¹ Belitsazara mfumu adachita madyerero makulu ya chulu cha akuluakuliu wache, apo iye adamwa vinyu pamaso pa wanthu wense chuluwo. ² Pomwe Belisazarayo adalawidza vinyuyo, adalamula kuti abwerese bzakuikhira bzakukonzewa na oro ayai siriva ndibzo Nebukadinezara babache akhadabzichosa mkachisi wa ku Yerusalemu, kuti mfumu, akulu akulu wache, na akazache na akazache ang'ono amwere. ³ Akapolo adabweresa bzakuikhira bza oro ndibzo bzikhadachosewa kuchoka mkachisi, nyumba ya Mulungu, mu Yerusalemu. Mfumu, akuluakulu wache, na akazache na akazache ang'ono adamwera bzimwebzo. ⁴ Iwo adamwa vinyu achilemekeza mafano yawo yakukonnzewa na oro na siriva, mkuwa, chitsulo, miti, na minyala. ⁵ Pa nthawe imweyo bzala bza boko la munthu bzidaonekera kutsogolo kwa bzakumanikira kandiyero bzichinemba pa nyumba ya mtoto mnyumba ya mfumu. Mfumu idakwanisa kuona mbali ya bokolo pomwe likhanemba. ⁶ Ndiye nkhope ya mfumu idachinja apo bzakukumbuka bzache bzidampasa mantha; nkhongono zache zidagoboka, na mabondo yache yakhamenyana pabodzi. ⁷ Mfumu idakuwa kupereka chitongi kuna wale omwe akhabziti ambasewera na wanthu wakufa, wanthu wakupfunza, na wakubvimira nyengo. Mfumu idati kuna wanthu wa nzeru wa m'Babulo, ''Omwe angalewenge bzakunembabzi achikwanisa kundithumbudzulira amdzabvazikiwa nguwo ya chibakuwa na chibangiri cha oro mkhosi mwache. Iye amdzakhala na mphamvu za mkulu wachitatu mu ufumu.'' ⁸ Ndiye wanthu wa nzeru wensene wa mfumu adapita mwemo, soma alibe kukwanisa kulewenga bzakunembabzo ayai kudziwisa mfumu kuthumbudzulira kwache. ⁹ Ndiye Mfumu Belisazara idakalipa kwenekwene apo maonekedwe ya nkhope yache yadachinja. Akuluakulu wache adamala nzeru. ¹⁰ Tsapano mfumukazi idabwera mnyumba ya madyereromo thangwera ndibzo mfumu na akuluakulu wache adalewa. Mfumukaziyo idati, ''Mfumu, khalani moyo wamuyaya! Nampodi kubvuma kukumbuka kwanu kukubvuteni. Nampodi kuti nkhope yanu ichinje. ¹¹ Muna munthu mu ufumu bwanu omwe ana mzimu wa milungu yakuchena. Mnsiku za babanu, kutoya na kubvesesa na nzeru ninga nzeru za milungu bzikhagumanika mwa iye. Mfumu Nebukadinezara, babanu mfumu, adamuikah iye mkulu wa wamatsenga , kukhala pomwe mkulu wa wale ambabziti ambasewera na wanthu wakufa, wa wanthu wakupfunza, na wakubvimira nyengo. ¹² Mzimu wabwino, nzeru, kubvesesa, kuthumbudzula kwa atulo, kufokotoza nthanthi na kumalisa mabvuto-- bzakuthemera bzobzi bzikhagumanika mwa munthu umweyu Daniele, omwe mfumu Nebukadinezara adamchemera Belitsazara. Tsapano chemerani Daniele apo amdzakuuzani kuthumbudzulira.'' ¹³ Ndiye Daniele adam'bweresa pamaso pa mfumu. Mfumu idati, ''Daniele ndiwepo, m'bodzi wakuphatiwa ukapolo wa Yuda, omwe babangu mfumu adamubulisa mu Yuda. ¹⁴ Ndabva bza iwepo, kuti mzimu wa milungu uli mwa iwe, na kutoya na kubvesesa na nzeru zabwino ziri mwa iwepo. ¹⁵ Tsapano wanthu wa nzeru na wale akhambati ambasewera