¹ Nithangwe lache tsapano iwo wakukhala na Khilistu Yesu alibe kugaziwa. ² Nakuti chilamulo cha mzimu wa moyo mwa Khilistu Yesu chidanditsudzula ine kulamulo la bzakuipa na imfa. ³ Nakuti chomwe chilamulo chilibe kukwanisa kuchichita thangwe chidafooka mwa thupi, Mulungu adakwanisa. Iye adatumiza mwana wache muchiyezezero cha thupi la uchimo, na thangwe la uchimo kugazana na thupi. ⁴ Iye adachita ibzi kuti chakuikika chache chikakwanisiwe kuna ife, pamene ife tini famba lini ninga mwa thupi, soma ninga kufuna kwa mzimu. ⁵ Iwo omwe anikhala ninga mwa thupi ambaikha malingalilo yawo mubzinthu bza thupi, soma iwo omwe ali ninga mwa Mzimu ambaikha bzinthu bzawo ninga bza Mzimu. ⁶ Nakuti chisamalilo cha thupi ni imfa, soma chisamalilo cha Mzimu ni moyo na mtendere. ⁷ Thangwe lache chisamalilo cha thupi chidaipa kuna Mulungu, nakuti chimba kwanisa lini kuchilamulo cha Mulungu, poti chimba kwanisa lini kutelepoyo. ⁸ Iwo omwe ali kuthupi anga kwanise lini kukomedwesa Mulungu. ⁹ Pinango pense, imwe muli lini wa thupi soma mu Mzimu, chadidi penu Mzimu wa Mulungu unikhala mwa imwe. Tsono penu winango alibe Mzimu wa Khilistu, iye ali lini mwa iyeyo. ¹⁰ Penu Khilisitu ali mwa imwe thupilo ni lakufa thangwe la uchimo, soma mzimu niwa moyo thangwe la chilungamo. ¹¹ Penu Mzimu wa iye omwe udamukisa Yesu kuna wakufa unikhala mwa imwe, iye omwe adamukisa Khilistu kuna wakufa adzakupasani moyo m'mathupi yanu yakufa na Mzimu wache, omwe ukukhala mwa imwe. ¹² Thangwe lache, abele, ife tina mangawa, soma neye yale yathupi kukhala na moyo ninga mwa thupi. ¹³ Nakuti penu imwe munikhala moyo ninga mwa thupi, imwe munidzafa, soma penu na Mzimu munibzala bzakuchita bzache bzathupi, mudzakhala na moyo. ¹⁴ Ninga wense omwe anitsogozewa na Mzimu wa Mulungu, omwe ni wana wache wa Mulungu. ¹⁵ Imwe mulibe kutenga mzimu wa ukapolo kuti munga khale pomwe na mantha; soma mudatambila Mzimu waumwana, omwe ife tinikuwa nawo kuti, ''Abba, Baba!'' ¹⁶ Mzimu yekha adachita umboni pabodzi na mzimu wathu kuti ndife wana wa Mulungu. ¹⁷ Penu ife ndife wana, pomwepo pomwe pakupita m'nyumba, indem'yumba yache ya Mulungu. Ndife anyakupita naye pabodzi na Khilistu, penu ife tinibva bzakuwawa pabodzi na iye kuti tikatambile pomwe ulelmero pabodzi na iye. ¹⁸ Nakuti ine ndikuyesa kuti mazunzo ya nthawe ino yaku kwana lini kulinganiziwa na ulemerero bomwe bukudzawosewa kuna ife. ¹⁹ Nakuti chidikiliso chakulengiwa chimbachokera kubvumbulutso la mwanawa Mulungu. ²⁰ Nakuti chakulengiwacho chidagonjesewa kuupsilu, chakusaya kufuna mwene kechilo, soma thangwe la iye omwe adachigonjesa, nachidikiliso ²¹ kuti chakulengiwa chomwe chida tsudzuliwa ku ukapolo bwa chibvunde, nakupita mu