¹ Mgole lakutoma la Dariyo wa ku Medi, ine ndidabwera ndekha kudzathandiza na kudzateteza Mikaeli. ² Tsapano nimkuuzani chadidi. Mafumu matatu yamdzaphuka mu Perisiya, apo yachinayiyo imdzakhala yakudala kwenekwene kuposa ina yensenewo. Ingadzabzilimbisa yokha na vida yacheyo, imdzanyosa aliyense kugazana na ufumu bwa ku Helene. ³ Mfumu ya mphamvu imdzaphuka yomwe imdzatonga ufumu bukulu kwenekwene, ichidzachita malingana na bzakukhumba bzache. ⁴ Ingadzaphuka, ufumu bwachebo bumdzapseka buchigawanika ku mphepo zinayi zakudzaulu., soma sikuti kupasa wa mbeu wache chaiwo, apo sikuti na utongi bwache akhanabo pomwe ikhatonga neye. Thangwe ufumu bwachebo bumdzazuliwa buchidzayenda kuna wanthu wa pezi sikuti wa mbeu yache. ⁵ Mfumu ya Kumwera imdzakhala ya mphamvu, soma m'bodzi wa akuluakulu wa nkhondo wache amdzakhala na mphamvu kuposa iyo achidzakhala na ulamuliro. Ulamuliro bwache bumdzakhala ulamuliro bukulu. ⁶ Patamala magole yakuchepa, nthawe ingadzakwana, iwo amdzachita chiphatano. Mwana wachikazi wa mfumu ya Kumwera amdzabwera kuna mfumu ya Kumpoto kutsimikizira chibverano. Soma mkaziyo amdzaikoya lini mphamvu ya boko lache, ayai mwamunayo kudzaima, pinango boko lache. Mkaziyo amdzaperekiwa--iye na wale adamubweresawo, na babache wa mkaziyo, na omwe adamuthandiza iye nthawe imweyo. ⁷ Soma mtawi wakuchoka ku mizi ya mkaziyo umdzphuka nkhankha yache. Iye amdzamenya wankhondo achipita mu litsito la mfumu ya Kumpoto. Iye amdzawamenya iwo, achidzawagonjesa. ⁸ Amdzapsokonyola milungu yawo, pabodzi na bzilinganiro bzachitsulu na matenthe yawo ya nsengwa yapatali ya siriva na golide, mkuyenda nayo ku Aigupto. Kwa magole iye amdzakhala kutali na mfumu ya Kumpoto. ⁹ Ndiye mfumu ya Kumpoto imdzamenya ufumu bwa mfumu ya Kumwera, soma iyo imdzachoka mkuyenda ku dziko lache chailo. ¹⁰ Wanache wachimuna wa imunayo amdzakonzeka achikontcheza thimu likulu la nkhondo. Limdzapitiriza kubwera basi lichidzakhaphwikira pa chirichense; limdzagwata kudzera njira yense kufika ku litsito lache. ¹¹ Ndiye mfumu ya Kumwera imdzakalipa maninge; imdzayenda ichikamenyana nayo, mfumu ya Kumpoto. Mfumu ya Kumpoto imdzakhala na thimu lizinji la nkhondo, soma wankhondowo amdzaperekiwa mmanja mwache. ¹² Wankhondowo amdzakusiwa, apo mtima wa mfumu ya Kumwera umdzadzusika, uchidzachitisa makumi ya bzulu kugwa, soma imdzapambana lini. ¹³ Mfumu ya Kumpoto imdzayambisa thimu lina la anyankhondo, likulu kuposa lakutoma lire. Patapita magole, mfumu ya Kumpoto imdzabwera chadidi na anyankhondo azinji wakukhala na bzipfudzo bzizinji. ¹⁴ Nthawe zozo azinji amdzagandukira mfumu ya Kumwera. Wana wachimuna wa wanthu wachiwawa pakati pa wanthu wanu amdzabziikha okha kuti akwanirise masomphenya, soma amdzagwa. ¹⁵ Mfumu ya Kumpoto imdzabwera, ichidzagwezeka mataka pala nthumbira za kubisalikira, mkutenga muyi wa malitsito. Wankhondo wa Kumwera amdzakwanisa lini kuima, neye anyankhondo