¹ ''Mumamele ci katele mukwame enu yoiwa ci anu amimone, ou mukwama kengeyo inga kakumipa muyambo wenu Tata wenu oyu li muwilu. ² Honi ino okwathsa akwa likando, lelo washika tolombita eci eli anakwamanga akwa likamba mu masinagoge no mu makun'wa oshokulu, ci anu awashangale. Yoshemwa namiambela ci, anatambula kale muyambo wo. ³ Unone ino okwathsa akwa likando, lyoko lyoye lyo shimoho katele lilimuke ei likwama lyoko lyoye lyo shilyo ⁴ eci shipiwa shoe shikale sho kunthzimba. Nehoni Tata oye oyu mona yo kunthzimba akukuyambe. ⁵ ''Ino mulombela, lelo mwaninga eci eli anakwamanga akwa likamba, mukonda ahima kuimananga no kulombela mu masinagoge no mu mapeta o makun'wa ci anu awamone. Namiambela yoshemwa, anatambula kale muyambo wo. ⁶ Unone amwe, ino mulombela, muingene munjiyo. Muyanjele ku shelo no kulomba kwa Tata wenu, oyu li kunthzimba. Nehoni Tata wenu oyu namonanga yo kunthzimba kenge akumiyamba. ⁷ Ino mulombela, mwahukahukela enu yokupila okwathsi eci eli anakwamanga anu angana, mukonda awo anekela ci kenge ayuviwa ko kuamba maywi oangi. ⁸ Uno honi, mwaninga eci awo, mukonda Tata wenu alimuka enu yoihe mufota ko mushime kumulomba. ⁹ Nehoni mulombele kenge: 'Tata wetu oyu li muwilu, lithzina lyoe lyolikenu lilemekiwe. ¹⁰ Ofumu woe ukeye. Ei wahima ikwamahale pano pa kaye eci eli ikwamahala muwilu. ¹¹ Otupe lelo eshima yetu yo maiwa oahe. ¹² Otutetele ku milandu thzetu, eci eli natwe tunatetelanga ku milandu thzawa anatuipishela. ¹³ Lelo watutwala muieleka, unone otuamwene koyu omumango. Mukonda ofumu po woye no okolo no kutethzima kokukna kupwa. Ameni. ¹⁴ Mukonda ino mutetela milandu thzawa anamiipishela, Tata wenu oyu li muwilu namwe kenge amitetela milandu thzenu. ¹⁵ Unone ngeci kamutetela milandu thzawa anamiipishela, no Tata wenu naye kakumitetela milandu thzenu. ¹⁶ ''Ino muliyumena yo kulya, mwamonahala ku njonjolokisha ehanga yenu eci eli anakwamanga akwa likamba, mukonnda aliipisha ehanga ci anu awamone ci aliyumena yo kulya. Namitongwela yoshemwa, anatambula kale muyambo wo. ¹⁷ Unone amwe, ou muliyumena yo kulya, muliweshe maathzi kulupala no kuhupa shihanga shenu ¹⁸ ci mwamonahala kwa anu ci mwaliyumena yo kulya, unone shime kwa Tata wenu oyuli kunthzimba; ne Tata wenu oyu mona yo kunthzimba Kenge akumiyamba. ¹⁹ Mwaliungumekela lufumo pano pa kaye, pano pali menje no n'alawe ei iipisha, apa atwesha kuingena ethzi no kuithza. ²⁰ Unone , muliungumekele lufumo kuwilu, kokupila menje no n'alawe yokiipisha, no kupila ethzi okuingena no kuithza. ²¹ Mukonda okukuli lufumo lwenu, no mucima wenu koliyo uli ²² Lithziho po lambi thzo elama. Uno honi, ngeci po lithziho lyoe lyamona nawa, elama yoihe kenge ikala no mwethzi. ²³ Unone ngeci lithziho lyoe kalimono nawa, elama yoe yoihe kenge ikala mu milema. Uno honi, ngeci mwethzi uli kukoye po milema, thzikulu ngepi ethzo milema! ²⁴ Kwithsa munu yofoci twesha kukwamena a n'athsile eli, mukonda kenge athzimbapo yofoci noku hima yumweya, nji shime ou apa lilema yofoci ne ashomolole yumweya. Kotwesha kukwamena Nyambi no lufumo. ²⁵ Uno honi namitongwela ci, mwavilaela yo moyo wenu, nei mwakulya nji ei mwakun'wa; shianga kuvilaela yo elama yenu, ci ine mwakuvata. Mukonda moyo ne nga kulishoka no elya? Nji elama ne nga kulishoka no evata? ²⁶ Mumone enyunyi yo muwilu. Kaikunu nji kuyanga nji kulonga muishete, unone Tata wenu o muwilu aishukelela. Amwepo kali muli no okwathsi kuipita? ²⁷ Elye kukwenu oyu twesha kulepisha shikati shenji sho kuyoya ko kuvilaela? ²⁸ Ine muvilaelela yo kuvata? Muanekele mayangayanga o mumulundu. Ngepi anakulanga. Kakwama, nji kupoha wanda. ²⁹ Unone namiamela ci, shianga Solomoni mu kutethzima kwenji kokuhe kavatile eci ao. ³⁰ Ngeci po Nyambi avateka muhonyi o mumulundu, ou ukalako lelo peunja wakonjeliwa mulilumbu, kakumivateka nene, amwe akakulitawa kokuonye? ³¹ Nehoni mwavilaela no kuamba ci, 'Ine twakulya?' Nji 'Ine twakunwa?' Nji 'Evata mwine twakuvata?' ³² Mukonda anu angana nawo afota ei enu, ne Tata wenu oyu li muwilu alimuka ci mwaifota. ³³ Unone mufote tango ofumu wenji no kukena kwenji, ne yoihe ei enu kenge mwakuipiwa. ³⁴ Nehoni, mwavilaela yo peunja, mukonda lyo peunja kenge lilimonena yalyo. Liyuwa no liyuwa linakwana no omango walyo.