¹ Mgole lachitatu la kutonga kwa Mfumu Bilisazara, ine, Daniele, masomphenya yadandionekera (yatamala ndiyo yadandionekera pakutoma). ² Ndidaona mmasomphenya, pomwe ndikhanyang'anisa, kuti ndikhali mu litsito la Susa mphimpha ya Elamu. Ndidaona mmasomphenya kuti ndikhali m'bali mwa Mkulo wakuchita kuchera wa Ulayi. ³ Ndidajiguma ndichiona pamaso pangu tonde wa bira wa nyanga ziwiri, ataima pambali pa mkuloyo. Nyanga ibodzi ikhali itali kuposa inzache, soma italiyo ikhafula mwakuchedwa kusiyana na ifupiyo ichiposiwa kutalimpha na inayo. ⁴ Ndidaona tonde wa bira akusunthira kumaulo, kinangoko kumpoto, na kumwera; palibe nyama ina idakwanisa kuima pamaso pache. Palibe ina ya izo idakwanisa kupulumusa aliyense mmanja mwache. Idachita ndicho ikhafuna, ichisanduka ikulu. ⁵ Pomwe ndikhakumbuka bzobzi, ndidaona tonde wa mbuzi ali mkubwera kuchoka kumaulo, omwe adagwata na pamataka pa dziko lense lapansi, kuthamanga kamkulumize, neye kuoneka kukhuya pamataka. Mbuziyo ikhana nyanga ikulu pakati pa maso yache. ⁶ Iyo idabwera pana tonde wa bira pale omwe akhana nyanga ziwiri--- ndidaona birayo ataima m'bali mwa mkulo ule--apo mbuziyo idathamangira birayo na ukali bwa mphamvu. ⁷ Ndidaona mbuziyo ikufendera pafupi na birayo. Ikhali yaukali kwenekwene na birayo, ichisuntha birayo ichikhobola nyanga zache ziwirizo. Bira akhalibe mphamvu kuimisana nayo. Mbuzi idamgwesera pansi ichimpondedza. Pakhalibe wina wakupulumsa birayo ku mphamvu zache. ⁸ Kinangoka mbuziyo idakula maninge. Soma pomwe idakhala na mphamvu, nyanga ikuluyo idakhoboka, nkhankha ya iyo nyanga zina zinayi zikulu zikulu zidaphuka zomwe zidatosa ku mphepo zinayi zakudzaulu. ⁹ Kuchoka mwa izo mudaphuka nyanga ina, ing'ono pakutomapa, soma idakula mwakulemwa msinkhu kunyang'anisa kumwera, kunyang'anisa kumachibese, na kunyang'anisa Mdziko Lakudeka. ¹⁰ Idasanduka ikulu ninga kufuna kuchita nkhondo na wankhondo wakudzaulu. Wina wa anyankhondowo na nyenyezi zinango zidathuziwa pa dziko lapansi, ichizipondedza. ¹¹ Idabzikuza yokha kukhala ikulu ninga mkulu wa anyankhondo. Idapsokonyola kuchoka kuna iye nsembe yakupserereza ya nsiku zense, apo mbuto yache yakupambulika idadzonongeka. ¹² Thangwera kupikisana, wankhondo amdzaperekiwa ku nyanga ya mbuzi, apo nsembe yakupsererezayo amdzailekeza. Nyanga imdzagwesa chikhulupiriro pansi, ichidzapambana mu bzakuchita bzache. ¹³ Ndiye ndidabva wakuchena mtima akusewera apo wakuchena mtima mwayacheyo akumtawira, ''Bzinthu bzobzi bzimdzamala nthawe itali tani, masomphenya ya nsembe yakupsererezayo, chakuphonya chakubweresa chidzonongeko, kuperekiwa kwa mbuto yakupambulika, na thimu la anyankhondo wakudzaulu kupondedzewa?'' ¹⁴ Iye adati kuna ine, ''Bzimdzamala maulo na machibese bzulu bziwiri na madzana matatu. Salipo mbuto yakupambulika imdzabwezeresiwa.'' ¹⁵ Pomwe ine, Daniele, ndidaona masomphenyayo, ndidayezera kuyabvesesa. Ndiye kudaima kutsogolo kwangu wina wakuoneka ninga munthu. ¹⁶ Ndidabva mafala ya munthu kuchemera pakati pa m'bali mwa Mkulo wa Ulai. Iye adati, ''Gabirieli, mthandize munthuyu kubvesesa masomphenyaya.'' ¹⁷ Ndiye iye adafendera pafupi ndikhadaimapo. Pomwe iye adabwera, ndidabva mantha ndichigwesa nkhope yangu. Soma iye adati kuna ine, ''Bvesesa, mwana wa munthuwe, kuti masomphenyaya nga kunthawe yakumaliza.'' ¹⁸ Pomwe iye adasewera nande, ndidagona tulo twakufa nato chafufumimba. kinangoko adandiphata achindiimisa. ¹⁹ Iye adati, ''Ona, nimkudziwisa ndibzo bzimdzachitika pachimaliziro mthawe ya chilango, thangwe masomphenyaya yakukhudza nthawe yakuikhika yakuphampha. ²⁰ Angakhala tonde wa bira udaonayo, omwe akhana nyanga ziwiri--- ni mafumu ya Amedi na Aperesi. ²¹ Mbuzi imuna ni mfumu ya Helene. Nyanga ikulu pakati pa maso yache ni mfumu yakutoma. ²² Ingakhala nyanga ndiyo idakhoboka, ndiyo nkhankha yache zinayi zidaphuka---maufumu manayi yamdzaphuka kuchoka mdzinza lache, soma sikuti na mphamvu yache ikulu. ²³ Ndiye pakumaliza pache pa maufumu yamweyo, pomwe wakutsautsa afika pa chimache, mfumu ya nkhope yaukali, ya nzeru maninge, imdzaphuka. ²⁴ Mphamvu zache zimdzakhala zikulu---soma sikuti mphamvu zache zache. Imdzakhala yakudabwisa madzonongedwe yache; imdzachita ichidzakuzika. Imdzadzononga mphamvu za inangoyo na wanthu wakuchena mtima. ²⁵ Mwa kuchenjera kwache imdzachitita chinjengo chakupindulisa mmanja mwache. Imdzakhala ikulu mu mtima mwache mwa iyo yokha. Imdzadzononga wanthu azinji mwakusaya kudikhirira. Imdzagandukira pomwe Mfumu ya mafumu, ichidzakhobolewa , soma sikuti na manja ya munthu. ²⁶ Masomphenya ya maulo na machibese ndiyo yalewedwayo mchadidi. Soma ubise masomphenyayo, thangwe yamdzachitika patapita nsiku zizinji mtsogolo.'' ²⁷ Ndiye ine, Daniele, ndidakomoka ndichilefuka kwa nsiku zizinji. Kinangoko ndidalamuka, ndichichita basa la mfumu. Soma ndidadabwa nayo masomphenyayo, apo pakhalibe wina wakuyazindikirisa.