¹ Munyima ghopa Jesusi gha manine mangando gha, gha fundhukire mu Galaleya gha ghendire ku thiko tha Judeya mu thambo dho rware rwa Jorotane. ² Mbunga shokuru dha mu thigharire munyima , no gha werukithire . ³ Hafarasai heghire kukwendi, no ha mu yerekire, ha mu ningire gheshi, ''pa rughera veta gheshi katughuru gha mwaghe mbuyama wendi po kehe thino ndi?'' ⁴ Jesusi gha mu huthire gheshi, ''ka di mwa tara gheshi ghoyu gha wombire pa mutango gha wa tendire mbuyama no katughuru? ⁵ Ghoyu gha wombire karo, ' no ndava dhi katughuru nganyi gha ku thighe ha nyina na wihe gha ku ku pakere no mbuyama wendi, mu ghuwadi wagho mbo hana kara thinu tho fotji. ⁶ Yoghishi mbadi hawadi keho, hanyama dho fotji. Munyima gho wa nyambi gha pakerera , mbadiko gho ku wa yakunutha. ⁷ Ha mu huthire gheshi, '' ngepi keho ghodi Moshe gha tu raghurire pa ku tapa mbapira dho ghikuyakunuka no ku mu huthera ku kwawo?'' ⁸ Ghaghe gha wa ningire gheshi, ''' mu ghukukutu gho metjima dhenu, Moshe gha mu raghure ku mwagha hambuyama wenu , mara pa mutango kadi dyo pa karire. ⁹ Nina ku mu ninga keho gheshi, kehono gho ku mwagha mbuyama wendi, shimengwa pa rungu, gho ku yeka ghumweya, pa ku rangeka ku wa yeka, no katughuru gho ku yeka mbuyama ghoyu gha mwaghiwa gha na tendi rungu. ¹⁰ Hakathishongero thendi ha mu ningire gheshi, ''ngeshi dyo padi pa katughuru no mbuyama wendi, ghughi keho ngepi pa ku yeka.'' ¹¹ Jesusi gha wa huthire gheshi, ''mbadi keheno gho ku tambura ghihonga ghi, shimengwa wa ha shutweriwa ku ghi tambura. ¹² Kwa karire no hadhike ku shwagha mu mekogha dhawa nyokwawo, ko hadi hadhike ghowa hanu ha wa tendire ghudhike, no karo ko hadi hadhike gho wa ha kara kemo mu ndava dho ghufumu gho ku diwiru. Ghoyu gho ku twetha ku tambura mangando gha, ngo gha gha tambure.'' ¹³ Munyima ha retire hanuke ho hambiru gheshi gha wa pake nyara no ku wa paka ndapero, hakathishongero thendi ha mu shingire. ¹⁴ Jesusi gha wa huthire gheshi, '''mu thighe hanuke heye ku kwange , mwa wa shinga yoghishi ghufumu gho diwiru ne wagho.'' ¹⁵ Gha wa turire nyara , no gha shwaghire ku ku ghenda. ¹⁶ Podigho katughuru gheghire kwa Jesusi no gha mwipurire gheshi, ''Muhongi, ghuhunga munye na roghera ku tenda gheshi na ka wane ghuparo gho roruheya?'' ¹⁷ Jesusi gha mu huthire gheshi, nye sha ku nipura no yo ghihunga? Yofotji keho gho muhunga, ngeshi ko ghuna ku shana kengena ku ghuparo, thighare mandaghano munyima.'' ¹⁸ Katughuru gha mwipure gheshi, '' mandaghano ghapi?'' Jesusi gha mu huthire gheshi, '' mbadi wa roghera ku pagha, mbadi wa ku rangeka, mbadi wa kwidha, mbadi wa ku shwaghitha ghushupi gho mbudhi, ¹⁹ kutekere wiho na nyoko, hake mughendhoghe shika di wa ku haka,'' ²⁰ Mungau ko ku mu ninga kwendi gheshi, '' yoghiheya ghi na ghi kutekeranga. Ghipi na roghera ku tenda karo?'' ²¹ Jesusi gha mu huthire gheshi, '' ngeshi ghuna rumbera ku rogherera po paheya, ghende, gho ka ghurithe gho ghi wa kara nayo, gho ka pe hahepwe, nganyi keho wa ku kare no ghushwi ku diwiru; gho ka huke no ni thighare munyima.'' ²² Ghopa mangau gha yuvire kenge, gha ghendire no tjitju mutjima, yoghishi gha kara no ghushwi gho wingi. ²³ Jesusi gha ningire hakathishongero thendi gheshi, '''ghushemwa nina ku mu tongwera , gheshi ghukukutu ngepi kwa mushwi gheshi ghengene ku ghufumu gho ku diwiru. ²⁴ No karo ghuredhu shemwa gheshi ngameno ghengene mu diho dyo thonga ku pita mushwi mu kwingena ku ghufumu gho diwiru.'' ²⁵ Hakathishongero thendi pa ha yuvire ghinu ghi, ha tetukire no ha ghambire gheshi, ''ghidye keho ghoyu gha ku parithiwa?'' ²⁶ Jesusi gha wa kengire no gha ghambire gheshi, '' kwa wanu ne ghukukutu, mara kwa Nyambi ne kehethino ka diko tho ku kangana.'' ²⁷ Podigho Peturushi gha mu huthire gheshi, '' mone keho twa thigha kehethino no twa ku thighara munyima. Ghipi keho ghi twa ku wana po?'' ²⁸ Jesusi gha wa huthire gheshi, '' ghushemwa nina ku mu tongwera gheshi, mu thiku dho thipya ghopa mwana munu gha ku ka hungumana mu thipuna tho ghufumu, ghamwe mwa ni thighare munyima namwe nganyi mbo mu ka hungumane namwe mu ghipuna yo dikumi no ghiwadi, mwa ku raghure diko dyo Israela dyo dikumi no ghuwadi. ²⁹ Keheno gha thigha mayugho, haminendi ho tutughuru, handumbudhendi, wihe,nyina, hanendi, ghendi ditunga dyendi mu ndava dho dina dyange nganyi gha ku wane makumi dikumi gho ku pita po ghi gha wanine no nganyi gha ku wane ghuparo gho roruheya. ³⁰ Thingi thawo wa hadi pa ghutho nganyi ha ku kare munyima, ho munyima nganyi ha ku kare pa ghutho.