¹ Jesusi ghopa gha manine ku ragha hakathishongero thendi ho dikumi no ghuwadi, gha shwaghire po no gha ghendire ghu honga no ku yaghura mangando mu madoropa. ² Ghopa Johanisi gha yuvere ghitenda ya Jesusi mu dorongo, gha tumithire muraghitho no hakathishongero thendi no ³ gha ghambire gheshi, '' yowe wa roghera kwiya ndi , ghendi twa ku shane ko ghumweya?'' ⁴ Jesusi gha wa huthire no ku wa ninga gheshi, '' mu ghende mu ka tongwere Johanisi ghoghi muna ku mona no ghi muna ku yuva. ⁵ Hakakufameho ko hana ku mona, hakaghurema gho maghuru ko hana ku ghenda, hakaghingondwe ko hana kwiruka, hakakufamatwi ko hana ku yuva, hakakufa ko hana ku para,, mangando gho ghuhunga ko ghana ku tapiwa kwa wa hepwe. ⁶ Ghoyu ghana ku pira ku pata ku ghinu ghi gha kandathekiwa. ⁷ Ghopa hatutughuru wa ha ghendire mu maghira ghawo, Jesusi gha ghambire no mbunga na Johanisi, ''ghinye wa ghendere gho ka mone ku mamboreya- kambu ka na ku punga ku mupepo? ⁸ No karo ghipi wa ghendere ghu ka mone- katughuru ghana shupata , ghishupata yo ghwotughwotu? Shemwa, ghowa ho ku shupata ghishupata yo ghwotughwotu mu ndhugho dha fumu ha kara. ⁹ No karo ghipi mwa ningire mu ka mone- muporofita ndi? Kemo, nina ku mu ninga keho gheshi, no ku pitakana muporofita. ¹⁰ Ghoyu ne yo dighe kwa tjangiwa nendi, ''mu mone, ko nina ku mu retera mutumiwa paghutho dho marupara ghenu, ghoyu gha ku mu roghithera ndhira dho paghutho.'' ¹¹ Ghushemwa nina ku mu tongwera, mo wa ha waniwa kwa wa mbuyama mbadiko gho mukuru ku pita Johanisi gho mukadiyoghero. Karo gho ku nyathiwa mu ghufumu gho diwiru mukuru papendi. ¹² Ku tanga ku mayuwa gha Johanisi gho mukadiyoghero, ghufumu gho diwiru wa nyandire thikuma , no hanu ho runya ha ghu shimbire no ngani. ¹³ Haporofita waheya no veta ha porofitire kate kwa Johanisi, ¹⁴ no karo ngeshi ghuna himi ku ghu tambura, yodighe Eliasi gho yu gha kwiya. ¹⁵ Ghoyu ghadi no matwi gho ku yuva, nganyi gha yuve. ¹⁶ Nonye sho ni fanikithe ghowa hanahoka? Ghira hanuke hana ku pepera mu maghurithero, hana hunguma no kwitha hamweya mbo ¹⁷ ha ninga gheshi, ''tuna mu shikera kaghoroghoro, no mbadi muna kini. Tuna tokata mbadi muna diri. ¹⁸ Yoghishi Johanisi mbadi gheghire ghu dya ghuruto no ku nwa waghini, no ha ninga gheshi, '' ghadi no mupepo gho ghughi. ¹⁹ Mwana munu ne gheghire ghu dya no ku nwa, no ha ninga gheshi, mo mone katughuru gho madyaghi no ditahwa , mbusha wa ketithi na wa ghipithi! Ndani ghutari wa roghithiwa no ghitenda. ²⁰ Podigho Jesusi gha tangire ku shinga mambaraghumbo ghomu wingi gho ghitenda yedyi shokuro ghoghi ya tendiwire, yoghishi mbadi ha kwerire. '' ²¹ Mawenee , Chorazini! mawenee, Bethesaida! Ngeshi ghitenda shokuru ghoghi ya tendiwire mu Tyre no Sidoni ghi ya tendiwire mumwenu, ngo ha kwerire kare mu ghishupata yo ngugho no mututwi. ²² Mara keho nganyi ya ku tamburiwe ku Tyre no Sidoni mu diyuwa dyo maghatwero kupita mwe. ²³ Ghamwe, Kaperename, ko muna ku ghayara gheshi ngayi mwa ku yeyuriwe ku diwiru ndi? Kaa, nganyi mwa ku huthiwe pa muve ku Hadesi. Ngeshi ku Sodoma kwa tendiwire ghitenda shokuru ghoghi ya tendiwire mumwenu, ya roghera keho ngo shime ya karere no dyarero. ²⁴ Ko nina ku mu ninga keho gheshi nganyi kwa ku kare ghuredhu ko ditunga dya Sodoma mu diyuwa dyo mapangwero kupiterera mwe.'' ²⁵ Mo ro ruvedhe Jesusi gha ghambire gheshi, ''na kukugha we tate, Fumu gho diwiru no ditunga, yoghishi wa horekire ghinu ghi kwa wa nyanyami na wa ka kutjwathana, ghowa ghi hokwere ko kwawo no hanuke ho hambiru. ²⁶ Tate ghoghi ya roghera mu meho ghoghe. ²⁷ Ghinu yoghiheya ya tate gha ghi ni pa, no kadiko ghoyu gha dimuka mwana shime ngwa Tate, no mbadiko ghoyu gha dimuka Tate shimengwa mwana no keheno ghoyu mwana gha ku torora ku ku negha mumwendi. ²⁸ Mwiye ku kwange, mwahe mwakakutwama no mepanongo dho dhiremu, no nganyi na ku mu pe maturumuthero. ²⁹ Mu shimbe joko dhange no mu ku honge mumwange, yoghishi no muporothi no ghure mutjima,no nganyi mwa ku wane maturumuthero gho mingu dhenu. ³⁰ Yoghishi joko dhange dhiredhu no mupango wange ghupu.''