¹ Gole lachitau la Koresi mfumu ya Perisiya, uthenga budazimbulikira Daniele, omwe dzina lache akhachemerewa Belitsazara. Uthengabu bukhali bwachadidi. Bukhali bwa mpokano ukulu. Daniele adabvesesa uthengabo pomwe iye adaona achizindikira masomphenyayo. ² Mu nsiku zimwezo ine, Daniele, ndikhali mkulira kwa sumana zitatu. ³ Ndilibe kudya chakudya chakufunikira, ndiribe kudya nyama, neye kumwa vinyu, apo ndiribe kubzipsingisira ndekha na mafuta kufikizana kumaliza sumana zitatu zamterozo. ⁴ Pa nsiku yachimakumi mawiri na chinayi ya mwezi wakutoma, pomwe ndikhali m'bali mwa mkulo ukulu (ndiwo, Hidikeli), ⁵ ndidajiguma ndichiona mwamuna wakubvala nguwo za bafuta, na bande kuzungulira mchiuno mwache wakukonzewa na golide chaiye waku Ufazi. ⁶ Thupi lache likhali ninga berulo, apo nkhope yache ikhali ninga mpheni. Maso yache yakhali ninga kandiyero zakugaka, apo manja yache na nzayo zache zikhali ninga mkuwa wakuyetima. Kubveka kwa mafala yache kukhali ninga mafala ya thimu lizinji. ⁷ Ine, Daniele, ndekhane ndiye ndidaona masomphenyayo, thangwe wanthu ndiwo ndikhanawo alibe kuona nawo masomphenyayo. Soma, mantha makulu yadawaphata, apo adathawa kukabisalika okha. ⁸ Ndiye ndidasala ndekhandekha ndichiona masomphenya makuluyo. Palibe mphamvu zidasala mwa ine; maonekedwe yangu yakuyetima yadasanduka maonekedwe yakusukwa, apo palibe mphamvu zidasala mwa ine. ⁹ Ndiye ndidabva mafala yache-- apo pomwe ndikhayabva, ndidagwa chafufumimba mtulo twakufa nato na nkhope yangu kukhuya pansi. ¹⁰ Boko lidandiphata, lichinditetemeresa mmabondo mwangu na bzithatha bza manja yangu. ¹¹ Mnjeroyo adati kuna ine, ''Daniele, munthu wa muti wapati, bvesesa mafala ndiyo ndikusewera kuna iwe. Ima dzololo, thangwe ndatumiwa kuna iwepo.'' Iye atasewera uthengabu kuna ine, ndidayima mwakutetemera. ¹² Ndiye iye adti kuna ine, ''Leka mantha, Daniele. Kuchoka pa nsiku yakutoma udayikha mtima wako pakubvesesa na kubzichepsa wekha pamaso pa wanthu, mafala yako yadabveka, ndiye ndabwera thangwera mafala yako. ¹³ Mkulu wa ufumu bwa Perisiya adanditsekerezera njira, apo ndidakoyewa popo na mfumu ya ku Perisiya kwa nsiku makumi mawiri na ibodzi. Soma Mikaeli m'bodzi wa akulu wakubvekera, adabwera kudzandithandiza. ¹⁴ Tsapano ndabwera kudzakuthandiza iwepo kubvesesa ndibzo bzimdzachitika kuna wanthu wako mu nsiku zakumaliza. Thangwe masomphenyaya nga nsiku ziri mkudza.'' ¹⁵ Pomwe iye akhasewera kuna ine kuphatisa basa mafalaya, ndidacheuka nkhope yangu kumbali apo ndikhakwanisa lini kusewera. ¹⁶ M'bodzi omwe akhali ninga wana wachimuna wa munthu adandiphata milomo yangu, apo ndidayachamula pakamwa pangu mkusewera naye omwe akhadaima pamaso panguyo: ''Mbuyangu, ndiri mu ululu thangwera masomphenyaya; ndiribe kusala na mphamvu. ¹⁷ Ndine kapolo wanu. Ningasewere tani na mbuyangu? Nakuti pano zjai ndiribe mphamvu, apo palibe mphuye yasalira mwa ine.'' ¹⁸ Bwereze iye wamaonekedwe ya munthuyo adandiphata achindilimbikisa ine. ¹⁹ Adati, ''Leka mantha, munthu wa muti wapatali. Mtendere mbaukhale pa iwe! Khala wa mphamvu tsapano, khala na mphamvu!'' Pomwe iye akhasewerapo kuna ine, ndidalimbikisika. Ndidati, ''Lekani, mbuyangu musewere, thangwe zjai mwandilimbikisa. ²⁰ Iye adati, ''Kodi ukudziwa thangweranyi ndabwera kuna iwe? Tsampanopa nim'bwerera kukamenyana na mfumu ya ku Perisiya. Ningayenda, mfumu ya ku Helene inibwera. ²¹ Soma nimdakuuza ndibzo bzidanembiwa M'bukhu la Chadidi. Palibe wina wakubzionesera yekha kukhala wamphamvu pa ine kulimbana nawo, kupambula Mikaeli mfumu yanu.