na wanthu wakufa akhadabweresewa mkatimo pamaso pangu kuti alewenge bzakunembewabzi na kundidziwisa kuthumbudzula kwache, soma alibe kukwanisa kundidziwisa kuthumbudzula kwa uthengabo. ¹⁶ Ndabva kuti iwepo ungakwanise kuthumbudzula na kumalisa milandu. Tsapano penu ungakwanise kulewenga mkundidziwisa kuthumbudzula kwache, umdzabvazikiwa nguwo ya chibakuwa na kukhala na chibangiri cha oro mkosi mwako, uchidzakhala na mphamvu ya wachitatu wakutonga mu ufumu.'' ¹⁷ Ndiye Daniele adatawira pamaso pa mfumu, ''Lekani mpfupo zanuzo zikhale zanu mwekha, na kupa mpfupo zanuzo kuna munthu wina. Soma, nimdzakulewengerani bzakunembabzi, mfumu, ndichikuuzani kuthumbudzula kwache. ¹⁸ Mungakhala imwepo, mfumu, Mkulukulu wa Mdzauluyo adapa Nebukadinezara babanu ufumu, ukulu, ulemerero, na chifumu. ¹⁹ Thangwera ukulu ndibo Mulungu adampasabo, wanthu wensene, madzinza, na bziseweredwe bzidatetemera bzichimgopa. Iye adapha omwe akhafuna kufa, achikoya na moyo omwe akhafuna kukhala na moyo. Iye adalamusa omwe iye akhawafuna, achichepsa wale omwe iye adafuna. ²⁰ Soma pomwe moyo wache udasanduka wakubzithusa na mzimu wache udauma mwakuti iye mkumbachita madumwa, adam'bulusa pa kadera yache yachifumu, iwo achimchosera ulemerero bwache. ²¹ Iye adachosewa pa umunthu, akhana moyo wa nyama, achikhala na mbidzi. Iye akhadya uswa ninga ng'ombe. Thupi lache lidatota na mame yakudzaulu kufikizana iye adazindikira kuti Mkulukulu wa Mdzauluyo ambatonga maufumu ya wanthu na kuwayikhira aliyense iye amfunayo. ²² Imwepo mwanachemwe, Belisazara, mulibe kuchepsa mtima wanu, napo kuti mudadziwa bzensebzi. ²³ Mudabzikuza mwekha kugazana na Mbuya wakudzaulu. Kuchoka mnyumba yache iwo adakubwereserani bzakutengera ndibzo imwe, akuluakulu wanu, akazanu na akazanu ang'ono adamwera mwemo vinyu, apo imwe mudalemekeza mafano yakukonzewa na siriva na oro, mkuwa, bzitsulo, miti, na minyala--mafano ndiyo yambaona lini, kubva, ayai kudziwa chinthu chirichense. Mulibe kulemekeza Mulungu omwe ambaphata mphuye yanu mmanja mwache na omwe ambadziwa njira zanu zensene. ²⁴ Ndiye Mulungu adatuma nsonga ya boko lache kuchoka pamaso pache apo kunemba uku kudanembiwa. ²⁵ Uku mkunemba ndiko kudachitika; 'MENE, MENE, TEKEL, UFARSIN.' ²⁶ Uku ndiko kuthumbudzula kwa uthengabo: 'MENE,' 'Mulungu walewenga ufumu bwanu mkubumalisa.' ²⁷ 'TEKEL,' 'mwapimiwa pa mphimo yakulemera muchigumanika wakuperewera.' ²⁸ PERES,' ufumu bwanu bwagawanika buchiperekiwa kuna Amedi na Aperisi.''' ²⁹ Ndiye Bilisazara adapereka lamulo, apo iwo adabvazika Daniele nguwo yachibakuwa. Chibangiri cha oro chidaikhiwa mkhosi mwache, apo mfumu idalalikira bza iye kuti iye amdzakhala na mphamvu za mtongi wachitatu mu ufumubo. ³⁰ Usiku bumwebo Belisazara, mfumu ya ku Babulo, idaphiwa, ³¹ apo Dariyo Mmedi adatambira ufumu pomwe akhana magole pafupifupi makumi matanthatu na mawiri yakubadwa.