¹ Bzidamkomera Dariyo kuikha mu ufumubo dzana na makumi mawiri akazembe wa mphimpha kuti atonge ufumu bwensebo. ² Kukulambo kuposa iwo akhali akuluakulu atatu wakunyang'anira mabasa, apo Daniele akhali m'bodzi wa iwo. Akuluakulu wakunyang'anirawa adaikhiwa kuti ambazondere mabasa ya akazembe wa mphimphazo, kuti bza mfumu nampodi bzisayike. ³ Daniele akhali wakupambuka kuposa wakunyang'anira anzachewo na akazembe wa mphimphazo thangwera iye akhana mzimu wakupambana. ⁴ Ndiye akulu wakunyang'anira mabasawo na akazembe wa mphimphazo akhanyang'anisisa bzakuphonyesa m'basa ndilo Daniele akhachita ku ufumubo, soma alibe kuona chinyengo ayai bzakutazira m'basa lache thangwera iye akhali wakukhulupirika. Palibe bzakuphonyesa ayai kutazira basa kudagumanika mwa iye. ⁵ Ndiye amuna amwewa adati, ''Tikugumana lini thangwe lirilense lakudandaulisa kugazana na Daniele pokhapokha tichite kugumana chinthu chakugazana naye kukhudzana na chilamulo cha Mulungu wache.'' ⁶ Wakunyang'anira mabasa na akazembewa adabweresa nzeru pamaso pa mfumu. Iwo adati kuna iyo, ''Mfumu Dariyo, mukhale na moyo chikhalire! ⁷ Wakunyang'anira mabasa wense wa mu ufumubo, akazembe wa mphimpha, na akazembe wa mphimpha zikulu, alangizi, na akazembe adagumana pabodzi apo akumbuka kuti, mfumu, mupereke lamulo la chilambizo chakukhuma, kuti aliyense omwe amkumbira kuna mulungu wina aliyense ayai kuna munthu kwa nsiku makumi matatu, kupambula imwepo, mfumu, munthu umweyo athusiwe m'dindi la mphondolo. ⁸ Tsapano, mfumu, ikhani chilambizo na kunemba lamulo lakuti nampodi lichinje, kuteweza malamulo ya Amedi na Aperesi, yomwe yambachinja lini.'' ⁹ Ndiye mfumu idakhazikisadi lamulo, chilambizo. ¹⁰ Pomwe Daniele adabva kuti chitsamba chasinariwi kukhala lamulo, adayenda mnyuba mwache (tsapano mazenera yache yakhadafungula msubi yache ya mdzaulu kunyang'anisa ku Yerusalemu), achigodama na mabondo yache, ninga akhachitira katatu pa nsiku, achipemba na kupereka kutenda pamaso pa Mulungu, ninga akhadachitira pakutoma. ¹¹ Ndiye amuna atatuwa omwe akhadakhazikisa nzeru pabodzi adamuona Daniele akukumbira na kupsaga udidi kuchoka kuna Mulungu. ¹² Ndiye iwo adafenderera mfumu achisewera nayo bza chilambizocho: ''Kodi mulibe kukhazikisa chilambizo kuna aliyense kuti wakukumbira kuna mulungu wina zliyense ayai munthu mu nsiku makumi matatu, kupambula imwepo, mfumu, athusiwe m'dindi la mphondolo?'' Mfumu idatawira, ''Nkhaniyi yakhazikisiwa, kuteweza lamulo la Amedi na Aperesi; ingachinje lini.'' ¹³ Ndiye iwo adaitawira mfumuyo, ''Munthu ule Daniele, omwe ni m'bodzi wa akaidi wa kuchoka ku Yuda, akubvera lini imwepo, mfumu, ayai ku chilambizo ndicho imwe mwaikha. Akupemba kuna Mulungu wache katatu pa nsiku.'' ¹⁴ Pomwe mfumu idabva