wawo wabwino chaiwowo. Pamdzakhala lini mphamvu zakuima. ¹⁶ Wakubwera kudzamenyana nayeyo amdzachita ndimo iye amfunira, apo palibe wakudzaima njira yache. Iye amdzaima Mdziko Lakudeka, apo chidzonongeko chimdzakhala mmanja mwache. ¹⁷ Mfumu ya Kumpoto imdzalimbisa nkhope yache kubwera na mphamvu za ufumu bwache bwense, apo na iye pamdzakhala chiphatizano ndicho iye amdzachita na mfumu ya Kumwera. Iye amdzampa mwana wachikazi wa akazi mmaloozi kupasula ufumu bwa Kumwera. Soma nzeruyo imdzatheka lini ayai kumuthandiza iye. ¹⁸ Bzitamala ibzi, mfumu ya Kumpoto imdzatembenuzira nkhope yache ku magombe ichidzatenga mazinji mwa iyo. Soma mkulu wa nkhondo amdzalekeza kunyoza kwache achidzachitisa kunyoza kwacheko kubwerera kuna iye mwene. ¹⁹ Kinangoko iye amdzatembenukira ku malitsito ya mdziko lache, soma amdzakhukhumudwa achigwa; iye amdzaoneka lini pomwe. ²⁰ Ndiye wina amdzaphuka nkhankha ya iye omwe amdzapitisa wa mtsonkho pa ulemerero bwa ufumubo thangwera kupata kwa ufumubo. Soma nsiku zakudzazo iye amdzonongeka, soma sikuti mu ukali ayai mu nkhondo, ²¹ Nkhankha ya iye amdzaphuka munthu wakunyozereka omwe wanthu angadampa lini ulemu bwa mphamvu ya banja lachifumu; iye amdzabwera mwakusaya kudikhirira achidzatenga ufumubo mwa ukhulukhu. ²² Thimu la nkhondo limzapsayiriwa ninga kukhaphwikira kwa madzi kuchoka pa iye. Thimu limwero na mtsogoleri wa mpangano amdzadzonongewa. ²³ Kuchoka pa nthawe ndiyo chiphatizano chakonzewa na iye, amdzachita mwachinyengo; na wanthu wakuchepa okha iye amdzakula mphamvu. ²⁴ Mwa kanonono iye amdzafika ku mbuto yakudala kwenekwene ya mphimphayo, achidzachita ndibzo neye babache ayai babawo wa babache alibe kuchita.Iye amdzamwaza pakati pa wakumtewera wache bzakukolola, bzakupondedza, na vida. Amdzachita nzeru yakupsokonyola malitsito, soma kwa kanthawe pamkiti. ²⁵ Iye amdzalamusa mphamvu zache na mtima wache kugazana na mfumu ya Kumwera na thimu lizinji la nkhondo. Mfumu ya Kumwera imdzachita nkhondo na thimu lizinjitsa la mphamvu, soma iye amdzaima lini thangwera winango amdzakonza manera yakugazana naye. ²⁶ Neye iwo wakudya chakudya chache chabwinowo amdzayezera kumudzononga. Thimu lache limdzakokonolewa ninga madzi yakukhaphwikira, apo azinji wa iwo amdzagwa kuphiwa. ²⁷ Mafumu mawiri yenseya, na mitima yawo yakugandukirana, yamdzakhala pa meza ibodzibodziyo achidzanamizana, soma bzimdzakhala bzakusaya basa. Thangwe chimaliziro chimdzafika pa nthawe ndiyo chaikhiwa. ²⁸ Kinangoko mfumu ya Kumpoto imdzabwerera mmanja mwache na vida izinji, na mtima wache wakugazana na mpangano wakuchena. Iyo imdzachita chinthu china apo kinangoko imdzabwerera ku dziko lache la iye. ²⁹ Pa nthawe yakuikhika iyo imdzabwerera mkubwera kulimbana pomwe na Kumwera. Soma nthawe iyi imdzakhala lini ninga pakutoma. ³⁰ Thangwe bzombo bza pamadzi bza ku Kitimu bzimdzabwera kulimbana nayo, apo iyo imdzabva mantha. Iyo imdzabwerera