¹ Abale wangu, kufuna kwa moyo wangu na kukumbira kwangu kwa Mulungu niniwakumbirira iwo, thangwera chipulumuso chawo. ² Thangwe niwachitira ine umboni bza iwo kuti iwo ana kachangu ka basa la kwa Mulungu, soma sikuti mwakudziwiratu. ³ Thangwera kutaza kudziwa bzakulungama bzakuchokera kuna Mulungu, na kupsaga kukhazikisa chilungamo chawo chawo, iwo ambakwanisa lini kufikira bzachilungamo bza Mulungu. ⁴ Nakuti Khilisitu anacho chimaliziro cha lamulo malingana na chilungamo cha aliyense omwe anikhulupilira. ⁵ Thangwe Mose wanemba bza chilungamo kuti chimbabwera kuchokera ku lamulo: ''Munthu omwe anichita bzinthu ibzi anzakhala na moyo nabzobzi.'' ⁶ Soma chilungamo chakuchokera ku chikhulupiriro chimbati, ''Nampodi kumbalewa mumtima mwako, 'Mbani amdzakwira kudzauluko?' ( tsono kuti, anzam'bulusa pansi Mkhilistu); ⁷ nampodi kulewa pomwe, 'Mbani amdzatchithimira mdindimo?'' (uku ndiko, kubweresa Mkhirisitu kuchoka kuna wakufa). ⁸ Soma bzikulewa chiyani? ''Mafala yali pafupi na iwe, mkamwa mwako na mumtima mwako.'' Aya nimafala ya chikhulupiliro, yomwe ife tiku yafalisa. ⁹ Nakuti penu unzatawiriza mkamwa mwako Yesu ni Mbuya, na kukhulupila mumtima mwako kuti Mulungu adamulamusa iye kuchoka kuna wakufa, udzapulumuka. ¹⁰ Nakuti namtima munthu akhulupilira mkukhala pomwe na chilungamo, na mkamwa mkutawiliza adzapulumuka. ¹¹ Thangwe mafala yambalewa kuti, ''Aliyense omwe anikhulupila iye anzachita lini manyazi.'' ¹² Thangwe palibe kusiyana pakati pa M'yuda na M'herene. Thangwe umweyo ni Mbuya wa Mbuya wensene, iye ngwakudala kuna wense omwe anichemera pa dzina lache. ¹³ Thangwe aliyense omwe anzachemera pa dzina la Mbuya amdzapulumusiwa. ¹⁴ Tsono iwowo amdzachemera tani pa iye omwe iwo akukhulupira lini? Tsono iwo amdzakhulupila tani mwa iye omwe akanati kumubva kale? Tsono iwo amdzabva tani pakusaya nyaku walalikira? ¹⁵ Tsono iwo adza lalikira tani, pokhapokha iwo atumiwe?_ Ninga momwe bzida nembiwa, ''Zabwino ninzayo zawale omwe ambalalika mafala yabwino!'' ¹⁶ Soma akhali lini wense akhabvera uthenga bwa bwino. Thangwe Yesaya akulewa, ''Mbuya, mbani akhulupira bza kulewa bzathu?" ¹⁷ Chikhulupilo chimbabwera na kubva, na kubvera mafala ya Mkhiristu. ¹⁸ Soma inepano ndikulewa, ''Kodi iwowo alibe kubva?'' Inde, m'bzachadidiretu. ''Fala lawo lidayenda ku dziko lensene lapansi, na bzakulewa bzawo bzakumalekezero ya dziko." ¹⁹ Tsono, Ine ndikulewa, ''Kodi Aisrayeli alibe kudziwa?'' Pakutoma Mose adalewa, ''Ine nimdzachitisa imwe nsanje na iwo omwe ankhalalini dzinza. Na dzinza lakusaya kubva, nimdzakukalipisani imwe.'' ²⁰ Tsono Yesaya adakhumisa moyo bzachadidi pomwe iye akhalewa, ''Ine ndidagumanika na iwo omwe akhandipsaga lini ine. Ndidaoneka kuna iwo omwe alibe kundibvunza.'' ²¹ Soma kwa Israyeli iye akulewa, ''Dzuwa lensene ndidafuthula manja yangu kwa wanthu wakusaya kubvera na wakulamba.''