¹ ''Yoyishi ghufumu gho diwiru wa kupitura nowe thinda tha dipya ghoyu ghana shwaya mathikuthiku kukashana harughani no dipya dyo vinyo. ² Munyima gha kuyuvire no harughani no pondo yo fotji mu diyuwa, gho gha tumeghene mu dipya dyo vino. ³ Gho gha shwaghire gha yende karo mu ruvedhe ro ghuhatu no gho gha ka monine hamwe ha rughani hanemana hana ku rendarenda mu maghurithero. ⁴ Koku wa ninga kwendi eshi, 'Namwe mu yende mu dipya dyo vinyo, no nganyi ne mupe ghoyi ya rogha. Ghopo gho ha yendire ku ghurughana. ⁵ Karo gho gha yendire mu ruvedhe ro gho kwoko no thofotji no karo mu ruvedhe ro ghu kwoko no yine, no gho gha tendire shika kengeya. ⁶ Gho gha ku hukurukire karo mu ruvedhe dho dikumi no thofotji gha yendire gha ka wanine hamweya ha nemana hana ku renda-renda, koku wa ninga kwagho eshi, 'Yine munemanena popo diyuwa dyo diheya mwa ku rendarenda?' ⁷ '' Koku ninga kwagho eshi,'' Yoyishi mbadiko ghoyu ghana tu shana.'' Koku wa ninga kwendi eshi, ''Ghamwe namwe mu yende mu dipya dyo vinyo.' ⁸ Ghopa kwa kumine ko runguro, thinda sha dipya koku ninga kwendi moraghuri eshi, 'withe harughani no ha tapere ghiwana yaho, kutangerera ko gho munyima kare ko ghokutanga.' ⁹ '' Ghopa ha keyire harughani howaya haka shaniwire mu ruvedhe dho dikumi no thofotji, keheyu gha tamburire pondo. ¹⁰ Ghopa ha keyire harughani ho mutango, ha yedhekirire eshi nganyi ha tambure wingi, ene naho ha tamburire pondo yo fotji keheyu. ¹¹ Ghopa ha tamburire ghiwana yawo, ha nyenyine no thinda tha dipya. ¹² Ha ningire naho, 'ghoha harughani hana kara netu vene ruvedhe rofotji mu ghirughana, ene muna ha tendi mayovu netu, ghatwe twa ghondho no maghukukutu gho diyuwa no motenya gho ghukuru.' ¹³ ''Ene thinda gha huthire, koku ninga ghumwe wagho eshi, 'mushere, mbadi nina ku tendera ghuyi. Mbadi ghuna kuyuvu nange no pondo yo fotji? ¹⁴ Shimbe ghiwana yoye ghuyende. Nina tororora kupa ghowa harughani hoha hana shaniwa munyima shika kengemwe. ¹⁵ Kenge ne mutandu ngeshi lutenda ghoyi naku shana no yiwana yange? Endi dyo diho dyo mutjima gho ghuyi yoyishi no munongo?' ¹⁶ Eshi gho munyima nganyi gha kukare gho mutango, no mutango ghaye munyima, marukwaro gho mawa gho karekare mbadi ghadi no Hengi gho wa hethiwa, ene hapu ghowa ha tororiwa.'' ¹⁷ Ghopa Jesusi gha yendire ku Jerusalema, gha shimbeghere pa mbadi gho wa hasha dikumi no yiwadi, ''ene mu ndhira koku ninga kwendi, ¹⁸ ''Mu mone, ko twakuenda ku Jerusalema, ene Mwana Munu nganyi ghaka tapiwe kwa ha Prieste gho hakuru no hatjangi ho marukwaro, nyanyi haku mo pangwere yifa ¹⁹ no ghoha kamo tape kwa hahendani eshi, naho ha moheke, haka mu mwashure, no gho ha kamu pamarere pa thikurushe. Ene mudiyuwa dyo ghuhatu nganyi ghaka phinduthiwe.'' ²⁰ Muna Zebediya ko kwiya kwa Jesusi no hanendi gho tutughuru ha wadi, ko kuna furumana paghutho dhendi no gha rombire yinu mwendi. ²¹ Jesusi gha ningire kukwendi eshi, Yipi ghoyi ghona haka? Gho ha ningire eshi, ''Raghure eshi ghowa hanange ha wadi gho tutughuru ngo ha ka hungumane, yofotji mu dyoko dyoye dyo rudyo no yofotji mu dyoko dyoye dyo rumoho, mu ghufumu ghoye.'' ²² Ene Jesusi koku hutha no gha ningire eshi, ''mbadi muna ku dimuka eshi, ''Yipe mwa ku kumbera. Mudi no ghundondoro ghoku mwa thinwitho ghothi na rokera ku nwa? Ghoha ningire eshi, '' Twa ndondoro''. ²³ Gho ha ningire eshi, '' mu thinwitho nganyi mwa ku nwemo, ene ku hungumana ku dyoko dyange dyo rudyo no dyoko dyange dyo rumoho mbadi yame gho ku yitapa, ene yoha howa tate gha na roghithera. ²⁴ Ghopa hakathishonhero hasha dikumi hayi yuvire, ha karire no ghupata mu hanu na mukurwendi ha wadi. ²⁵ Ene Jesusi gha hethire kukwendi no gha ningire eshi, ''Mwa dimuka eshi hapitereri hawa hedani hadi no veta popaheya mo mwaho, no ghoyu gho mukuru katughuru ghana tendithanga veta mumwawo. ²⁶ Ene mbadi ya rokera ko kara no dhi ndhira mo mwenu. Yoyishi, keheno gha ku rumbera ko kara mokuru mo mwenu gha rokera ku kara mupika ghoye. ²⁷ Ene keheyu gha rombera ko kara gho mutango mu mwenu gha rokera ko kara mupika ghoye, ²⁸ Shika kenge Mwana Munu mbadi gha keyire kuna rughaniwa, ene ku rughana, no ku tapa ghuparo gha kuna ghuura wo hengi.'' ²⁹ Ghopa ha yendire ha shwaye mu Jeriko, mbunga dho dhikuru dha wa thiyarire munyima. ³⁰ Kwa karire no ha tutughuru hawadi ho ku pira ku mona pa mbadi dho ndhira. Ghopa ha yuvire eshi Jesusi ko ghana kupita, ha kuyire, ''Fumu Mwana Dafite tu yuvere tjitju. ³¹ Mbunga gho dha wa shingire, pa ku wa ninga eshi ha porere, ene hoha dirire ku wiru thikuma, ''Fumu, Mwana Dafite, tu yuvere tjitju.'' ³² Ghopo Jesusi ghemanine no wa hethire ku kwaho gha ningire eshi, '' Yipe mwa ku rumbera ngoni mu tendere?'' ³³ Koku muninga eshi, ''Fumu, eshi ngo meho ghetu ngo gha yandhuruke.'' ³⁴ Ghopo Jesusi gha yendire ku kwaho no thinyeke, gha kwatire meho ghaho, popo ghoha tamburire kumona kwaho ene ghoha mu thiyarire munyima.