¹ Mchianimbo tsono ndicho timdzalewa kuti Aburahamu, kholo lathu ninga kuthupi, adachigumana? ² Apa penu Aburahamu adayezewa wakulungama na mabasa, iye akhana thangwe la kuchitira madumwa, soma sikuti pamaso pa Mulungu. ³ Tsono mafala ya Mulungu yambalewa chiyani? ''Aburahamu adakhulupira Mulungu, apo bzidalewengiwa kuna iye ninga wakulungama.'' ⁴ Tsapano kuna ndiye ambaphata basa, malipilo yache yambalewengiwa lini ninga mpfupo, soma bzichikhala bzache bzache angadatambira. ⁵ Soma kuna ule wakusaya kuphata basa soma mmalo mwache ambakhulupirira mwa wakusaya umulungu kuti ngwa lazau, chikhulupiriro chache chimbalewengiwa kuti ngwachilungamo. ⁶ Davite akulewa pomwe bza kudala kuna munthu ule omwe Mulungu animulewengera chilungamo neye kuti kuchokera kubasa. ⁷ Iye adalewa, ''Wakudala ni wale omwe bzakuipa bzawo bzakhululukiwa, na omwe bzakuphonya bzao bzalekereriwa, na omwe bzakuphonya bzao bzampsinkhika ⁸ Ngwakudala munthu omwe bzakuphonya bzache Mbuya ambzilewengera lini pomwe.'' ⁹ Tsono apa madalitso yomweya yali kuna anyakugwatiwa wokha, ayayi na anyakusaya kugwatiwa kubodzi? Ife pano tikulewa, ''Chikhulupililo cha Abulahamu chidalewengiwa ninga chakulungama.'' ¹⁰ Tsono chidalewengiwa tani kuna iye? Iye akhadagwatiwa kale pinango akhanati kugwatiwa? Neye kuti akhadagwatiwa, soma akhanati kugwatiwa! ¹¹ Abulahamu adatambira mgwatiwe ninga chizindikilo na chitsimikizo cha chilungamo ndicho iye akhanacho pomwe iye akhanati kugwatiwa. Chakulinga chikhali kumukonza iye kuti akhale baba wa wense omwe iwo akhulupila neye penu alibe kugwatiwa, soma iye ana chikhulupilo adzamulewengera kuna iwo. ¹² Iye ni baba wa anyakugwatiwa neye kuti adagwatiwa kokha soma ndiye anifamba mu nzayo za chikhulupilo chomwe babathu Abulahamu akhanacho iye akanati kugwatiwa. ¹³ Tsono pangano la Abulahamu na azukulu wache lakuti amdzatambila dziko lapansi lilibe kudza na malamulo soma kudza na chilungamo cha chikhulupilo. ¹⁴ Tsono awo ndiye akhala na moyo mwa malamulo na wakupita m'mbuto, chikulupilo chilibe phindu, napo pangano ndakusaya basa. ¹⁵ Nakuti malamulo yambabweresa chilango, soma pomwe palibe lamulo, palibe kuphonya. ¹⁶ Na thangwe limweri pangano limbabwera na chikhulupilo , terepo likhale na mwayi nakudziwika kuna azukulu wache wense_neye kuti wale okha omwe ana chikhulupililo cha Abulahamu. ¹⁷ ninga ndimo kudanembedwera, ''Iye ni baba wa ife tense, ninga momwe bzidanembiwa, ''Ine ndakusankha iwe kukhala baba wa madzinza yensene.'' Abulaham akhali pa maso pa iye omwe akhamukhulupilila, ibzi ndibzo, Mulungu niye ambapasa moyo kuna wakufa achichemera bzinthu bzomwe palibe bzichikhala ninga bzilipo. ¹⁸ Mchikhulupililo iye adakhulupirira bzakusaya kudikhilirika, kuti iye akhale baba wa adzinza azinji, ninga momwe bzidalewidwa, ''Mbewu yako imdzakhala terepoyo.'' ¹⁹ Kusaya kuofoka mchikhulupilo, iye thupi lache likhale ninga la kufa (thangwe iye amdzakhala magole ninga dzana libodzi), na kufa kwa chibaliro ya Sala. ²⁰ Soma thangwera pangano la Mulungu, Aburahamu alibe kuchedwa mchikhulupiriro. M'malo mwache, iye adalimbikisika na chikhulupiro achipereka ulemu kuna Mulungu. ²¹ Iye adakhulupilika pa bzomwe adapangana naye, apo iye adakwanisa kubzichita. ²² Thangwera bzobzi ''chidalewengiwa kuna iye ninga chilungamo.'' ²³ Soma mafala ''yomwe yadalewengiwa kuna iye'' yalibe kunembiwa kuna iye yekha. ²⁴ Ayo yadanembiwa pala ife pomwe, yali kulewengiwa kuna tense omwe timkhulupila mwa iye omwe adalamusa Mbuya wathu Yesu kuchoka kuna wakufa. ²⁵ Iye ni amene adapelekewa thangwera bzakuphonya bzathu napo adamukisiwa kuti ife tikhale wakulungama.