¹ Apa Jesusi na wakathishongero wendi ha kumine pepi na Jerusalema na Batfage, kudirundu dyo ndhwe, gha tumine hakathishongero wendi gha wadi, ² ghoninga ku kwawo eshi, ''Mu yende kudighumbo dyo pepi nganyi mu ka wane thidongi tho kughangerera, thidi no thidongighana. Mu kayishuture no muka yirete ku kwange. ³ Ngeshi ghumwe ghakaghambe kukwenu thinu, mukaninge eshi, ''Fumu ghana kayishana no nganyi gha kayihuthe wangu.'' ⁴ Yakarire kemo eshi yighamba ya muporofeta eyi ghaghambre eshi, ⁵ ''Tongwere Siyoni eshi, 'mone, Fumu ghoye ghana kwiya ku koye, ghu kumbirupitha no ghana dhine pathidongi- pathidongighana ne murongegherero.'' ⁶ Podiwo ha kathishongero wendi hayendire no hakatendire thika di gha wa rawerire ⁷ Jesusi. Ha ka retire thidongi no thidongighana ghoha yarirepo yivata yawo, na Jesusi gha hungumanine pa mwaye. ⁸ Wingi ghombunga ha yarire mwaye dhawo mundhira, no hamweya ha tjorire mite dho yitondo no kudhiyara mundhira. ⁹ Mbunga dha yendire paghutho wa Jesusi no waha murandire munyima ha shogherire ghuninga eshi, '' Ghusho kwa mwana Davita! Ghafumane yu ghana kwiya mudina dya Fumu! Ghusho mumawiro!'' ¹⁰ Apa ghenginine Jesusi mu Jerusalema, ko kukuninga-kinga mbada dhodhihe, ''Yidye yu?'' ¹¹ Mbunga dhahuthire eshi, ''Ghoyune muporofeta Jesusi wa Nasareti muGalaleya.'' ¹² Ndani Jesusi ghengenine mutembeli. Gha tjidhiremo wahe wa ha ghurire no kughuritha mu tembeli, gha yundaghurire matishi ghawakakutjitha manyinga ni yipuna yawakakughuritha makutji. ¹³ Ghawa tongwerire eshi, '' Yapwa kutjanga! Ndhugho dhange mbo hana dhi toyo eshi ndhugho dho ndapero; Ghamwe ne ho muna dhi tendi thitunguru thawashondoro.'' ¹⁴ Munyima heyire kukwendi hahunga nawa yinhwere, naye gha werukithire. ¹⁵ Ene pa ha monine yitetukitha hapristeri hohakuru nawa kamarukwaro eyi ghatendire, no apa hayuvire hanuke hana kushogherera mutembeli ghuninga eshi, Ghusho kwa mwana Davita, ''hapatire thikuma. ¹⁶ Kokumutongwera kwawo eshi, Ghuna yuvu yi hana kukushomonona waya ndi?'' Ha wa hutha Jesusi eshi, ''Nhi! Mbadi mwa toya eshi, Kushwagha mutumwa twa wanahuke nowa muna kurera dyo sho ha mu kutekere ndi? ¹⁷ Ndani Jesusi gha wa thighire no gha shwaghire mumbara gha yende ku Betaniya ghoku gha kararire. ¹⁸ Mathiku-thiku pakuhuka ku mbara, gha fire ndhara. ¹⁹ Apa gha monine thitondo thoghukuyu kumbadi dhondhira, ku kuyenda ko no mbadiko yi gha kawanine ko, shimengwa mahako pithagho. Ha ningi ku kwatho eshi, ''Mbo kufere kuroruheya eshi kwima karo mbuyo,'' popo vene kokukukutera thitondo thoghukuyu. ²⁰ Apa hayimonine hakathishongero hayapire no haningire eshi, Ngepi di thina kukuta thitondo thoghukuyu pawanguwangu?'' ²¹ Jesusi ghawa hithire no ghawaningire eshi, ''Shemwa na kumutongwera, ngeshi mwa kara nomatawero no mbadi muna kutamangera, mbadi mbo mu tenda vene ko yi nina tendi ku thitondo tho ghukuyu, shime karo kuninga ku dirundu eshi, Dhiruke no ghu kumwaghere mu dikuruviya,'shemwa mbo yina kareka. ²² Yoyiheya yi mbo mu kumbera mundapero, ngeshi ha mutawa mbo muna wana.'' ²³ Apa Jesusi ghengenine mutembeli, ko kumwiyera hapresiteri no hakuru hodiko ghoku ye pakuhonga no haningi eshi, ''No ngcamu munye ghuna kutenda we yinu yi, no dye ghadhi kupa ngcamu thi? ²⁴ Kokuhutha Jesusi no kuwaninga eshi, ''Name kuna