ichikalipa kugazana na mpangano wakuchena, apo iyo imdzachita chinthu. Iyo imdzabwerera mkuonesa udidi kuna wale wakulamba mpangano wakuchena. ³¹ Wankhondo wache amdzanyanduka achidzapsipiza mbuto yakupambulika na malitsito yache. Amdzamalisa nsembe yakupserereza yakusaya kulekezayo achidzayambisa chakunyansa chakuyambisa mpasuko. ³² Angakhala iwo wakuchita bzakuipawo kugazana na mpangano, iye amdzawanyengeza achiwachita chinyengo. Soma wanthu wakudziwa Mulungu wawo amdzakhala wa mphamvu achidzachita chinthu. ³³ Wale pakati pa wanthu omwe ana kuzindikira amdzachitisa azinji kubvesesa. Soma amdzagwa na lupanga na malambi ya moto; amdzagwera mu ukapolo na mkuberedwa kwa nsiku zizinji. ³⁴ Mkugwa kwawoko, amdzathandiziwa na thandizo ling'ono. Mkubzikuza kwawoko azinji amdzaphathikana nawo mwa iwo okha. ³⁵ Wina wakuzindikirawo amdzagwa mwakuti mchokocho umdzachitika pa iwo, na chicheneso, na kusambisiwa, kufikizana nthawe ya chimaliziro. Thangwe nthawe yakuikhika ikalipo iri mkubwera. ³⁶ Mfumu imdzachita malingana na bzakukhumba bzache. Imdzabzikwiza yokha ichidzabzikulisa yokha padzaulu kuposa mulungu aliyense. Kugazana na Mulungu wa milungu imdzasewera bzinthu bzakudabwisa, thangwe iyo imdzapindula kufikizana chilango chitamala. Thangwe ndibzo bzakhazikisiwa bzimdzachitika. ³⁷ Iye amdzaonesa lini kukhala nayo basa milungu ya makolo, neye mulungu wakukondewa na azimayiyo, pinango kukhala na basa na mulungu wina aliyense, soma amdzabzikwiza yekha padzaulu pa iyo yense. ³⁸ Iyo imdzachitira ulemu mulungu wa malitsito mmalo mwa imweyi. Ni mulungu omwe abereki wache alibe kudziwa kuti iye amdzamuchitira ulemu na oro na siriva, na minyala ya nsengwa yapatali na bzinthu bzinango bza kuumira. ³⁹ Iyo imdzamenya nkhondo malitsito yakulimba kwene kwene kuthandiziwa na mulungu wachilendo. Kuna aliyense wakuyizindikira iyo, imdzamchitira ulemu bukulu. Imdzawasandusa mafumu ya wanthu azinji, ichidzagawa mbuto zakukhala ninga mpfupo yawo. ⁴⁰ Pa nthawe yachimaliziro, mfumu ya Kumwera imdzachita nkhondo. Mfumu ya Kumpoto imdzam'bwerera ninga kabvulimvuli na magareta na wapakavalo na bzombo bzapamadzi bzizinji. Iyo imdzagandukira madziko, kudzabalalisa wanthu, mkugwata na mwemo. ⁴¹ Iyo imdzapita Mdziko Lakudeka, apo madzana makumi ya Aisaraeli yamdzafa. Soma amwewa amdzathawa mdziko lache: Edomu, Moabu, na wanthu wakusala mu Amoni. ⁴² Iyo imdzapalawiza boko lache mmadziko; dziko la Aigupto limdzapulumusiwa lini. ⁴³ Imdzatenga mathungwa ya oro na ya siriva, na bzinthu bzense bzakuumira bza mu Aigupto; wanthu wa ku Libya na Kusi amdzatewera nzayo zache. ⁴⁴ Soma mbiri yakuchoka ku machibese na kumpoto imdzayigopsa, ichidzabula na ukali bukulu kukadzonongeratu na kukabalalisa azinji mkukawapha. ⁴⁵ Iyo imdzakhazikisa chihema cha nyumba yache yachifumu pakati pa nyanza na phiri lakupambulika. Chimaliziro cha iyo chimdzafika, pachidzasayika wakudzayithandiza.