¹ Pa nthawe yoyo Mikaeli, mfumu ikulu yakutumikira wanthu wanu, amdzalamuka. Pamdzakhala nthawe ya matsatso yakuti ikhanati kukhala kale chiyambire kutoma kwa dzinza lirilense nthawe yoyo. Pa nthawe yoyo wanthu wanu amdzapulumusiwa, aliyense omwe dzina lache linigumanika litanembiwa m'bukhu. ² Azinji wa iwo wakugona mu pfumbi la dziko lapansi amdzalamuka, wina ku moyo wakusaya kumala apo wina ku manyazi na mnyozo wakusaya kumala. ³ Wale omwe ali wakuzindikira amdzatoya ninga kuyetima kwa thambo, na wale wakutembenuza azinji kutewera chilungamo ali ninga nyenyezi ku nthawe za nthawe. ⁴ Soma iwe, Daniele, tsekera mafalaya; khomera chilatizo bukhu lako kufikizana kuphampha. Azinji amdzathamanga uku na uku, apo chidziwiso chimdzawanda.'' ⁵ Ndiye, daniele, adanyang'anisa, apo pakhana wina awiri ataima. M'bodzi akhadaima m'bali mwa mbali iyi ya mkulo, apo wina kuima m'bali ina ya mkulo. ⁶ Mb'dzi wa iwo adati kuna mwamuna wakubvala nguwo ya bafuta, omwe akhali pamadzi kuphiri kwa mkuloyo, ''Chimaliziro cha bzakudabwisabzi chimdzafika liti?'' ⁷ Ndidabva mwamuna wakubvala bafutayo, omwe akhali kuphiri kwa mkuloyo---adadzusa boko lache lamadidi na boko lache lamadzere kudzaulu achilumbirira wakukhala ku nthawe zamuyaya kuti bzimdzakhala kwa kanthawe, nthawe, na meya ya nthawe. Iwo angadzamaliza kumwaza mphamvu za wanthu wakuchena, bzinthu bzensebzi bzimdzamaliziwa. ⁸ Ndidabva, soma ndiribe kubvesesa. Ndiye ndidabvunza, ''Mbuyangu, bzakudza na bzinthu bzensebzi bzimdzakhala chiyani?'' ⁹ Iye adati, ''Ndoko njira yako, Daniele, thangwe mafala yafungika na kuikhiwa chialtizo kufikizana nthawe yakuphampha. ¹⁰ Azinji amdzabzitsuka, kubzichenesa, na kubzitsuka, soma wakuipa amdzachita mwakuipa basi. Neye wakuipa m'bodzi ndiye amdzabvesesa, soma wale wakuzindikira ndiwo amdzabvesesa. ¹¹ Kuchoka pa nthawe ndiyo nsembe yachikhalire imdzachosewa chichidzasukwisa chakunyansa, pamdzakhala nsiku chulu chibodzi, na madzana mawiri na makumi mapfemba. ¹² Wakudala ni omwe akudikhirira kufikizana kumala kwa nsiku chulu chibodzi madzana matatu na makumi matatu na zitatu. ¹³ Uyende njira yako kufikizana chimaliziro, apo umdzapuma. Iwe umdzalamuka m'buto mwako yakuikhiwa, pakumala pa nsiku.''