¹ Nakuti tikutengiwa wakulungama thangwera chikhulupiriro, tina ufulu mwa Mulungu kudzera mwa Mbuya Yesu Mkhirisitu. ² Kudzera mwa iye tina mwayi wathu pomwe mchifundo ndicho taima, apo tikusamwira mchikhulupiriro cha ulemerero bwa Mulungu. ³ Mpsimwebzi lini bzokha, soma timkomedwa pomwe m'mazunzo. Nakudziwa kuti ife chizunzo chinchita chipiliro na chipiliro chinchita chizerewezi. ⁴ Na chizerewezi chinchita chidikhiriro, na chidikhiriro, ⁵ chikhulupiriro chimbachitisa lini manyazi thangwe chikondi cha Mulungu chatsanuliwa mmitima mwathu kudzera mwa Mzimu Wakuchena, omwe waperekiwa kuna ife.. ⁶ Nakuti pomwe tikhali chikhalire wakulefuka, pa nthawe yache ya Mkhiristu adawafera wakusaya kupemba. ⁷ Nakuti mpsakunesa wina kufera munthu wakulungama, napo pinango wina angafere munthu wabwino. ⁸ Soma Mulungu amtsimikiza kuna ife chikondi chache cha iye yekha, telepoyo kuti pakukhala ife anyakuipa, Mkhilistu adatifera ife. ⁹ Soma tsono, tidayesewa wakulungama na mulopa wache, nakuti makamaka, timdzapulumuka mu ukali bwa Mulungu bwa iyeyo. ¹⁰ Nakuti penu, pakukhala ife anyakuwengiwa wache, tidabveranisiwa na Mulungu mwa imfa ya Mwana wache, makamaka, pomwe ife tidabveranisiwa, timdzapulumuka na moyo wache. ¹¹ Tsono mtelepoyo lini bzokha, soma ife tinikomedwa na Mulungu mwa Mbuya wathu Yesu Mkhilistu, tinikomedwa naye tsapano na chibveraniso. ¹² Thangwerache, ninga uchimo budapita m'dziko lapansi, na munthu m'bodzi na imfa na uchimo. Telepoyo imfa idafikira wanthu wense, thangwe lakuti wense adaphonya. ¹³ Nakuti kufikira nthwe ya lamulo, uchimo bukhali padziko la pansi, soma bulibe kulewengiwa pakusaya lamulo. ¹⁴ Pabzensenebzi, imfa idatandika mphasa kuyambira pa Adamu kufikira pa Mose, neye penu iwo omwe alibe kuphonya ninga maphonyedwe ya Adamu, ndiye chakuyezezera cha iye nyakubwerayo. ¹⁵ Soma mpfupo ya fovolo imbandendemera lini na bzakuphonya. Nakuti penu azinji adafa thangwera kuphonya kwa m'bodziyo, makamaka pomwe chisomo cha Mulungu na mphatso ya fovolo yakuchokera kwa munthuyo, Yesu Mkhilistu, bzidawandira wanthu azinji! ¹⁶ Thangwe mpfupo ili lini ninga chakudza na chakuphonya cha munthuyo. Chiyeruzo chidatewera chakuphonya chibodzi kudzera mchitsimulo, soma mpfupo idadza kutewera bzakuphonya bzizinji ichidza na chilungamo. ¹⁷ Thangwe penu, na mphumbza za ule, imfa idatonga kudzera muna iye, mtani tsono kuna iwo ndiwo amdzatambira chifundo chikulutsa apo mpfupo yakulungama ikutenga mbuto mmoyo kudzera mwa iye, Yesu Mkhirisitu. ¹⁸ Ndiye tsono, ninga kuphonya kabodzi kudadza na chitsimulo cha wanthu wense, nitenepoyo pomwe chilungamizo chibodzi chidadza chilungamo chamoyo kuna wanthu wense. ¹⁹ Nakuti ninga nakusaya kubvera kwa munthu m'bodzi azinji adasanduka wakuphonya, tenepoyo pomwe nakubvera kwa munthu m'bodzi azinji adayesiwa wakulungama. ²⁰ Tsono lamulo lidabwerakudzathimizira bzakuphonyeka. Tsono pomwe kuphonya kudawanda, chisomo chidanyanyambo kuwanda. ²¹ Ibzi bzidachitika pala, kuti kuphonya kudachika ufumu pa imfa, tenepoyo chisomo chikachite ufumu pa chilungamo kufikira moyo wakusaya kumala mwa Yesu Mkhiristu Mbuya wanthu.