¹ Mgole lakutoma la Dariyo mwana wachimuna wa Ahaswero ---wa mbewu ya Amedi, omwe adamulonga ufumu bwa Akasidi-- ² mgole lekutoma la kutonga kwa Dariyo, ine, Daniele, ndikhalewenga mabukhu ya mafala ya Mulungu, mafala ndiyo yakhadabwera kuna Yeremiya mneneri. Ndidaona kuti pamdzakhala magole makumi manomwe kuti mapasuko ya Yerusalemu yadzamale. ³ Ndidacheuka nkhope yangu kuna Mbuya Mulungu, kumupsaga na pembo na makumbiro ya kubzichepsa, na kutsotsa kudya, kubvala chiguduli, na kukhala padotha. ⁴ Ndidapemba kuna Yahova Mulungu wangu, ndichitawiriza bzakuphonya bzathu. ndidati, ''Ndikukumbira imwe, Mbuya--ndimwe Mulungu mkulu na wakugopsa--ndimwe omwe mumbakoya mapangano apo ndimwe wakukhulupirika kukonda omwe ambakukondani na wakukoya bzakutonga bzanu. ⁵ Taphonya na kuchita bzakuipa. Tachita mwakuipa na kupikisana, kuphinduka ku bzakutonga bzanu na mayeruzo. ⁶ Tiribe kutetekera kuna atumiki wanu aneneri omwe adasewera mdzina lanu kuna mafumu yathu, akuluakulu wathu, abereki wathu, na kuna wanthu wensene wa mdziko. ⁷ Kuna imwe, Mbuya, kwagona chilungamo. kuna ife lero, soma, ni manyazi pa nkhope zathu-- kuna wanthu wa Yuda na wakukhala mu Yerusalemu, na kuna Aisaraeli wense. Uku mkuphatanidza iwo wapafupi na wakutali mmadziko yensene komwe mudawabalalisira. Ili ni thangwera bzakuchita bzakusaya kulungama ndibzo ife tidakuchitirani. ⁸ Kuna ife, Yahova, mmanyazi tinayo pa nkhope zathu--kuna mafumu yathu, akuluakulu wathu, na abereki wathu--thangwe takuphonyerani. ⁹ Kuna Mbuya Mulungu wathu kwagona nsisi na kulekerera, thangwe ife tapikisana naye. ¹⁰ Tiribe kubvera mafala ya Yahova Mulungu wathu pa kufamba mu bzakutonga bzache ndibzo iye adatipa kudzera mwa atumiki wache aneneri. ¹¹ Aisaraeli wense aphonyera chilamulo chanu achipambuka kumbali, kulamba kubvera mafala yanu. Themberero na chilumbiriro bzakunembiwa mchitongi cha Mose, mtumiki wa Mulungu, bzatsanuliwa pa ife, thangwe tamuphonyera. ¹² Yahova watsimikiza mafala ndiyo adasewera kugazana nafe na atongi wathu, pakutibweresera muliri ukulu. Thangwe pansi pa thambo lensene pakhanati kuchitika kale chinthu chirichense chakuyezezera na nzibzo bzidachitika mu Yerusalemu. ¹³ Ninga bzidanembiwa mchitongi cha Mose, muliri wenseneyu wabwera pa ife, chensecho tiribe kukumbira nsisi kuchoka kuna Yahova Mulungu wathu pa kulekeza bzakuipa bzathu tichitetekera ku chadidi chanu. ¹⁴ Mthangwerache Yahova wakoya muliri wakukonzekera kuubweresa pa ife, thangwe Yahova Mulungu wathu ngwachilungamo mu bzakuchita bzensene iye ambabzichita, soma tiribe kubvera mafala yache. ¹⁵ Tsapano, Mbuya Mulungu wathu, mudabulisa wanthu wanu mu Aigupto na boko lamphamvu, muchibvekesa dzina lanu mwekha, ninga kwa lero lino. Soma tidaphonya basi; tachita bzinthu bzakuipa. ¹⁶ Mbuya, thangwera bzichito bzanu bzakulungama, lekani ukali bwanu na chilango bzichungunukire kumbali kwa mzinda wanu Yerusalemu, phiri lanu lakuchena. Thangwera bzakuphonya bzathu, na thangwera bzakuipa bza abereki wathu, Yerusalemu na wanthu wanu asanduka chinthu chakutonzera kuna wense omwe atizungulira. ¹⁷ Tsapano, Mulungu wathu, tetekerani pembo la kapolo wanu na bzakukumbira bzache bzakubzichepsa; thangwera imwe, Mbuya, walisani nkhope yanu pa mbuto yanu yakupambulika yomwe yapasuka. ¹⁸ Mulungu wangu, tcherani makutu yanu mutetekere; fungulani maso yanu muone. Tapasuka; nyang'anisani mzinda wathu omwe udasanduliwa dzina lanu. Tikubweresa lini makumbiro yathu yakubzichepsa kuna imwe thangwera chilungamo chathu neye, soma thangwera chifundo chanu chikulu. ¹⁹ Mbuya, tetekerani! Mbuya, lekererani! Mbuya, tetekerani na kuchita chinthu chinango! Thangwera imwe, nampodi kuchedwa, Mulungu wangu, thangwe mzinda wanu na wanthu ambachemeriwa dzina lanu.'' ²⁰ Pomwe ine ndikhasewera---kupemba na kutawiriza chakuphonya changu na chakuphonya cha wanthu wangu Aisaraeli, na kupereka chikumbiro changu chakubzichepsa pamaso pa Yahova Mulungu wangu mmalo mwa phiri lakuchena la Mulungu-- ²¹ pomwe ndikhali mkati mwakupemba, mwamuna Gabrieli, omwe ndikhadamuona mmasomphenya pakutoma, adambutha pa ine mkumbutha kwa kamangumangu, pa nthawe ya nsembe ya maulo. ²² Iye adandipa ine kubvesesa achiti kuna ine, ''Daniele, ndabwera tsapano kudzakupa kuzindikira na kubvesesa. ²³ Pomwe udayamba kupereka makumbiro yako yakubzichepesayo, lamulo lidaperekiwa apo ndabwera kudzakuuza kutawira kwache, thangwe ndiwe wa muti wapatali. Mthangwerache tenga mafalaya na kubvesesa kuzimbulira. ²⁴ Sumana makumi manomwe zaikhiwira wanthu wako na mzinda wako wakuchena kumalisa bzakuphonya, kubwezera kuipa, kubweresa chilungamo chakusaya kumala, kuchita masomphenya na uneneri, na kudzoza mbuto yakupambulikisisa. ²⁵ Dziwa na kubvesesa kuti kuchoka pakupereka lamulo pale kubwezeresa na kumanga pomwe Yerusalemu kufika pakubwera kwa wakudzozewayo (omwe amdzakhala mtsogoleri), pamdzakhala sumana zinomwe na sumana makumi matanthatu na ziwiri. Yerusalemu amdzamangiwa pomwe na misewu na chemba, napo mpa nthawe yamatsautso. ²⁶ Sumana makumi matanthatu na ziwiri, wakudzozewayo amdzadzonongewa apo amdzakhala lini chinthu. Wankhondo wa mtsogoleri wakubwerayo amdzadzononga mzindayo na mbuto yakuchena. Kumala kwache kumdzabwera na kukhaphwikira kwa madzi, pachidzakhala nkhondo ichifika kuphampha chaiko. Chipasuko chanembedweratu.. ²⁷ Iye amdzatsimikizira mpangano na azinji kwa sumana ibodzi. Pakatikati pa sumana iye amdzamalisa chakupereka chakuphera na nsembe yaufa. Pa nthawe ya bzakuipayo pamdzabwera wina wakudzachita chipasuko kufikizana chidzonongeko