¹ Pamene Yabini mfumu ya Hazari, yecimvwa ici, etuma uthenga kwa Yobabu, mfumu ya Madoni, ku mfumu ya Simroni, na mfumu ya Akisafu. ² Etuma soti uthenga ku mafumu onse benze kuvyalo vakumalupili yakumpoto, mu cigwa ca msinje wa Yorodani kum'mazulo kwa Kinereti, mu malo onkhazikika, na ku Napoti Dori mpaka kum'mwela. ³ Etuma soti uthe ku Akanani bakum'mawa naku m'mwela, ba Amori, a Hiti, a Perizi, a Yebusi mu malupili, na a Hivi pa lupili la Herimoni mu malo ba Mizipa. ⁴ Bankhondo bao onse ewela nao, namba ikulu ya bankhondo, mu namba monga ni mchenga wa mba;i mwa nyanja. Benze na namba ikulu ya abulu na akavalo. ⁵ Mafumu onse aba bekumana pa nthawi yoikika, ndipo bemanga misasa pa manzi ba Meroni kucita nkhondo na Israeli. ⁶ Yehova eciti kwa Yoswa, "osayopa pamenso pao, cifukwa mailo nupeleka banthu bakufwa ku banthu a Israeli. Ukalemalishe abulu bao, na kushoka akavalo bao." ⁷ Yoswa na analume onse ba nkhondo bewela. Befwika mwazizi pa manzi ba Meromi, na kunyata adani. ⁸ Yehova epasa adani mu manja ba Israeli, ndipo ebapaya na kubakonkha mpaka ku Sidoni, Misrefoti Maimu, na ku cigwa ca Mizipa ku m'mawa. Ebapaya kuti paliye nangu wopulumukapo umozi elalako. ⁹ Yoswa ebacita monga mwecimulamulila Yehova. Elemalisha abulu bao na kushoka akavalo. ¹⁰ Yoswa ewelela pa nthawi ila na kukata Hazari. nakupaya mfumu yake na cibemba. (Hazari enze mukuleni pa maufumu onse aba.) ¹¹ Bepaya camoyo ciliconse cenzemo, ndipo eviika pambali kuti vionongewe, teto kwenzevye camoyo ciliconse cesalila. Teto eshoka Hazari. ¹² Yoswa etola mizinda yonse ya mafumu aba. Ekata soti na mafumu bao onse na kubapaya na kosilizyila kwa cipula. Ebasilizyilatu na kosilizyila kwa cipula, monga mwamene Mose mtumiki wa Yehova elamulila. ¹³ Israeli aliye shoke mzinda uliwonse wemangiwa pa zitunda, kufumya Hazori. Weve weka Yoswa eshoka. ¹⁴ Bankhondo bezitolela vopoka vonse ku mizinda iyi pamozi na vibeto. Bepaya munthu aliyense na kosilizyila kwa cipula mpaka onse kufwa. Baliye siye camoyo cufuza. ¹⁵ Monga mwamene Yehova enzelamulila Mose, mu njila imozi, Mose elamulila Yoswa, ndipo teto Yoswa ecicita. Aliye siyeko ciliconse cosacita pa vonse vamene Yehova elamulila Mose kuti acite. ¹⁶ Yoswa etols mslo onse: malo yakulupili, Negevu yonse, malo onse ba Gosheni, mnyansi mwa malupili ya myala, cigwa ca msinje wa Yorodani, malo ba malupili ba myala ba Israeli, na malo onkhazikika. ¹⁷ Kufuma ku lupili la Halaki pafupi na Edomu, kuya kumazulo mpaka ku Bala Gadi mcigwa pafupi na Lebanoni pansi pa lupili la Herimoni, ekata mafumu onse na kubapaya. ¹⁸ Yoswa ecita nkhondo kwa nthawi itali na mafumu onse. ¹⁹ Kuliye mzinda olo umozi wenkhala na mtendele na banthu ba Israeli kufumyako a Hivi benzonkhala ku Gibiyoni. ²⁰ Pakuti ni Yehova ekosesha mitima yao kuti bacite nkhondo na Israeli, kuti abaonongeletu posacita cifundo, monga mwenzelamulila Mose. ²¹ Ndipo Yoswa efwika pa nthawi iyo na kuononga Anakimu. Ecita ici ku calo camalupili, pa Hebroni, Debiri, Anabu, na mu vyalo vonse vam'malupili ya Yuda, na m'amalupili onse ba Israeli. Yoswa ebaonongelatu na mizinda yao. ²² Paliye wa Anaki esala mu malo ba Israeli kufmyako pa Gaza, Gati, na Asidodi. ²³ Teto Yoswa etola malo onse, monga Yehova euzyila Mose. Yoswa epeleka monga coloba ku Israeli, ku mtundu uliwonse. Ndipo malo benze na mpumulo ku nkhondo.