¹ Mwa atula, ci namwe mwa atliuwa. ² Mukonda omu muatulela, moliyo mwa kuatuleliwa namwe, nomu mutepela angenjenu, moliyo akumitepela namwe. ³ Ine ei otanekela kahonyi aka kali mu lithziho lya mwapoe, unone wakwanga kumona shithsini eshi shili mu lithziho lyoe? ⁴ Ngepi nga oambela mwapoe ci, 'Tumone nikutundishe kahonyi mu lithziho lyoye,' unone shithsini koshili mu lithziho lyoe? ⁵ Owe mukalikamba! Otundishe tango shithsini mu lithziho lyoe, nehoni omone nawa ou otundisha kahonyi mu lithziho lya mwapoe. ⁶ Mwapa mbwa enu yokukena, kalo mwakonjela ngulu enu yoe yoi wawa. Pamweya kenge ailyatalyata no kumialukela kumilwisha. Ne amipilukele no ku mipayaula tu ipathsi-pathsi. ⁷ ''Mulombe, ne kenge mwakupiwa. Mufote, ne kenge mwakuwana. Mungongote, ne kenge mwakuyanjululeliwa. ⁸ Mukonda munu yomuhe oyu lomba, apiwa; munu yomuhe oyu fota, awana; no munu yomuhe oyu ngongota, kenge ayanjululeliwa. ⁹ Nji elye kukwenu, ngeci mwanenji a mulomba mukasha wo eshima, aye amupa liwe? ¹⁰ Nji alomba ethsi, aye amupa liyoka? ¹¹ Nehoni, ngeci amwe anu owamango mwalimuka kupa anenu enu yoiwa, ngepi honi kwa Tata wenu oyu li muwilu kakupa enu yoiwa kwawa amulomba? ¹² Uno honi, enu yoihe mufota ci anu amikwamene, namwe muwakwamene yo, Mukonda ou oliyo mulao no apolofia. ¹³ ''Mwingenene mushelo shoshoonye. Mukonda shelo shikulu kalo likun'wa lyakuyandumuka eli litwala kukuipaa, ne anu owangi moliyo omu aingena. ¹⁴ Unone shelo po shionye kalo ljkun'wa likalu eli litwala ku moyo, kalo apu o kuliwana. ¹⁵ ''Mumamele apolofita o n'anda, awa akeya kukwenu kwanavata eto yo mangu unone mukaci po mambungu shemwa. ¹⁶ Kenge mu walimukela ko ushuka wo. Kwali munu oku koyola olonji ku shitondo sho miondo nji feiga ku mushosho? ¹⁷ Mulikun'wa lyofoci, shoshihe shitondo shoshiwa shaema oshuka ouwa, unone shitondo shoshimango shaema oshuka oumango. ¹⁸ Shitondo shoshiwa kashitwesha kuima oshuka oumango, shianga shitondo shoshimango kashitwesha kuima oshuka ouwa. ¹⁹ Shitondo shoshihe shokukana kuima oshuka ouwa shatetiwa no kushikonjela mu mulilo. ²⁰ Uno honi, kenge muwalimuka ko oshuka wo. ²¹ Kali anu wahe awa amba kukwange ci, 'Fumu, Fumu,' awa akuingena mu ofumu o kuwilu, unone shime awa akwama ei ahima Tata oyu li kuwilu. ²² Anu owangi mu liyuwa elyo kenge akuniambela ci, 'Fumu, Fumu, kanatupolofita mulithzina lyoe, mulithzina lyoe shime twatundishangile mipepo thzothzimango no mulithzina lyoe twakwamangile ekomokisha?' ²³ Honi kenge nakuwaambela popakenu ci, 'Kanimilimuka! Mutunde kukwange, amwe mwakakukwama omango!' ²⁴ Uno honi, munu yomuhe oyu yuva maywi ange no kuamamela kenge akupitula eci mukwelume o munyanyami oyu naumbu njiyo thzenji pa liwe. ²⁵ Ne mvula ayepo loka, limina alyopo likeya, no mupepo awopo upepela pa njiyo, unone kathziu mukonda thzinaumbiwa pa liwe. ²⁶ Unone munu yomuhe okuyuva maywi ange no kukana kuamamela kenge akulipitula eci mukwelume oshitomba oyu naumbu njiyo thzenji pa litupatupa. ²⁷ Ne mvula ayepo loka, limina alyopo likeya, no lipepo alyopo lipepela pa njiyo, ne thzopo thziwa, no kuipa kuipelela.'' ²⁸ Jesu ou amanine kuamba aa maywi, mungi wa anu wakomokile efundisha yenji, ²⁹ mukonda shime awa fundishile eci munu oyuli no okolo, kali eci an'oli o.