¹ Mfumu Nebukadinezara adatumiza mtumi umweyu kuna wanthu wensene, madzinza, bziseweredwe bzakukhala pa dziko lapansi: Mtendere wanu mbauthimizirike. ² Bzandikomera kukuuzani bza bzilatizo na bzakudabwisa ndibzo Mkulukulu wa Mdzauluyo Mulungu wandichitira. ³ Bzilatizo bzache bzikulirenyi, na bzakudabwisa bzache mpsa mphamvu! Ufumu bwache m'bwakusaya kumala, na kutonga kwache ku mibwado na mibwado.'' ⁴ Nebuakdinezara, akhakhala mwakudekedwa mnyumba mwache, apo inembo ndikhajombwera na vida myumba yangu yachifumu. ⁵ Soma atulo ndiwo ndikhanawo adandichitisa mantha. Pomwe ndidagona mwemo, bzibvulibvuli ndibzo ndidaona na masomphenya mu mtima mwangu bzidandiboneresa. ⁶ Ndiye ndidatuma mtumi kundibweresera wanthu wense wa nzeru wa mu Babulo pala kuti akwanise kundithumbudzulira atulo pamaso pangu. ⁷ Ndiye adabwera wamatsenga, wale akhambati ambasewera na wanthu wakufa, wanthu wakupfunza, na wakubvimira nyengo. Ndidawauza atulowo, soma alibe kukwanisa kundidziwisa kuthumbudzula kwache. ⁸ Soma pakumaliza pache Daniele adabwera---omwe ambamchemera Belitsazara kuteweza dzina la mulungu wangu, na omwe mwa iye muna mzimu wa milungu yakuchena--apo ndidamuuza atulowo. ⁹ Belitsazara, mfumu ya wamatsenga, ndikudziwa kuti mzimu wa milungu yakuchena uli mwa iwe na kuti palibe chinsinsi chimkunesa iwepo. Ndiuze maonekedwe ya atulo wangu na kuthumbudzula kwache. ¹⁰ Ibzi ndibzo ndidaona mu mtima mwangu pomwe ndikhagona pakama wangu: ndidanyang'anisa, apo pakhana muti pakati pa dziko lapansi, apo kutalika kwache kukhali kukulutsa. ¹¹ Mutiyo udakula uchikhala wa mphamvu. Nsonga yache idakhuya kudzaulu, apo ukhaonekera kumalekezero ya dziko lense lapansi. ¹² Masamba yache yakhali yakudeka, bzipaso bzache bzikhali bzakuwanda, apo mwemo mukhana chakudya cha wense. Nyama zakuthengo zikhapsinga mthunzi pansi pache, na mbalame zakudzaulu zikhakhala mmitawi yache. Bzinthu bzense bza moyo bzikhadya mwemo. ¹³ Ndidaona mu mmaso mphenya mwangu pomwe ndidagona pakama wanguyo, apo mtumi, wakuchena udabuluka kuchoka kudzaulu. ¹⁴ Iye adakuwa achiti, 'Gwesa mutiyo usadze mitawi yache, upulule masamba yache, na kumwaza bzipaso bzache. Leka nyama zithawe patsinde pachepo na mabalame zimbuluke mmitawi yache. ¹⁵ Siya chitchichi cha mizi yache mmataka, manga na mkombero wachitsulo na mkuwa, pakati nakati ya uswa butete bwa mthengo. Buleke butote na mame yakuchoka kudzaulu. Uleke ukhale na nyama pakati pa bzakumera bza mmataka. ¹⁶ Leka mtima wa iye uchinje nampodi ukhale mtima wa munthu, apo leka iye apasiwe mtima wa nyama kufikizana magole manomwe yapite. ¹⁷ Chigazanochi adachitonga wamitumi, chiganizo chakukonzewa na wakuchena, pala kuti wale wa moyo adziwe kuti Mkulu wa Mdzauluyo atonge maufumu ya wanthu achiyapa aliyense amfunayo kuyaikha pa iwo, neye kuna wanthu wakubzichepsa chaiwowo.' ¹⁸ Ine, Mfumu Nebukadinezara, ndikhala atulo amwewa. Tsapano iwe, Belitsazara, ndiuze kuthumbudzula kwache, thangwe palibe wanthu wanzeruwa mu ufumu bwangubu angakwanise kundithumbudzulira. Soma iwe umkwanisa kuchita tenepo, thangwe mzimu wa milungu yakuchena uli mwa iwe.'' ¹⁹ Ndiye Daniele, omwe akhachemerewa pomwe Belitsazara, adadabwa kwenekwene pa nthawe yakumuuzayi, apo kukumbuka kwache kudamtsautsa. Mfumuyo idati, ''Belitsazara, nampodi kubvuma atulo ayai kuthumbudzulakwache kukukalipse.'' Belitsazara adatawira, ''Mbuyangu, atulowa angadakhala wa wanthu wakukuwengani; kuthumbudzula kwache kukhale kuna iwo wakukuwengani. ²⁰ Muti mudaonayo--omwe udakula uchikhala wa mphamvu, apo nsonga yache mkukhuya kudzaulu, yomwe ikhaonekera dziko lense lapansi-- ²¹ omwe