¹ Tidzalewa chiyani pomwe? Tinichita bzakuphonya basi kuti chisomo chiwande? ² Nampodi kuterepoyo. Ife omwe ndife wakufa mu bzakuphonya, timdzakhala tani chikhalire momwemo? ³ Mumbadziwa lini kuti ife tense omwe tidabatiziwa na Mkhiristu Yesu tidabatiziwa mu imfa yache? ⁴ Tidafuchiliwa mthenje, pabodzi na iye na ubatizo kudzera mu imfa. Kuti ninga Mkhirisitu adalamusiwa kuna wakufa na ulemelero bwa Baba, telepoyo ife pomwe tifambe na moyo watsapano. ⁵ Nakuti penu ife timkhala wakuphatanidziwa na iye mchilinganiro cha imfa yache, telepoyo timdzakhala pomwe mchilinganilo cha kulamuka kwache. ⁶ Tikudziwa ichi, umunthu bwathu bwakale mudamanikiwa pabodzi na iye kuti thupi lakuphonyalo likadzongewe. Kuti ife nampodi tikhale anyabasa wa chakuipa. ⁷ Nakuti iye amene adafa adamasuliwa ku chakuphonya. ⁸ Tsono penu ife tidafa na Mkhilistu, tikukhulupilira kuti timdzakhala pomwe na moyo na iye. ⁹ Nakuti tikudziwa kuti Mkhilistu adalamusiwa kuna wakufa, amdzafa lini pomwe ; imfa idzakhala lini pomwe na ufumu pa iye. ¹⁰ Nakuti pakufa iye, adafa na kuphonya kabodzi kuna wanthu wense, Tsono, pakukhala iye na moyo, adakhala wamoyo kuna Mulungu. ¹¹ Nakutelepoyo, imwepo mubzilewengere imwe mwekha wakufa mu uchimo, soma wamoyo kuna Mulungu mwa Mkhiristu Yesu. . ¹² Thangwe lache nampodi kumbabvuma bzakuphonya kuchita ufumu pathupi lanu la imfa kubvera bzakufuna bzache . ¹³ Tsono nampodi kupereka bziwalo bzanu mu bzakuphonya, bzikhale bzida bzakusaya kulungama. Soma mubzipereke imwe mwekha kuna Mulungu ninga wamoyo adachoka mwa wakufa, na bziwalo bzanu kuna Mulungu bzikhale bzida bza chilungamo. ¹⁴ Nampodi kubvuma bzakuphonya bzichite ufumu pa imwe. Nakuti muli lini walamulo, soma wachisomo. ¹⁵ Chinango nchiyani? Timbaphonya thangwe tili lini pansi pa lamulo, soma pa chisomo? Nampodi kuterepoyo. ¹⁶ Mumbadziwa lini kuti mungabzionesera mwekha kuti ndimwe akapolo, ndimwe kapolo wa iye omwe mumbamubverayo? Ndimwe akapolo wa chakuphonya, chomwe chimbatsogolera ku imfa, ayai akapolo ku chakubvera, chomwe chimbatsogolera ku chilungamo. ¹⁷ Soma kutenda kukhale kuna Mulungu! kuti penu mudakhala akapolo wa chakuphonya, tsapano mwabvera makhalidwe yale ya chipfunziso chomwe mudaperekewa nacho. ¹⁸ Mwatsudzuliwa ku chakuphonya, apo mwakhala akapolo wa chilungamo. ¹⁹ Ndikulewa kuna imwe ninga munthu thangwera kulefuka kwa thupi lanu. Nakuti ninga imwe mudapereka bziwalo bzanu bzikhale kapolo wabzakuipa nakusaya kuyeruzika kuti bzichite kusaya kuyeruzika, inde telepoyo tsapano perekani bziwalo bzanu bzikhale akapolo wachilungamo, kuti bzikhale bzakuchena. ²⁰ Nakuti pomwe imwe mukhali akapolo wabzakuipa, mukhali anyakusaya kutumikira chilungamo. ²¹ Tsono mukhanabzo bzipaso bzanyi nthawe ire, bzinthu bzanyi bzomwe mukuchita nabzo manyazi tsapano? Nakuti chimaliziro cha bzinthu ibzi ni imfa. ²² Soma tsono pomwe mudatsudzuliwa ku chakuphonya nakukhala anyabasa wa Mulungu, muli nacho chakubala chanu chakufikira kuchicheneso. Na chimaliziro chache ni moyo wakusaya kumala. ²³ Nakuti mpfupo yache ya chakuphonya ni imfa, soma mphaso ya fovolo ya Mulungu ni moyo wakusaya kumala mwa Mkhirisitu Yesu Mbuya wathu.