¹ Munyima dho mayuwa kwoko no djofotji Jesusi gha shimbire Petrusi, Jakobusi na Johannisi minendi no twarire kudirundu djo dire pithagho. ² Gha pirukire paghutho dhagho. Rupara rwendi gho rwa munekire yira diyuwa, no thivata thendi tha pirukire ghu kenu yira thishe. ³ Mone, popo kuko monakara kwagho Mosesi na Eliya ghoku hamba nagho. ⁴ Petrusi ghogha huthire kwa Jesusi eshi, ''Fumu, ghowa ku kwetu ku kara pano. Ngeshi ghu hime nganyi nitende pano yishashara yihatu- tho fotji thoye, notho fotji tha Mosesi ndani tho fotji tha Eliya.'' ⁵ Gho ku shime ha ghamba, mone divuyi dyo dikenu dja wathikire, no popo, diywi dja shwayire mu divuyi, dya ningire eshi, '' Gho yune mwanange gho muhakwa, mu mwendi nakurupera. Mumu tegherere.'' ⁶ Apa haka thishongero wendi ha yuvire yinu yi, gho ha werire padive no marupara no ha yapire thikuma. ⁷ Ndani Jesusi gha keyire no ghawa kwatire no gha ningire eshi, ''Mu pinduke no mwayapa.'' ⁸ Ndani ghoha kengire ku wiru ene mbadiko ghoyu ha monine shimengwa Jesusi vene. ⁹ Apa ha shurukire kudirundu, Jesusi gho gha rawerire no kuninga eshi, ''Mwa tongwera yimona yi kwa keheyu katepa Mwana Munu mbogha pinduthiwa mwa wafu.'' ¹⁰ Haka thishongero wendi gho ha mwipurire eshi, '' Yinye keho ha ka marukwaro ha ninga eshi Eliya yo mbo gha tanga kwiya?'' ¹¹ Jesusi gha huthire noku ninga eshi,'' Eliya ko mbo gha keya yoghushemwa no ku na huthera yino yoyihe. ¹² Ene na ku mu tongwera eshi, Eliya ne karekare gha keya, ene mbadi ha mudimukire. Mukengeyo, ha tendire kehethi ha shanine mu mwendi. Mu ndhira dho dho Mwana Munu naye karo mbogha nyande mu moko ghagho.'' ¹³ Ndani haka thishongero wendi gho ha tjwathanine eshi na Johannisi gho muka diyoghero ghana kughamba. ¹⁴ Apa ha henyine ku dingi dya wanu, katughuru heyire kukwendi, gha tongamine ku ghutho wendi no gha ningire eshi, ¹⁵ ''Fumu, kare thinyeke mwa mwanange gho katughuru, yoyishi thipwereredhi no gha nyanda thikuma. Yoyishi kehepa ghana weranga mu mudiro ngambi mu meyu. ¹⁶ Nina mureta kwa ka thishongero ghoye ene mbadi hana muporitha.'' ¹⁷ Jesusi gho ghaha huthire ghu ninga eshi, ''Kupira matawero no kupira kuyuva ghamwe wa hanahoka, ghure gho ngepi na ku kara nenu? Mu murete kuno kwange.'' ¹⁸ Jesusi gho gha shingire mupepo ghoghuyi nowa shwayire mu mwendi, no mungaghu gho gha porire moro ruvedhe. ¹⁹ Ndani haka thishongero wendi heghire mu ghudhindo no ha ningire eshi, Yinye natwe twa kupira kughushwayitha?'' ²⁰ Jesusi gho gha ningire ku kwagho eshi, '' Yoyishi matawero ghenu mambiru. Ghushwemwa na kumutongwera, ngeshi mudi no matawero ngambi mambiru thika dinona dyo mbuto, kukona muninge kudirundu edi eshi, dhiruke popa ghu yende paya,'no nganyi diyende, no mbadiko eyi mboyikanga kukwenu.'' ²¹ Ene mopepo ghoghuyi ghu, mbadi wakushwaya shimengwa no ndapero no kukuyumena yidya. ²² Apa ha karire mu Galaliya, Jesusi gho gha ningire kwa ka thishongero wendi eshi, '' Mwana Munu nganyi mbogha tapiwe mu manyara ghawanu, ²³ no mbo hana mupaya ene mu diyuwa dyo ghuhatu mbo hana mupindutha.'' Haka thishongero wendi gho ha patire thikuma. ²⁴ Apa heyire mu Kaparanaumu, ha tutughuru ha wadi gho ha hashimbire diketo ha keyire kwa Petrusi no ha mu ningire eshi, ''Muhongi ghowe mbadi wa kutapa maketo ndi? ²⁵ Gha ningire eshi, ''Nhii.'' Apa Petrusi gheyire mu ndhugho, Jesusi gho gha ghambire nendi rokutanga no gha ningire eshi, ''Yinye ghuna kughayara, Petrusi? Kwa dje Mafumu gho pamuve hana shimbanga maketo? Kwa hanagho endi ko ha mweya?'' ²⁶ ''Ko ha mweya,'' Petrusi gho gha huthire. '' Podiyo hana hapwa kushuturiwa,'' Jesusi ghamu huthire. ²⁷ Ene mbadi tuna tendanga haka kushimba diketo ha haruri, yende kudi kuruviya, ka mweyeremo dirovo, noghu shwayithe thi gho kutanga ghoyu ghona kwata. Apa shoghu yandhurure kwanwa kendi, nganyi gho wane sherenyi. Mushimbe no kamotape kwa wa ketethi ko kwange no kukoye.''