masamba yache yakhali yakudeka, na bzipaso bzache bzakuwanda, mwakuti bzikhali chakudya cha wense, apo patsinde pache nyama zamthengo mkuona mthunzi wakupsinga, na omwe mbalame za mdzaulu zikhakhala--- ²² mutiyu ndimwepo, mfumu, imwe omwe mwakula mphamvu. Kukula kwanu kwakuladi mkufika kudzaulu, na kutonga kwanu kwafika kumalekezero kwa dziko lense lapansi. ²³ Imwe, mfumu, mudaona mtumi, wakuchena kubuluka pansi kuchoka kudzaulu mkulewa, 'Gwesani mutiyo muudzononge, soma siyani chitchichi na mizi yache mmataka, mangani na mkombero wachitsulo na mkuwa, pakati nakati ya uswa butete bwakuthengo. Ulekeni utote na mame yakudzaulu. Ulekeni ukhale na nyama zakuthengo kufikizana magole manomwe yapite. ²⁴ Uku mkuthumbudzula kwache, mfumu. Mchilamulo cha Mkulu wa Mdzauluyo ndicho chakufikirani imwe, mbuyangu mfumu. ²⁵ Mumdzathothewa pakati pa wanthu, muchidzakhala na nyama mthengo. Mumdzadya uswa ninga ng'ombe, muchidzatota na mame yakuchoka kudzaulu, apo magole manomwe yamdzapita kufikizana mutazindikira kuti Mkulu wa Mdzauluyo akutongadi maufumu ya wanthu nakuti ambayapa kuna aliyense amfunayo. ²⁶ Ninga kudatongewa kusiya chitchichi cha mizi ya mutiyo, mu njira yoyi ufumu bwanu bumdzabwezeresiwa kuna imwe kuchoka pa nthawe ndiyo muti mudzazindikire kuti kudzaulu kukutonga. ²⁷ Mthangwerache, mfumu, lekani langizo languli likudekereni. Lekani kuphonya mkuchita bzakulungama. Bwererani ku bzakuipa bzanu pakuonesa chifundo kuna wakutsautsika, apo nthawe ya mtendere wanu imdzatalimpha.'' ²⁸ Bzinthu bzensebzi bzidachitika kuna Mfumu Nebukadinezara. ²⁹ Miyezi khumi na miwiri itapita iyo ikhafamba pansodzi pa nyumba ya banja lachifumu m'Babulo, ³⁰ apo idati, ''Kodi uyu ni Babulo lini mkulu, ndiye ndammanga pala kukhala banja lachifumu, na mphamvu yangu na ulemerero bwa ufumu bwangu?'' ³¹ Mafala yakali pa milomo ya mfumuyo, mafala yadabwera kuchoka kudzaulu: ''Mfumu Nebukadinezara, bzalengeziwa kuna imwe kuti ufumubu bzachosewa kuna imwe. ³² Mumdzathothewa pakati pa wanthu, apo muyi wanu umdzakhala na nyama mthengo. Mumdzadya uswa ninga ng'ombe. Magole manomwe yamdzapita kufikizana mudzazindikire kuti Mkulu wa Mdzauluyo akutongadi maufumu yense ya wanthu apo ambayapa kuna aliyense amfunayo.'' ³³ Lamuloli lakugazana na Nebukadinezara lidachitika kamkulumize. Iye adathothewa pakati pa wanthu. Adadya uswa ninga ng'ombe, apo thupi lache lidatota na mame yakudzaulu. Tsisi lache lidatalika ninga matenga ya chiomba nkhanga, na ntchala zache zidakhala inga ntchala za mbalame. ³⁴ Mkumala kwa masiku Ine, Nebukadinezara, ndidakwiza maso yangu kudzaulu, apo nzeru zangu zidandibwerera. ''Ndidalemekeza Mkulu wa Mdzauluyo, apo ndidalemekeza na kumchitira ulemu iye wakukhala kwa muyaya. Thangwe kutonga kwache mkutonga kwakusaya kumala, apo ufumu bwache m'bwakukhalisa ku mibwado na mibwado yense. ³⁵ Wanthu wense wakukhala pa dziko lapansi ambatengewa kuti mchinthu lini kuna iye; iye ambachita pakati pa mathimu yakudzaulu na yakukhala wa dziko lapansi mwakuthemera chifuniro chache. Palibe angalewe kuna iye, 'Thangweranyi mwachita ichi?''' ³⁶ Pa nthawe ibodzibodziyo nzeru zangu zidabwerera kuna ine, ufumu bwangu na kuyetima kwangu kudandibwerera thangwera ulemerero bwa ufumu bwangu. Wakundiyeruza wangu na akuluakulu adapsaga udidi bwangu. Ndidabweresewa ku kadera yangu yachifumu, apo neyembo ukulu bwakuwanda chaibo budaperekewa kuna ine. ³⁷ Tsapano lino ine, Nebukadinezara, nimbalemekeza, kukwiza, na kulemekeza Mfumu yakudzaulu, thangwera bzakufuna bzache bzense mpsachadidi, na njira zache mzakulungama. Iye angachepse iwo wakufamba mkunyadira kwawo.