¹ Mu liwa no watu, mono kwi kala mukiti wa ku lama mu Kana wa Galilea, mane na inawa Jesu mwane kala kwowo mukiti. ² Jesu na lutiwa aye nao mwane saniwa kwowo mukiti no ku lama. ³ Apa o veine napwa, inawa Jesu keo o mwambela ngao, ''Ana mana o veine.'' ⁴ Jesu keo o mwambela ngao, ''Owe mukathi, ike apa o wiya o kwange? E nako thange kale kotha ikuma kao.'' ⁵ Inawaye keo o ambela a pika ngao, ''Soshe eso a mi ambela, ngo mu sitende.'' ⁶ Mono kwi kala mapoto 6 a mawe a ku pakanga meyu ao na tomekiwa ku sebeisiwa ku Majuda aku kushela pa mikiti, thi mweya mono thi kwelela na maemele meli kapa matu. ⁷ Jesu keo o ambela ngao, ''Mumbise ao mapoto na meyu.'' Kona kuli keo a sela kwa umbisa keti ku yupauka na pa milomo. ⁸ No ambela a pika kame ngao, ''Mu panise ma mweya mu twaele o mutapi o mukulu no ilya.'' Keo a tenda ngeyo. ⁹ O mutapi no ilya o mukulu keo o etheka a meyu ao na piluka veine, kono no imwa ku limuka ngao a pana kupi (kono a pika na ka beta a meyu ao na limuka). Keo o isana o mulami ¹⁰ na ku mwambela ngao, ''Mulume yoshe mwa tateka kunwa o veine no kungupa weli pechi kunwa oyu nombula kwa ungupa ku mona ana pende. Kono owe mona buluka o veine no kungupa ku leta na ngeno.'' ¹¹ Esi so sisupo no utangi na tenda Jesu mu Kana wa Galilea, na ku monisa e kanya thaye, mane a lutiwa aye keo a tateka ku mwitaena. ¹² Ku tunda peyo Jesu, inawaye, a kulwaye, na lutiwa aye keo a shelumukela ku Kapernauma na ku ka tomanako pa maiwa manyonyo. ¹³ Kona kuli e paseka no Majuda mono thi kala pepi, na Jesu naye keo o kambamena ku Jerusalema. ¹⁴ Mwana kawana a ulisi no mapulu na angu na tungwilimba ana ipaka mu Tempele, mane na no ku chinja a mali kuno nao a natomana ngeyo. ¹⁵ Kona kuli no tenda mbafa tha siwepu na kwa chithela oshe panthi kwa tundisa mu Tempele, kupaka pa mweya na angu na ngombe thoshe. Mwana mwaa mwaa e miwaya waya thoshe no akwo ku chinja a mali na ku yumbana a matafule oo oshe. ¹⁶ Kwa no ku ulisa o tungwilimba mwana ambela ngao, ''Mu tundise yosheyo muno. Muteneke ku pilula e nthuwo tha Tate kuthi tenda musika.'' ¹⁷ A lutiwa aye na anuka omu no ku ñoleliwa ngao, ''O ku tiyela eyi no nthuo thoye yombo inilya.'' ¹⁸ Kona kuli a Majuda keo a muthekisa na ku mwambela ngao, ''Sisupo mwike esi tu monisa, apa ona tende eyi no ngeya?'' ¹⁹ Jesu keo oa tambula ngao, ''Mumbule ethi Tempele, mane mu maiwa matu ome keo moni thumba.'' ²⁰ A Majuda keo amba ngao, '' Ethi Tempele mono thumbiwa mu ilimo 46, kono owe mo thumba mu maiwa matu ambu?'' ²¹ Shiwa ngao, oye mwana toya e tempele no lutu lwaye. ²² Mu manyima apa nenguka kwafu, a lutiwa aye keo anuka ngao kandi mwana amba ngeyo, kame keo a itana neyi namba a mañolo mane na kwitana a mai ao Jesu namba kame. ²³ Apa natha ku Jerusalema ku mukiti no paseka, o ungi na kalisa kwitana mu lithina lyaye apa na mona e isupo natha na ku tenda. ²⁴ Kono Jesu oye no imwa kwa sepa ka kuli mwana limuka oshe, ²⁵ kame ka kuli no imwa ku saela munu yoshe ku mupa upaki wa munu, ka kuli oye mwana limuka eyi ili mushi tha munu.