¹ Pa ruvedhe ro hakathisongero heyire kwa Jesusi no haningi eshi, ''Yidye gho mukuru mu ghufumu gho diwiru?'' ² Jesusi ghethire mwanuke gho mumbiru ku kwendi, gha muhungumeka mukatji kawo, ³ no ghaningi eshi, '' Ghushemwa na kumutongwera, shimenga ghupiruke no ghukupiture yira mwanuke ghomumbiru, mbadiko edi mbowingena mu ghufumu gho diwiru. ⁴ Podiwo, keheyu ghokukumbirupitha thinda thika yu mwanuke gho mumbiru yo mukuru mughufumu gho diwiru. ⁵ Keheyuno gho kukara mwanuke gho mumbiru thika yu ko kunitambura mudina dyange. ⁶ Keheyu gho kupemukitha yofotji gho pawanuke wa hokutawa mu mwange, hasha ku mughanga no diwe dyocwa-cwa muthingo no kumufunga kumuvukumena mudikuruviya. ⁷ '' Mawe neke kukaye koyukupemukitha! Yinu yo kenge yo kuhokoka ya hokokanga, ene mawe kwamunu yu ghana kuyireta! ⁸ Ngeshi hadikuharuritha dyoko dyoye endi dipathi kukwange, di tete ko no kudi shwaghithe papoye. Hasha kukoye kwingena mumoyo no mukongo ngambi no ghurena kadi yira wa kukuvukumena mu mudiro ghororuheya ghoye mawadi no mapadhi ghoye. ⁹ Ngeshi diho dyoye hadi kupemukitha, korongore no divukume gho dishwaghe ku koye. Hashakukoye pakwingena mu moyo no diho dyo fotji kadi yira wa kukuvukumena mudirara dyo mudiro ghudi no meho ghoye ghomahe. ¹⁰ Mwa nyatha keheyu ghowa hanuke. Kuna kumutongwera ku diwiru haengeli wawo ha kenganga kehepano murupara rwa tate ghomudiwiru. ¹¹ Yoyishi mwana munu gheyire mukuna shutura ghowa hayongara. ¹² Yinye muna kughayara? Ngeshi munu gha muna ndjwi dithere, ha yongarapo yofotji mbadi gha roghera kuthiya dhisa makumikwoko no kwoko no dhire kumadyero no kuyenda ghaka shane yofotji ghoyu gha yongara? ¹³ Ngeshi ghana muwana, ghushemwa na kumutongwera, ghana kumu shamberera kupitakana dho mathere kwoko no kwoko no dhine ghothi tha dhira kuyongara. ¹⁴ Kemo, mbadi yihima ya wihetu gho mudiwiru kowa hahambiru eshi hayongare. ¹⁵ '''Ngeshi mughendhoye ghana kuyipithera, yende ghokamuthighaghure mu mughuwadi wenu. Ngeshi gha kutegherera, ghuna kuhutha muyendhoghe. ¹⁶ Ene ngeshi shime ghakatwara ndundu shime withe ghumwe endi hawadi, podiwo shi mu tunwa twa wanu hawadi endi hahatu ho ghushupi kehe dhino ngando dhina kupwa ku kumithamo. ¹⁷ Ngeshi ha shwena ku hategherera, tongwere mbunga. Ene ngeshi mbadi ghana kutegherera ku mbunga shime muyendithe nowe thika haheghidani no haketithe. ¹⁸ Ghushwemwa nakumitongwera, kehe thino mbomu ghanga pakaye mbo thinapu kughangiwa kudiwiru, no kehethino mbo mushutura pa kaye mbothinapu kushuturiwa kudiwiru. ¹⁹ Nina kumutongwera karo, ngeshi ha wadi hopapenu ha kutawedha pa kaye ku kehethino mbo ha kumbera, nganyi gha kuyiwatendere tate gho kudiwiru. ²⁰ Yoyishi ngeshi hawadi endi hahatu hapongana pofotji mudina dyange, popo mbona kara mukatji kwawo.'' ²¹ Ndani Petrusi gheyire nogha ningire kwa Jesusi eshi, ''Fumu, rungatji shoni thigherere muyendhange ghoku ghana yipitha kukwange? Kate rukwoko no ruwadi ndi? ²² Jesusi gha mutongwere eshi, ''mbadi nina kukuninga eshi kwoko no ruwadi ene makumi kwoko no mawadi, kukwoko no ruwadi. ²³ Podiwo ghufumu gho diwiru wa kupitura yira fumu oyu ghana kuyuva mwawaguva wendi. ²⁴ Pakukuyuva, mupika ghumwe ha muretire kwa mukudi wendi gho yu gha mu korotire mayovi dikumi. ²⁵ Yoyishi mbadi gha twethire kumuhuthera, pogharawerire eshi ha mughurithe pofotji na mbuyama wendi no hanendi no kehethino gha wana no gha ruwere mukudi wendi. ²⁶ Podiwo mupika gha wererire pamuve, gha fumbererire ku kwendi no ghaningire eshi, '' Mukadikuto, kare mutjima gho ghure nange no nganyi na ku kuruwere kehethino. ²⁷ Kemo mukadikuto wendi tha muyarerire thinyeke, gha muthiyire no ghamukwarerire murandu wendi. ²⁸ Mupika gha shwayire no gha kawanine muyendhendi oyu ghakarire no murandu ghoghupu. Ghamukwatire no ghatangire ku mupuma ghuninga eshi, Niruwere eyi wanikorota.' ²⁹ Muyendhendi gha wererire pamuve no gha mu kumberire ghughamba eshi, ''kare ghure mutjima nange, nganyi na kukuruwere.'' ³⁰ Mupika ghokutanga gha shwenine. Ghamu twarire mu kashitiko kate gha kukure eyi gha mukorota. ³¹ Apa hayendhendi hamonine eyi yahokokire, yawa tokotithire. Ghoheyire no hanatongwerire hekudyawo kehe thino tha hokokire. ³² ''Apa ya mupika gheyire kwa kudhendi gha mwithire no gha muningire eshi, 'Ghowe mupika gho muyi, nanyi kukwaterire yo yihe eyi wanikorotire yoyishi wa nikumberire. ³³ Yipi ghuna dhire kukara thinyeke kwa muyendhoghe, thika edi na karire thinyeke ku koye?' ³⁴ Muraghuri wendi gha patire no ghamutapire haka munyandeke kate gha kuruwere yoyihe eyi gha korota. ³⁵ Kemo na tate gho mudiwiru dyo mbogha kukutenda ngeshi mbadi mboghu thiyerera muyendhoghe kushwagha mumutjima ghoye.''