kumwipura dipwero dyo fotji. Ngeshi mu nitongwere, name nganyi ni mumutongwere eshi nongcamu munye na kutenda yinu yino. ²⁵ Diyoghere dya Johannesi ne- Kupi dya tunda? Kwa Nyambi endi kwa wanu?'' Ko kughambathana kwawo eshi, ''Ngeshi tuninge eshi kudiwiru ho ghatuninge eshi, Yinye mwa dhirire ku mutawa? ²⁶ Ene ngeshi tuninge eshi, 'kwa wanu, 'tuyape mbunga yoyishi hanu ha mu monine Johannesi yira muporofeta.'' ²⁷ Ko kuninga kwa wo kwa Jesusi eshi, Kadi ya kudimuka twe.'' Ha wahutha naye, ''Name mbadi sho ni mu tongwere eshi, nongcamu munye na kutenda yinu yi. ²⁸ Nye muna kughayara mwe? Katughuru gha karire no hana ho hatutughuru hawadi. Gha yendire ko gho mbedi no gha ningire eshi, 'Mwanange, yende ghoka rughane kudipya dyo vinyu.' ²⁹ ''Mwanendi gho katughuru gha huthire no gha ningire eshi, 'Mbadi shoniyende, munyima gha kughayarire no gha yendire. '' ³⁰ Ndani katughuru gha yendire kwa mwanendi ghothirandambedi no gha ghambire yinu yofotji. Gho ghahuthire no gha ningire eshi, 'Nanyi ni yende, mukadikuto, ene mbadi gha yendire. ³¹ Yidye mwa hanendi hohatutughuru gho yu gha tendire mahimeno gha wihawo?'' Gho ha ningire eshi, Gho mbedi.'' Jesusi haghamba ku kwawo, ''Ghushemwa na kumutongwera, ha ketithi no haka rungu mbo hana ngeni mughufumu wa Nyambi kughutho wenu. ³² Yoyishi Johannesi gheyire ku kwenu mundhira dho ghuhunga, ene mbadi mwa mutawire. Ene mwe, ngambi muna kughamba yi, mbadi mwa pirukire munyima no kumutawa. ³³ Mutegherere dighanekero dimwe. Kwa karire katughuru, gha karire no dipya. Gha tapekire dipya dyo vinyu, gha turireko ruthito ro mawe. Ha tjukuthikameno no kumbadi dhatho gha shokekire ko kataratara ko makungero. Munyima ko kupaka ko handjimi. Gho gha yendire muditunga dimwe. ³⁴ Ghapa rwa rikanyine ruvedhe ro romukokoro gho mbuyo, gha tumine hapikendi hamwe kwa wa ndjimi ho vinyu ha kamuretereko mbuyo. ³⁵ Ene handjimi hakwatire hapikendi hapumurire yofotji, ha payire ghumwe, no kuvukuma ghumwe no mawe. ³⁶ Karo thinda tha dipya hatumine hapikendi hamwe, kupiterera hokutanga, ene handjimi hatendire ku kwawo thika waya. ³⁷ Munyima, gha tumine mwanendi ku kwawo gho ninga eshi, 'Nganyi ha ka kutekere mwanange.' ³⁸ ''Ene apa handjimi ha monine mwamendi, ha ghambathana eshi, 'Ghoyu ne yo mukakuyora. Mwiye, tumo paghe no tutumbure yiyora yendi.' ³⁹ Kokumukwata kwawo no kumuvukumena panunda dho dipya no kumupagha. ⁴⁰ Pa kuhuka keho thinda sha dipya, ngepi keho edi shaghatende kowa handjimi? ⁴¹ Ha muningire eshi, ''Aye ghana kuwadhongonona wa hanu ho hamango no ndhira dho dhimango, no kutapa dipya kwawa ndjimi hamwe, ho kumureteranga mbuyo mu ruvedhe dhi dha rikanya po.'' ⁴² Jesusi ghawatongwerire eshi, ''Mbadi mwa toya muyitjanga eshi, 'Diwe di ha mwaghire hombi, shemwa dhodina kara diwe dyo dishonga. Eyi ne kwa Fumu ya shwaya, ene thitetu mu meho ghetu'? ^{43 44} Yodigho na kumutongwera, Ghufumu wa Nyambi mbona ghu mukungura no kughutapa kudiko di mbo di ka para mbuyo dhagho. Noyomuhe yu mbogha wera padiwe di mbo ghana hayaghuka. Ene noyu mbo diwera mbo ghana hoghoroka.'' ⁴⁵ Apa hayiyuvire Haprestire hohakuru na Wafarasayi yitetukitho ya Jesusi, kokudimuka kwawo eshi wo ghana kuninga. ⁴⁶ Po hashanenine kumukwata, ene ha yapire mbunga, yoyishi wo ha mumonine yira muporofeta.