¹ Jesu ou aulumukile kutunda pa mukinya, mungi wa anu awopo amushupwela. ² Nehoni, mukambumba ayepo keya kukwenji no kunakinyama posho thzenji, no kuamba, ''Fumu, ngeci wahima, watwesha kunipolisha.'' ³ Jesu ayepo olola lyoko lyenji nokumukwata, ayepo amba, ''Nahima. Opole.'' Popo mwene mbumba thzenji thzopo thzipola. ⁴ Jesu ayepo mu ambela, ''Omone ci koambela munu yomuhe. Othze, okalimonahalishe kwa mupulisita, kalo okape shipiwa ou atumenine Mushe, ci ukale upaki kukwo.'' ⁵ Ou akeile mu Kapenauma, mukakuendisha mashwalale ayepo keya kukwenji, ayepo namulomba ⁶ no kuamba ci, ''Fumu, mupika wange onalala kunjiyo katwesha kulinyenganyenga kalo ayuva kukola nene.'' ⁷ Ne Jesu ayepo mu ambela ci, ''Kenge nikeya nanimupolishe.'' ⁸ Mukakuendisha mashwalale ayepo tawa no kuamba, ''Fumu, kaniloelile ci oingene munjiyo thzange. Oambe pohuma liywi ne mupika wange kenge apola. ⁹ Mukonda name nomunu oyu napiwa kuendisha, ne nili no mashwalale awa ali mushi thzange. Ne apa niambela yumweya ci, 'Othze,' pohuma athza, kalo apa niambela yumweya ci, 'Okeye,' pohuma akeya, no mupika wange apa nimuambela ci, 'Okwame ei,' pohuma aikwama.'' ¹⁰ Jesu apa ayuvile kengeyo, kuma akomokile ne ayepo ambela awa amushupwelile, ''Yoshemwa namiambela ci, nishime kuwana munu okulitawa kengeya mu Isilaele. ¹¹ Namitongwela, owangi kenge akeya kutunda ku muve yuwa noku wiko, nokunakala pofoci ku methsa na Abrahama, Isaka, no Jakobo mu ofumu o kuwilu. ¹² Unone ana oufumu kenge akonjeliwa mu milema thzo pola, oko kwakukala kulila no kukweca maeo.'' ¹³ Jesu ayepo ambela oyo mukakuendisha mashwalale ci, ''Othze! Eci eli onalitawa, kukwamahale kengeyo kukoe.'' Oyo mupika ayepo pola omo mushikati esho mwene. ¹⁴ Jesu ou akeile mu njiyo thza Pitolosi, ayepo mona ngumwenya Pitolosi kunalala kukola fivele. ¹⁵ Jesu ayepo kwata lyoko lyenji, no fivele po thzimushiya. Ayepo katuka no kumukwamena. ¹⁶ Lungulo, anu awopo aleta kwa Jesu anu owangi awa nakala no mipepo thzo thzimango. Ayepo tundisha mipepo ko liywi no kupolisha wahe awa nakolo. ¹⁷ Omu moliyo nakuyalisheleliwa ei yaambiwile ko Isaya mupolofita, kuamba ci, ''Aye shemwa onashimbi kukola kwetu no mawethzi etu.'' ¹⁸ Honi Jesu ou amonine mungi wa anu wamuthzingulukile, ayepo tumena ci ayavukele mu sambwa thzo likulu lwale lyo Galilea. ¹⁹ Nehoni mun'oli yumweya ayepo keya kukwenji no kuna amba ci, ''Mufundishi, kenge nikushupwela kokuhe oku othza.'' ²⁰ Jesu ayepo muambela ci, ''Mbwawa thzili no mateke, inyunyi yo muwilu ili no italatala, unone Mwana Munu aye kali nopa po kulangeka mutwi wenji.'' ²¹ Yumweya wa afundishiwi po mu ambela ci, ''Fumu, onitawethze tango nithze nikavumbeke tata wange.'' ²² Unone Jesu ayepo muambela ci, ''Onishupwele, oshiye afu avumbeke afu o.'' ²³ Jesu ou aingenine mu shisepe, afundishiwi enji awopo amushupwela nawo ku kukengenamo. ²⁴ Nehoni, akopo kukeya lipepo lyo likulu pa likulu lwale, shisepe ashopo shithsikiwa ko man'ithsingi. Unone Jesu aye kunalala tulo. ²⁵ Afundishiwi awopo akeya kukwenji no kunamupindula, kwa amba ci, ''Otuyoyishe, Fumu; twaafa!'' ²⁶ Jesu ayepo waambela ci, ''Ine muyapa, amwe aka shitawo shoshionye?'' Honi ayepo katuka no kuanjipela mupepo no likulu lwale. Akopo kututwala. ²⁷ Awo akwelume akomokile no kuamba, ''Munu ongepi oyu, ci shianga mupepo no likulu lwale yamuyuvela?'' ²⁸ Jesu apa akakumine musanmbwa mulitunga lyo Magadaleni, akwelume eli awa akalile no mipepo thzothzimango awopo aliwana nenji. Kuma atundelelile ku malalo kalo neli akala no uanji manene, ci kwithsa mukakuenda oyu natwesha kupita elyo likun'wa. ²⁹ Nehoni, awopo akuwelela no kuamba, ''Tukukwame ngepi, mwana Nyambi? Ei ne onakeya kuno kunatuipisha shikati koshishime kukwana?'' ³⁰ Honi kwakalile mulaka o ngulu thzothzingi ethzo thzalyelelile popepi napo. ³¹ Madimona aopo alomba Jesu no kuamba ci, ''Ngeci watutundisha, otutwale muya mu mulaka o ngulu.'' ³² Jesu ayepo aambela ci, ''Muthze!''Madimona aopo atunda no kuthza kukengena mu mulaka o ngulu; Apo mewene, ethzo ngulu thzothzihe athzopo thzindandumuka kutunda pa mukinya kuthza mu likulu lwale ne pothzikafela mu meyu. ³³ Awo nanyungu ethzo ngulu awopo andandumuka nokuthza mu mbongi ne awopo akatongola yoihe, manene weci kwei yakwamahalile kwa akwelulme akalile no madimona. ³⁴ Apo mwene, mbongi thzothzihe awopo akakeya kunaliwana na Jesu. Ou amumonine, awopo amulomba ci atunde kukwo athze kwako.