ufumu bwa ulumelero bwa wana wache wa Mulungu. ²² Nakuti ife timbadziwa kuti chakulengiwa chense chimba buula nakuphatiwa na bzakuwawa ²³ Bzomwebzo lini bzokha, neye penu tekha, tinabzo bzipatso bzakuyamba bza Mzimu, inde ife pomwe timba buula mkati mwathu, nakudikira umwana bwathu, ndibzo bzakuombolera bza thupi lathu. ²⁴ Nakuti ife tidapulumusiwa nachidikizo chache. Soma chidikikizo chomwe chinioneka chili lini chidikizo neye. ²⁵ Nakuti achidikila mbani chomweiye akuchiona? Soma penu ife tinidikira chomwe tiku chiona lini, pomwepo ife tikudikirira na kupilira. ²⁶ Tsono pamwepa pomwe, Mzimu umbathandiza kufooka kwathu. Tsono ife timbadziwa lini kuti tinipemphera tani, soma Mzimu yekha ambati pempherera bzakuwawa bzathu. ²⁷ Iye omwe ambanyang'ana mtima ambadziwa bza Mzimu, thangwe iye amba pempherera wanthu wakuchena wa Mulungu ninga momwe Mulungu ambafunira. ²⁸ Ife tinidziwa kuti omwe ambakonda Mulungu, iwo na bzinthu bzense ambathandizana kuwachitira bza bwino, iwo ndiwo ambachemeriwa ninga mwakutsimikiza mwa mtima wache. ²⁹ Thangwe iwo omwe iye adawadziwa iye adawalamulilatu andendemeziwe na chindendemezo cha mwana wache, kuti iye akhale ninga mwana wache wakuyamba kuna adzinza azinji. ³⁰ Iwo omwe adawalamulilatu, awa iye adawachemera. Iwo omwe iyeadawachemera, iwowa adawayesa pomwe wakulungama. Na iwo iye adawayesa wakulungama, omwewa iye adawapasa pomwe ulemerero. ³¹ Nitani, tsono tidzachita tani, ife tingalewe tani bzinthu bzimwebzi? Penu Mulungu ana ife, mbani angatigaze ife? ³² Iye omwe alibe kutimana mwana wache soma adamupereka iye thangwe la ife tense, anilekeranyi iye kutipasa pomwe ife bzinthu bzense bza fovolo? ³³ Mbani adzalewera wakusankhiwa wa Mulungu? Mulungu ndiye m'bodzi wakulungama. ³⁴ Mbani m'bodzi mbaniadzawagaza? Khilisitu Yesu ndiye m'bodzi omwe adafa_ inde kwenekwene, iye omwe adamukisiwa_ iye omwe ali kuboko la madidi laMulungu, iye pomwe ambitikumbulila ife. ³⁵ Mbani adzitilekanisa ife na chikondi cha Khilistu? mazunzo, pinango kupanikiziwa mtima, pinango kusautsika, pinango njala, pinango usiwa, pinango bzakugopswa, pinango chisu? ³⁶ Ninga momwe bzidanembiwa, ''Thangwe la imwe tili kuphewa dzuwa lense. ife tidayesiwa ninga mabila yakuphewa.'' ³⁷ Mubzinthu bzensenebzi tikulakalaka kuna iye omwe ni m'bodzi ambatikonda ife. ³⁸ Nakuti ine ndakopeka mtima kuti penu ni imfa, penu pakhale moyo, penu mba angero, penu ni mafumu, penu bzikhale bzinthu bzilipo, penu ni bzinthu bzakubwera, penu ni bzamphamvu, ³⁹ penu pakhala pakutalika, penu pakhala pakuzika, penu pangapkhale chakulengiwa chili chense, chidza kwanisa lini kutilekanisa ife na chikondi cha Mulungu, chomwe chili mwa Khilistu Yesu Mbuya wathu.