¹ Lekani munthu aliyense abvere malamuro ya akulu akulu, pakuti palibe ulamuliro bwinango soma bwakuchoka kuna Mulungu. Malamulo yomwe yalipoya yadasankhuliwa na Mulungu. ² Tsono munthu ndiye amgazana na lamulo iye akulambiza chakuikhiwa cha Mulungu; na omwe akulambizawo amdzatambira chilango cha kwaiwo okha. ³ Atongi ambakhala lini wakugopsa kuna wakuchita bzabwino soma kuna wale wakuchita bzakuipa. Kodi umfuna kukhala wakusaya mantha na lamulo? Chita chabwino apo umdzatambira m'dalitso wache. ⁴ Nakuti iye ni kapolo wa Mulungu kuna imwe pa bzabwino . soma ukachita chakuipa , ukhale wakugopa; Thangwe iye ambatenga lini lupanga pakusaya thangwe. Pakuti iye ni kapolo wa Mulungu, omwe ambabwezera chakuipa kuna iye omwe wachita bzakuipa. ⁵ Tsono tikufunika tikhale wakubvera, sikuti thangwera kuipidwa kokha, soma thangwe kukumbuka kwa mumtima. ⁶ Thangwera ichi mumbapereke mtsonkho. Nakuti waboma mba akapolo wa Mulungu, omwe ambaganizira chinthu chochi mwakupitiriza. ⁷ Perekani mangawa kuna munthu aliyense omwe munaye mangawa: Msonkho kuna iwo omwe ambatambira msonkho, pagalini kuna iwo omwe ambapagaliwi, gopani wakuthemera kugopiwa, perekani ulemu kuna wakuthemera kupasiwa ulemu. ⁸ Nampodi kufiyali chinthu kuna aliyense, kupambula kukondana wina na mwayache. Thangwe kuna iye omwe animkonda mwayache wakwanisa lamulo. ⁹ Malamulo yakuti, ''Nampodi kuchita chigololo, nampodi kupha, nampodi kuba, nampodi kusilira," na lamulo lililense lidamangiliriwa pa lamulo lakuti" Konda mwayako ninga umbabzikondera mwenekachiro." ¹⁰ Chikondi chimbadzonga lini mwayako. Koma chikondi chimbakwanisa lamulo. ¹¹ Thangwera ichi mukudziwa nthawe, kuti ni nthawe yakuti timuke pa kugona. Nakuti tsapano chipulumuso chili pafupi kusiyana na ndimo tikhakhulupilira pakutoma pale. ¹² Tsono bwerani tileke mabasa yathu ya mum'dima, thangwe nsiku yafendera. Bwerani tikhundule mabasa ya mum'dima, ndipo tiikhe bzinthu bzanthu padecha. ¹³ Bwerani tifambe mwakuthemera, ninga masikati, neye mwa bzisangalaro bza kumwa ayai kuledzera; nampodi tifambe m'makhalidwe ya chigololo ayai bza ndewu, nampodi timbachite nsanje. ¹⁴ Soma tibziikhe mwa Mbuya Yesu Mkilisitu, nampodi kukumbuka bzakuthupi kuti lichite bzakufuna bzache.