¹ Tambirani munthu aliyense wa chikhulupiliro chakusaya mphamvu, nampodi kumupasa chiyeruzo cha kugaza kwache. ² Munthu m`bodzi ana chikhulupiliro chakuti ambadye bzilibzense, winango wakuchepa chikhulupiliro ambadye masamba yokha. ³ Tsono iye womwe ambadya chilichense nampodi anyoze mwanzache womwe ambadyalini; na uyu womwe ambadyalini chilichenseyu nampodi aweruze winangoyi womwe ambadya bzilibzenseyo. Pakuti Mulungu adamubzumiza. ⁴ Ndiwe yani? iwe ukuweruza nyabasa wa mwanzako? Wakuyamba ni yavu wache womwe ambamuimilira na kumugodamira. Soma amdzamukonza kuti ayime, Pakuti Mbuya angakwanise kumukonza kuti ayime. ⁵ Munthu winango ambakumbuka kuti nsiku ibodzi imbaposa inzache. Winango ambakumbuka kuti nsiku zense nzakulingana. ⁶ Munthu omwe akukoya nsiku, mwa Mbuya; na iye womwe akudya, ambadye mwa Mbuya thangwe iye ambatenda kwa Mulungu. Munthu womwe ambadyalini, ambadya lini mwa Mbuya; na iye pomwe ambapereka kutenda kwa Mulungu. ⁷ Kulibe m'bodzi wa ife omwe ambakhala na moyo yekha, apo palibe omwe ambabzifera yekha. ⁸ Penu timbakhala na moyo, timbakhala na moyo mwa Mbuya, pinango timbafa, koma timbafa mwa Mbuya. Ndiye penu tina moyo ayayi tafa, koma ndife wache wa Mbuya. ⁹ Na thangwe limweli Mkhirisitu adafa achilamuka pomwe , bzomwe bzikutilatiza kuti iye ni Mbuya kwa wense wakufa na anyamoyo. ¹⁰ Soma iwepo, thangwe lanyi umbayeruza m'bale wako? Thangwe lanyi iwepo umbanyoza m'bale wako? Pakuti tense timdzakaima pa kadera ya wakutonga wa Mulungu. ¹¹ Pakuti ibzi bzidanembiwa, ''Pomwe ine ndinamoyo'' Mbuya akulewa , "Kuna ine mabondo yense yamdzandigodamira na lilime lilirense limdzatawiriza kwa Mulungu.'' ¹² Tsono pomwe, munthu aliyense amdzabzipasa chilewengero yekha kwa Mulungu. ¹³ Tenepo tileke kumbatongana tekhatekha, koma timbakumbuke ichi, kuti palibe munthu ndiye amdzaikhira m'bale wache mwala panjira ayai kumuchitira bzinthu bzakumuipira. ¹⁴ Nimbadziwa apo mpsakukhazikika mwa Mbuya Yesu kuti palibe chinthu ndicho chimbakhala chakuipa pachokha. Soma kuna iye omwe ambaona chilichense kuti ntchakuipa, kwa iye chimbakhala chakuipa. ¹⁵ Penu wamudzonga m'bale wako thangwera chakudya, popo chikondi ukuchikwanisa lini. Nampodi kumudzonga munthu omwe Mkhirisitu adamufera na chakudya chako. ¹⁶ Lekani kubvuma kuti chabwino cha imwepo ambachirewere bzakuipa. ¹⁷ Nakuti umambo bwa Mulungu bulirini mu bzakudya na bzakumwa, soma buli mu chadidi, mtendere, na chisangalaro mu Mzimu Wakuchena. ¹⁸ Thangwe munthu ndiye anitumikila Mkhirisitu muibzi anikomedwesa Mulungu apo wanthu ambatawiriza. ¹⁹ Tsono, tilonde bzinthu bzamtendere na bzinthu bzakutibweresa pabodzi munthu na mwanzache. ²⁰ Nampodi kudzonga basa la Mulungu thangwela chakudya. Bzinthu bzense bzilibwino, soma nkhuphonya kuti munthu ambadye chilichense chomwe chingachitise kuti mwanzache asaye kudekedwa . ²¹ Bzilibwino kukhala ne kudya nyama, kumwa bwadwa ayai kuchita chinthu ndicho m'bale wako angadekedwe lini nacho. ²² Chikhulupiliro ndicho unacho, uchikoye pakati pa iwepo na Mulungu. Nyakudalitsika ni munthu omwe ambabzitsimula lini yekha pa chinthu ndicho wachitiliwa . ²³ Munthu omwe ambabzikaikira pa kudya ambabzigaza yekha, thangwe bzikuchoka lini muchikhulupiliro. Apo chilichese ndicho chimbachoka lini muchikhulupiliro ni tchimo.