ibzi, idaipidwa maninge, ichikumbuka mu mtima mwache kuletsetsa Daniele ku chilamulochi. Iyo idaphata basa kufikizana kumira dzuwa kuyezerayezera kupulumusa Daniele. ¹⁵ Ndiye wanthu omwe adakonza chiwembuwa adagwezekana pabodzi na mfumu achiti kuna iyo, ''Dziwani, mfumu, kuti ni lamulo la Amedi na Aperesi, kuti palibe chilambizo ayai nemba ndilo mfumu yakhazikisa ndilo lingachinje.'' ¹⁶ Ndiye mfumu idapereka lamulo, achibweresa iwo Daniele mwemo, achimuthusa m'dindi la mphondolo. Mfumu idati kuna Daniele, ''Mulungu wakoyo, omwe umbamtumikira kwakusaya kulekeza, mbaakupulumuse.'' ¹⁷ Mwala udabweresewa pa msuwo pa dindi la mphondololo, apo mfumuyo idauyikha chilatizo cha iyo yokha na chilatizo cha akuluakulu wache kuti nampodi chinthu chichinje chakukhudza Daniele. ¹⁸ Kinangoko mfumu idayenda ku nyumba yache yachifumu ichiyenda kukatsotsa kudya usiku. Palibe chitsangalazo ndicho chidabweresewa pamaso pa iyo, apo tulo tudaichokera. ¹⁹ Ndiye kutachena mfumu idalamuka apo kamkulumize idayenda ku dindi la mphondolo lire. ²⁰ Pomwe idafendera ku dindilo, mfumu idachemera Daniere na mafala yaukali, kulewa kuna Daniele, ''Daniele, mtumiki wa Mulungu wa moyo, kodi Mulungu wako omwe umbamtumikira mwakusaya kulekezayo, wakwanisa kukupulumusa ku mphondolozo?'' ²¹ Ndiye adati Daniele kuna mfumu, ''Mfumu, khalani na moyo chikhalire! ²² Mulungu wangu watumiza mtumi wache apo zjai wafunga milomo ya mphondolozi, apo ziribe neye kundidzononga. Thangwe ndagumanika wakusaya thangwe pamaso pache na pamaso panu kubodzi, mfumu, apo ndiribe kukuchitirani chakuipa ine.'' ²³ Ndiye mfumu ikali yakusekera maninge. Idapereka lamulo kuti iwo amtenge Daniele kumchosa kunja kwa dindilo. Ndiye Daniele adadzusiwa mdzaulu kumchosa m'dindi. Palibe kudzonongeka kudagumanika pa iye, thangwe akhadakhulupirira Mulungu wache. ²⁴ Mfumu idapereka lamulo, apo iwo adabweresa wanthu omwe akhadazenga mulandu Daniele achiwathusa m'dindi la mphondololo--iwo, wana wawo, na akazawo. Iwo akanati kufika pansi pa dindilo, mphondolozo zidawaposa mphamvu zichibodola mafupa yawo mmapidaso. ²⁵ Ndiye Mfumu Dariyo idanembera wanthu wense, madzinza, na bziseweredwe bzakukhala mdziko lense lapansi: ''Mtendere uthimizirike pa imwe. ²⁶ Ndikutonga kuti madziko yensene ya mu ufumu bwangu wanthu atetemere na kugopa pamaso pa Mulungu wa Daniele, thangwe iye ni Mulungu wa moyo na wakukhalisa chikhalire, apo ufumu bwache mumdzadzonongeka lini, utongi bwache bumdzafika kuphampha. ²⁷ Iye ambatitchenkha na kutipulumusa, apo ambachita bzilatizo na bzakudabwisa kudzaulu na mdziko lapansi; wapulumusa Daniele ku mphamvu za mphondolo.'' ²⁸ Ndiye Daniele adapambana mnthawe yakutonga kwa Dariyo na nthawe yakutonga kwa Koresi wa ku Perisiya.