¹ Mgole lakutoma la mfumu Nebukadinezara mfumu ya ku Babulo, Daniele akhana atulo na masomphenya mu mtima mwache atagona pa kama wache. Ndiye adanemba ndibzo adaona kutulobzo. Iye adanemba bzakufunikira kwenekwene bzokhabzokha: ² Daniele adafokotoza, ''Mmaso mphenya yangu ndidaona kuti mphepo zinayi zakudzaulu zikhabvundula nyanza ikulu. ³ Bzilombo bzinayi bzikulu bzikulu, chirichense chakusiyana na chinzache, bzidabula kuchoka mnyanzamo. ⁴ Chakutoma chikhali ninga mphondolo soma chikhana maphapidwe ya chiomba nkhanga. Pomwe ndikhanyang'anisa, maphapidwe yache yadang'ambika chichidzusika kuchoka pamataka mkuima na nzayo ziwiri. ninga munthu. Mtima wa munthu udapasiwa kuna icho. ⁵ Kinangoko pakhana chilombo chachiwiri, ninga chimbalangondo, chitakotama; chikhana mbabvu zitatu pakati pa mano yache kukamwa. Chidauziwa, 'Lamuka upwetedze wanthu azinji.' ⁶ Bzitamanla ibzi ndidanyang'ana pomwe. Pakhana chilombo chinango, chomwe chikhaoneka ninga kambuku. Pamsana pache pakhana maphapidwe manayi ninga maphapidwe ya mbalame, apo chikhala misolo minayi. Chidapasiwa mphamvu yakutonga. ⁷ Bzitamala ibzi ndidaona masomphenya ya usiku chilombo chachinayi, chakupasa mantha, chakugopsa, na cha mphamvu maninge. Chikhana mano makulu yachitsulo; chidapwetedza, kuswa mmapidaso, chichipondedza kunzayo chakusaliracho. Chikhali chakusiyana na bzilombo bzinzachebzo, apo chikhana nyanga khumi. ⁸ Pomwe ndikhalingirira nyangazo,ndidanyang'anisa ndichiona nyanga ina ikuphuka pakati pa izo, nyanga ing'ono. Zitatu mwa nyanga zakutoma zire zidazuliwa na mizi kubodzi. Ndidaona pa nyangayi maso ninga maso ya munthu na pakamwa pomwe pakhalewa mwakuthembeza bzinthu bzikulu. ⁹ Pomwe ndidanyang'anisa, makadera yachifumu yadaikhiwa m'buto, apo Nkhalamba ya Nsiku zakale idakhala pakaderapo. Bzakubvala bzache bzikhali bzichena ninga matalala, apo tsisi pa msolo pache likhali ninga ukuse buchena. Kadera yachifumu yacheyo ikhagaka malambi ya moto, apo magudumu yache moto wakugaka. ¹⁰ Mkulo wa moto udayerera kubula pamaso pache; wanthu wakusaya kulewengeka adamtumikira oye, apo chulu cha wanthu wakusaya kulewengeka chikhadaima pamaso pache. Wakutonga milandu akhali pakatipo, apo mabukhu yadafunguliwa. ¹¹ Ndidapitiriza kunyang'anisa thangwera kubveka kwa mafala yakubzithembeza yakusewerewa na nyanga. Ndidaonerera pomwe chilombo chidaphiwa, apo thupi lache lidadzonongeka, chichiperekiwa kukatenthiwa. ¹² Zingakhala nyama zina zinayi zakusalazo, mphamvu yakutonga idapsokonyoliwa, soma miyoyo yawo idatalikisiwa kwa kanthawe. ¹³ Mmasomphenya yanguyo usikubo, ndidaona wina ali ,mkubwera mmitambo yakudzaulu ninga mwana wa munthu; iye adabwera pana Nkhalamba ya Nsiku zakale pale ichionekera pamaso pa iyo. ¹⁴ Mphamvu yakutonga na ulemerero na mphamvu za ufumu zidaperekiwa kuna iye kuti