¹ Thangwe lache, nimkukumbirani abale wangu , mwa chisomo cha Mulungu, kuti mathupi lanu muyapereke nsembe, ya mumoyo, yakupambuliwa kuna Mulungu. Ndipo kumukumbira kwanu kumkwanisiwa. ² Tsono nampodi kundendemeziwa na makhaliro yapansi pano, soma mukhale wakutembenuziwa mwa kukonza pomwe mwa moyo wanu. Chitani ibzi kuti mukakumbukire chomwe chili chifundo chabwino, chakupambuliwa na chakudekera Mulungu. ³ Thangwe na chifundo ndicho chidaperekiwa kuna ine ndikulewa kuna aliyense wa imwe; Mumbabzikumbukira mwakukula mwekha kuposa ndimo mukuthemera kukhala, kumbukani mwa chiyeruzo chachadidi,aliyense malingana na mphimo ya chikhulupilo chomwe Mulungu adakupasirani imwe. ⁴ Pakuti mthupi libodzi tilinabzo bziwalo bzizinji, soma sikuti bziwalo bzensenezo bzina basa lakundendemera neye. ⁵ Ndendembo, ife ndife azinji omwe tili thupi libodzi mwa Mkhiristu, na bziwalo bzinzache winango na mwayache. ⁶ Ife tina mphaso zakusiyana malingana na chisomo chakupasiwa kuna ife. Penu m'bodzi wapasiwa mphatso yakulewera alewere ninga mwa chikhulupiliro. ⁷ Penu winango mphatso yache nja utumiki, mulekeni iye atumikile. Penu winango mphatso yache njakupfunzisa, mulekeni iye apfunzise. ⁸ Penu winango mphatso yache m kulimbikisa, mulekeni alimbikise. M'bodzi akapasiwa mphatso, achite na moyo wachadidi. Penu winango mphatso yache njakuyeruza, mulekeni ayeruze mwakufulumiza, Iye wakuchita chifundo, mulekeni achite na kukondwa moyo. ⁹ Chigwirizano chikhale chakusaya dima. Uyipidwe nacho chakuipa ; komedwa nacho chabwino. ¹⁰ Mubverane na anzanu mwachikondi chaicho, mutsogolerane winango na mwayache. Kulewa bza ulemu, lemekezanani winango na mwayache. ¹¹ Kumbali ya basa, nampodi kukhala wautofu. Bzakuchita bzanu khalani wakukulumikiza mumzimu, na changu. Kumbali ya Mbuya, tumikirani, iye nthawi zense . ¹² Komedwani pakudikhira, limbikirani pakubonera, limbikani nakupemba. ¹³ Perekani ndibzo wina akusaya kuna wanthu wache wa Mulungu wakuchena moyo. Psagani njira zizinji zakuonesera chikondi. ¹⁴ Muwachitire bzabwino iwo wakukulondalondani imwe; adaliseni nampodi kuwatembelera. ¹⁵ Sekani nawo iwo wakusekera; lirani nawo omwe akulira. ¹⁶ Khalani nawo moyo ubodzi winango na mwayache. Nampodi kumbakumbuka mwakusamwa, soma bvumani kukhala na wakusaya. Nampodi kubziyesa wanzeru mwa imwe mwekha. ¹⁷ Nampodi kubwezera aliyense chakuipa ku chakuipa. Chitani bzinthu bzabwino padecha pamaso pa wanthu wensene. ¹⁸ Penu mbzakukwanisika, ninga momwe mungakwanisire khalani na ufulu bwa imwe, sunngani mtendere kuna wanthu wense. ¹⁹ Nampodi kubwezera chakuipa, wakukondewa, soma perekani njira kuna Mulungu. Nakuti kudanembiwa, 'Kubwezera kuna ine; Nimdzabwezera; adalewa telepo Mbuya" ²⁰ Soma ''penu nyakuwengana namwe akubva njala, mumudyese. Penu akubva nyota, mumupase iye amwe. Nakuterepoyo, umdzakhala wamutulila masimbe ya moto pamsolo pache.'' ²¹ Nampodi kuneta na chakuipa, soma na chabwino kumalisa chakuipa.