¹ Thangwe lache nilewa, Kodi Mulungu adalamba wanthu wache? Nampodi kuchita tenepoyo. Nakuti inembo ndine mu Israyeli, wambewu ya Abrahamu, wa dzinza la Benjamini. ² Mulungu alibe kulamba wanthu wache, omwe iye adawadziwiratu. Ayai mumdziwa lini bzomwe bzakulemba bzinilewa bza Eliya, ndimo dangingimila Mulungu pakugaza Israyeli? ³ "Mbuya, iwo adawapha aneneli wanu, adagwesa maguwa yanu ya nsembe, tsono ine ndasala ndekha, apo akupsaga moyo wangu.'' ⁴ Soma kutawila kwa Mulungu kudalewa tani kuna iye? ''Ine ndidabzisiyila ndekha amuna bzulu bzinomwe omwe alibe kugodamila Bala.'' ⁵ Telepo pomwe, nthawe zino alipo wakusalira ninga mwa chisankhulo cha chisomo. ⁶ Tsono penu kuna mwayi, kulibe pomwe na basa. Neye tsono pakusaya mwayi zjai umkhala lini mwayi. ⁷ Apo mchiyani tsono? Chinthu chomwe a Israyeli akhachipsaga, alibe kuchiwona, soma wakusankhuliwa adachiwona, tsono wakusalawo adaumisiwa moyo. ⁸ Ninga kudanembewa: ''Mulungu adawapasa iwo mzimu wa tulo, maso pala kuti nampodi iwo awone, na makutu pala nampodi kuti iwo abve, ateye kufika lero.'' ⁹ Tsono Davide adalewa, ''lekani meza yawo ikhale kuna iwo ninga ukhulira na mulapu, na chakukalipisa na chakuwabwezela chilango iwo. ¹⁰ Lekani maso yawo yapsipiziwe kuti nampodi yawone, na kotamisa misana yawo nsiku zense.'' ¹¹ Thangwe lache ninilewa, ''Kodi adakhukhumudwa kuti agwe?'' Nampodi kuchita telepoyo. Mmalo mwache, nakuphonya kwawo, kupulumusiwa kudabwela kuna wanthu Wachikunja, kumdzachitisa iwo nsanje. ¹² Tsono penu kuphonya bzao ni vida ya dziko lapansi lapansi, apo penu kuluza kwao ni zida ya Wachikunja, kukwanirisa kwao tsono kumdzakhala tani? ¹³ Tsono pano ndikusewera kuna imwepo Wachikunja, thangwe ine pakukhala mtumiki wa wanthu Wachikunja, ine ndimbanyadira mu utumiki bwangu. ¹⁴ Pinango pense nimdzanyosa nsanje kuna wale wathupi langu langu.Pinango timdzawapulumusa wina mwa iwo. ¹⁵ Napo penu kutayana kwao ndiko kuphatana manja kwa dziko la pansi, apa kutambiliwa kwao kumdzatani tsono chadidi ni moyo kuna wakufa? ¹⁶ Penu bzipaso bzakutoma bza kupambuliwa, nchibodzibodzi na muti, penu mizi yache njakupambuliwa, nchibodzbodzi powe na mitawi yache. ¹⁷ Tsono penu mitawe inango idakhoboka, penu ndiwe, mtawe wa muti wa azitona, omwe udameresiwa mwaiwo, penu iwepo udagawana nawo bzabwino bzamuzi wa muti wa azitona, ¹⁸ nampodi kubzithemba na mitawiyo. Tsono penu iwe umbzithemba, ndiwepo lini omwe unithandizira mphamvu muziyo, soma muzi ndiwo unithandizira iwepo. ¹⁹ Ndiye iwe umdzalewa , ''Mitawe yakhoboka ndiye kuti inepano nimkameresiwa nawo.'' ²⁰ Bzobzo mchadidi. Thangwe omwewo adakhoboliwa na kusaya kukhulupilika kwawo, tsono iwepo umbakwanisa kuima thangwera chikhulupilo chako. Nampodi kumbabzithusa mumtima mwako, soma umbagope. ²¹ Nakuti penu Mulungu amdzakoya lini mitawe yamitundu yache, iye amdzaleka lini iwepo. ²² Nyang'anani, tsono, kudelekha na kulimba moyo kwache kwa Mulungu: kulimba moyo kudabwera kwa Ayuda omwe adagwa, soma kudelekha kwa Mulungu kudabwera kuna imwe, penu imwe mumkhala telepoyo wakuderekha. Pinango mumchita lini bzobzo mumdzagwatiwa. ²³ Tsono penu iwo, akhala lini nachipirilo chawo, amdzawameresa lini. Soma Mulungu adzakwanisa kuwameresa pomwe iwo mu njere. ²⁴ Tsono penu iwe udagwatiwa kumuti wa azitona wa kuthengo, tsono nkudzaphatanidziwa na muti waazitona wabwino, bzimdzakhala bza kukoma tani, mitawe ya mutiyo, umdzamelesiwa pomwe kumuti wache wa azitona chaiye? ²⁵ Tsono inepano ndikufuna lini kuti imwepo mukhale neye kudziwa, abale, bzinsinsi bzobzi, nakuti imwepo nampodi kubziyesa anyanzeru m'makumbukidwe yanu; Nakuti kulimba moyo kudabwera panng'ono kwa Aisalaeri ateye kuwanda kufika kuna wanthu Wachikunja. ²⁶ Terepoyo Ayisalaeri wense amdzapulumusiwa, ninga momwe bzidanembiwa; ''Amdzachokera ku Ziyoni Mpulumusiyo. Iye adzachosa bza makiliyado kuna Yakobo, ²⁷ apo ili ni pango langu na iwo, pomwe ine nimdzachosa bzakuipa bzawo.'' ²⁸ Ninga ndimo mafala ya Mulungu yambalewera, iwo ali ninga awengi thangwera imwepo. Soma kulewa bza kusankhuka, iwo adakondewa thangwe la makolo yawo. ²⁹ Thangwe mpfupo na kuchemeriwa kwache kwa Mulungu bzinilapika lini. ³⁰ Ninga imwepo kalekale mukhabvera lini Mulungu, tsono nsiku zino mudatambila chifundo thangwera kusaya kubvera kwawo. ³¹ Mpsibozibodzi, tsapano Ayuda wale alibe kuti abvere. Nakutenepo iwo akatambile pomwe chisomo thangwe la chisomo cha kuna imwe. ³² Nakuti Mulungu adawafungila wense nakusaya kubva kuti iye awonese chifundo kuna wense. ³³ O, kuzika kwache kumdadzala mbali zense na nzeru na kudziwika kuna Mulungu! Nampodi kutembenuza mayeruzo yache, na njira zache mzakusaya kutewezeka! ³⁴ Nakuti mbani adadziwa bzamumtima mwache mwa Mbuya pinango mbani amdzakhala tsaphungu wache? ³⁵ Ayai mbani amdzatoma kutambila bzinthu kuna Mulungu, kuti Mulungu akamupase iye?'' ³⁶ Nakuti kuchoka kuna iye kudzera kuna iye mwa iye bzinthu bzense bzilipo. Kuna iye kulemekezewe kunthawe zense. Ameni.