wanthu wensene, madzinza, na bziseweredwe bzimtumikire iye. Mphamvu yache yakutonga ni mphamvu yakusaya kumala yomwe imdzamala lini, apo ufumu bwache m'bomwe bumdzadzonongeka lini. ¹⁵ Ningakhala ine, Daniele, mzimu wangu udalasiwa mkati mwangu, apo masomphemya ndidaonayo mu mtima mwangu yadandiboneresa. ¹⁶ Ndidafenderera m'bodzi wa iwo wakuima popo mkumubvunza kundionesere kuthumbudzulira kwa bzinthu bzobzi. ¹⁷ Bzilombo bzikulu bzikulubzi, bzinayi, ni mafumu manayi ndiyo yamdzayambika pa dziko lapansi. ¹⁸ Soma wanthu wakuchena wa Mkulukulu wa Mdzauluyo amdzatambira ufumu, achidzakhala nabo ku nthawe za nthawe.'' ¹⁹ Ndiye ndidafuna kudziwa bzizinji bza chilombo chachinayicho--chikhali chakusiyana na bzinangobzo na chakupasa mantha maninge na mano yache yachitsulo na ntchala za mkuwa; chidapwetedza, kuswa mmapidaso, chichipondedza chakusala na nzayo zache. ²⁰ Ndidafuna kudziwa bza nyanga khumi pa msolo pache, na kanyanga kina ndiko kadaphuka, komwe nyanga zitatu zidagwa pansi patsogolo pache. Ndidafuna kudziwa bza nyanga ndiyo ikhana maso na bza pakamwa ndipo pakhasewera bzakuthembeza bzinthu bzikulu na ndicho chikhaoneka chikulu kuposa bzinzachebzo. ²¹ Pomwe ndidanyang'anisa, nyangayi idayambisa nkhondo kulimbana na wanthu wakuchena apo ikhawagonjesa iwo ²² kufikizana Nkhalamba ya Nsiku zakale ire idabwera, apo chilungamo chidaperekiwa kuna wanthu wakuchenawo wa Mkulukulu wa Mdzaulu. Kinangoko nthawe idakwana pomwe wanthu wakuchena adatenga ufumu kukhala bwawo bwawo. ²³ Ibzi ndibzo munthuyo adalewa, 'Chingakhala chilombo chachinayi, bumdzakhala ufumu bwachinayi pa dziko lapansi ndibo bumdzakhala bwakusiyana na maufumu yense. Bumdzapasula dziko lense lapansi, buchidzalipondedza buchidzalipsa mmapidaso. ²⁴ Zingakhala nyanga khumi, mu ufumu bumwebu mafumu khumi yamdzaphuka, apo bwina bumdzagandukira iyo. Bumdzakhala bwakusiyana na maufumu ya mmambuyomo, buchidzaposa mphamvu mafumu matatuyo. ²⁵ Iye amdzasewera mafala yakugazana na Mkulukulu wa Mdzauluyo achidzaboneresa wanthu wakuchena mtima wa Mulungu Mkulukulu wa Mdzauluyo. Amdzayezera kuchinja misinda ya madyerero na bzakutonga. Bzinthu bzimwebzi bzimdzaperekiwa mmanja mwache kwa gole libodzi, magole mawiri, na meya ya gole. ²⁶ Soma wakuzenga milandu amdzakhala ali mkati na basa lawo, achidzatenga mphamvu zache zaufumu mkuzimalisa na kuzikhudyula achizidzononga kuphampha kwache. ²⁷ Ufumu na utongi, na ukulu bwa maufumu ya pansi pa thambo lense, bzimdzaperekiwa kuna wanthu wakuchena mtima wa Mkulukulu wa Mdzauluyo. Ufumu bwache ni ufumu bwakusaya kumala, apo maufumu yina yensene yamdzatumikira na kumubvera iye.' ²⁸ Apa ndiye pakumalira nkhani. Ningakhala ine, Daniele, kukumbuka kwangu kudandikalipisa apo nkhope yangu idachinja maonekedwe. Soma ndidakoya bzinthu bzobzi mwa ine ndekha mwene.''