¹ Ndani Hafarasaghi ha mweya no hakamatjango heyire kwa Jesusi hana kushwagherera mu Jerusalema. Ha ningire eshi, ² ''Pa shanye ghamwe mwaka thishongero muna kupira kuyuva thitjo tha wa kuru? Yoyishi mbadi hana kuyogha manyara ghagho pakutja ghuroto.'' ³ Gha wa huthire no ku watongwera eshi, hinye keho muna kupira kuyuva veta dha Nyambi mu ku kunga thitjo thenu? ⁴ Nyambi gha ghambire eshi, ''fumaneke wiho na nyoko,' ene karo gho ku ghamba ghuyi kwa wihe na nyina gha ghoghera kufa.' ⁵ Ene mwe mwa kughamba eshi, 'kehemunu gho ku ghamba kwa hiwe na nyina, ''ke he gha maghamweno mwa tamburire mu mwange ghana kukara ndupu kwa Nyambi, ⁶ ghoya munu ne mbadi gha roghera kufumaneka wihe. 'Mu maghendithero gha ghuna tendera diywi dya Nyambi munyaranyara. ⁷ Ghamwe mwa ku kuvingirika! Isaya gha pumbire ghushemwa yo kuhamena ku kwenu ghopa gha ningire eshi, ⁸ 'Hanguva ghowa hana kunetendera no muromo ene mutjima dhango kayenda nange dhidi. ⁹ Ko muna kunikarera munyaranyara yoyishi ko muna ku honga yihonga no veta dho thitjo.'' ¹⁰ Ghethire mbunga thiye kukwendi no gha wa ningire eshi, ''mutegherere no mutjwathane - ¹¹ mbadiko dho kwingena kukamwa dho kwipitha munu. Shimengwa, thokushwaya mukwanwa, ghothi tho diyo tho kwipitha munu.'' ¹² Popo hakathishongero he yire kwa Jesusi gho ku ghamba eshi, '' Ghuna dimuka shine ha Farasayi ghopa hana yuvu ngando dhi ne ghana yuvu tjitju ku mutjima?'' ¹³ Jesusi ko ku wa hutha eshi, kehethino thitondo tho kuninga shime Tate wange gho ku diwiru mbadi ghathikuna ne tha ku dhura po. ¹⁴ Muwa thiye pathagho, yoyishi ghaka mithi wawakunga. Ngeshi mukunga ku koka mukunga mughendhendi hana kuwera wahe mudikwina. ¹⁵ Petrusi gha huthire gho kuninga kwa Jesusi eshi, ''Tupathwerere pa thihonga thi. ¹⁶ Jesusi ghaningire eshi, '' mbadi muna tutjwathana ndi? ¹⁷ Mbadi muna kumona eshi kehethino thina kwingena mukamwa thi pete mudira ndani thika shwaghere kununda? ¹⁸ Ghene yinu yo ku shwaya mu kanwa ne yo ku shwaya mu mutjima. Yo yinu yo ku yipitha munu. ¹⁹ Podiyo yinu yo ku shwaya mu mutjima ne ku shwaya mu ghiyedhekera yo ghiyi, ghipagha, rungu, kutjora, widhi, mbudhi no yighamba yo ghutothi. ²⁰ Ghoyi yo yinu yo kuyipitha munu. Mbadi kudya no nyara dho didhiro mbadi wakuyipitha munu.'' ²¹ Podiyo Jesusi gha shwayire pa pagho kuku yenda ku mukonda gho doropa tho Tirusi no Sidoni. ²² Popo, mukamadi gho mu Kanana ghana kushwaya pothothiko. Gho ku kuyerera thikuma gho ku ninga eshi, '''Nifere nyeke , Fumu wange, Mwana Dafita! Mwanange gho mukamadighana ghuna mungeni mupepo wa Shatani.'' ²³ Ghene Jesusi ne mbadi ghamuhuthire no diywi temba. Haka thishongero wendi heyire ku kwendi no kumukumbera no kuninga, eshi, ''mudjithe ko ghana kutu yoghotewa.'' ²⁴ Mara Jesusi ghokuwa hutha eshi, ''mbadi gha nitomena kwa keheno shimwengwa ndwi dho kuyongara mu ndhugho dho Israeli.'' ²⁵ Ghene gha keyire no kutongama paghutho wendi gho kuninga eshi, Fumu, ni ghamwene.'' ²⁶ Ghokupirura kwendi eshi, mbadi pa roghera kushimba ghuroto wa hanuke ghoku ghumwayera tumbwaghana.'' ²⁷ Ghoku hutha naye eshi, '' Shemwa, Fumu, no tumbwaghara tuna kudya ghufefere gho ku wa kuthidyero tha hekudyatho.'' ²⁸ Ndani Jesusi ko kumuhutha kwendi eshi, ''Mukawadi, matawero ghoye ne makuru; no yihima yoye yikare ghomu ghuna kuyihima.'' Mwanendi gho mukamadighana gherukire popo. ²⁹ Jesusi gha shwaghire mu dho dyango dho no gha yendire dikuruviya dya Galaliya. Ndani koku dhina kwendi kudi rundu gha ka hungumanine. ³⁰ Mbunga dho dhingi dheyire ku kwendi . Gha retire nagho nawayihwere, hakunga, yipurupuru na wa kutjora no hamweya ho hengi no wa ha wa turire paghutho wendi ghawa wirukithire. ³¹ Mbunga dha tetukire apa dha monine ha ghipurupuru ghana kughamba, ghihwere ghana ghirukitha, hana kutjoka ndjewandjewa, haghihwere kuyenda na wa kunga kuna ku mona. Ha kughire Nyambi wa Israegheli. ³² Jesusi ko kwitha ghakathishongero wendi ko kuwa ninga eshi, '' Nina fera sheke mbunga yoyishi hana kara mayuwa mahatu ene mbadiko yo ghana kudya. Mbadi nina kushana ku wa tuma ko kayenda ku mbadiko yi ghana di mana sho ha pwerere ku ndhara.'' ³³ Hakathishongero wendi koku muninga eshi, ''kupi shotuwane ghuroto ghoku kwana dhino mbunga mudimboreya? '' ³⁴ Jesusi ko ku wa ninga eshi, '' ma ghuroto wa ngatji mudi nagho?'' Ko kuninga kwagho ma ghuroto kwoko no thi.'' ³⁵ Jesusi koku tongwera dikonga eshi di hungamane pa muve. ³⁶ Ko kushimba kwendi ghuroto kwoko no ma wadi no thi, munyima dho kupandura ko kushimba ghuroto ko kupa hakathishongero thendi. Hakathishongero ko ku tapa ghuroto ku di konga. ³⁷ Hanu wa heya ha dire ku kuta. Ndani gho ha kongawedhire ghikote yo muyambo ku yi yaritha no yi ya thiyarireko ku ghuroto. ³⁸ Ghowa hadire ne mayovi mane ku shaghithako hakamadi no hanuke. ³⁹ Jesusi ne kokutuma dikonga eshi di huke ene ghaye gha peramine mu wato ko kuyenda ku Magadani.