe no nitha na ku tendanga.'' ⁴⁰ Kona kuli a Masamaria apa na wiya o kwaye, mwana mulomba ngao ai kale no weli, popo keo o tomana no pa maiwa meli. ⁴¹ Angi kame na eketha kwitana kabakala a mai aye. ⁴² Na wiya mane kwambela oyo mukathi ngao, ''Pano ko tu twese ku kanana kao kabakala iya no twambela, ka kuli twofochi tuna ku yubele, mane kame tuna limuka ngao Jesu yonyiko o tamba ku yoisa kano kaye.'' ⁴³ A maiwa meli apa na pwa, Jesu keo o ku thika ku Galilea. ⁴⁴ Ka kuli Jesu yoñene mwana amba kale ngao mupolofita ka kutekiwa mu sibaka esi a elekiwa kao. ⁴⁵ Apa na kuma mu Galilea, anu no mu Galilea na mwa mweela yonene. Mwana ku mweena e inu yoshe Jesu natha na ku tenda mu Jerusalema pa mukiti, ka kuli nao mwana ke kala kwowo mulkiti. ⁴⁶ Jesu mwana ka ku thika kame mu Kana wa Galilea, omo na pilula a meyu kwatenda veine. Mono kwikala nduna mu Kapernauma oyo mwanaye neli mukuli. ⁴⁷ Apa na yuba ngao Jesu ona kauka ku tunda ku Judea ku wiya mu Galilea, no thela Jesu na ku ka mulomba ngao nga a shelumuke na ku ka yoisa mwanaye, oyo monala kufa. ⁴⁸ Jesu keo o mwambela ngao, ''Kumona muna kana ku mona isupo na ipilimeka, keo ko mwitana kao.'' ⁴⁹ Oyo nduna keo o mwambela ngao, ''Mulena, o shelumuke wangu pano kale mwanange ana kana kufa.'' ⁵⁰ Jesu keo o mwambela ngao, ''Othe. Mwanoye a yoya.'' Oyo mulume keo o yubisisa e lii elyo Jesu na mwambela, mane keo o funduka. ⁵¹ Apa natha na ku shelumuka, a pika aye keo a mwangana, kuno atha na kwamba ngao mwanoye ona yoyo. ⁵² Keo o ipula ngao nako mwike etho mwanaye ana monala ku yoya. Na mu tambula ngao, ''Neli lingola e nako no mwinonga apa na tenekele o kwimva o lutu.'' ⁵³ Kona kuli Iwaye keo o anuka ngao neli pa thiya nako Jesu na mwambela ngao, ''Mwanoye a yoya.'' Kona kuli oye yoñene na oshe e kala mu nthuwo thaye na itana ya Jesu. ⁵⁴ Esi sonyiko e sisupo no wili eso Jesu na tenda apa na tunda mu Judea kutha mu Galilea.