¹ Jesu apa amonine ungi wa anu, ayepo kanduka pa mukinya. Ou akalile pashi, afundishiwi enji awopo akeya kukwenji. ² Ayepo yahamisha kanwa kenji no kuwafundisha, kuamba ci, ³ ''Ali no fiyauthzi ehutu mu mupepo, mukonda ofumu o kuwilu po wo. ⁴ Ali no fiyauthzi awa a lila, mukonda kenge akuhengahengiwa. ⁵ Ali no fiyauthzi awa alihenga, mukonda kenge akushwana kano kaye. ⁶ Ali no fiyauthzi awa afa njala no linotwa penu yoiwa, mukonda kenge a kuikuta. ⁷ Ali no fiyauthzi awa ali no shihemo, mukonda nawo kenge a kuhimiwa. ⁸ Ali no fiyauthzi awa ali no micima thzothzikenu, mukonda kenge akumona Nyambi. ⁹ Ali no fiyauthzi awa aleta kuliyala, mukonda kenge akuishiwa ana Nyambi. ¹⁰ Ali no fiyauthzi awa anamono likando pa kukwama yoiwa, mukonda ofumu o kuwilu po wo. ¹¹ ''Muli no fiyauthzi anu ou amituka no kuminyandisha no kumilundela enu yoimango yo n'anda mulithzina lyange. ¹² Munyanyuke kalo muloele, mukonda muyambo wenu muwilu po ukulu. Mukonda omo moliyo anu anyandishelile apolofita awa atangile kuyoya kukwenu. ¹³ ''Yamwe mungwa okaye. Uno honi mungwa apa uhamuka, ngepi nga ukwamiwa eci utowale kalo? Kawa kukwathsa shimweya shime kuumwaela pola apa aulyatalyatela anu no maulu. ¹⁴ Yamwe mwethzi okaye. Mbongi ethzi thzina umbiwa pa mukinya kathzitawa kuholekiwa. ¹⁵ Kwithsa munu o kuyuumisha lambi no kuthzithsikela mu katanda, unone athzipaka peulu, ci thzimonishe munu yomuhe oyu li mu njiyo. ¹⁶ Mwethzi wenu umonishe anu wahe ci amone ekwama yenu yoiwa no kushangala Tata wenu oyu li muwilu. ¹⁷ ''Mwa anekela ci ninakeya kunepisha mulao nji shipolofita. kanikeyelile kunepisha mulao, unone kunayalishelela. ¹⁸ Mukonda namiambela yo shemwa ci shime oumba lipwa liwilu no kaye, kwithsa ka mulao ka kutundishiwako, shime enu yoihe ko inaloo. ¹⁹ Uno honi yomuhe oyu leya kofoci ko milao thzoshoonye no kufundisha aenjenji kukwama kengeyo kenge akuishiwa omuonye mu ofumu o kuwilu. Unone yomuhe thzimamela no kufundisha amweya kenge akuishiwa o mukulu mu ofumu o kuwilu. ²⁰ Mukonda namiambela ci shime kuluka kwenu ou kupitelela kuluka kowa an'oli no Afalisi, kwithsa omu mwa kuingenena mu ofumu o kuwilu. ²¹ ''Namuyuvu ci shime yambiwile kukwo ku shikati sho kukale, 'Lelo wapaa,' ne, 'Munu yomuhe paa kenge akukala mu katulo thzoshokulu.' ²² Unone namiambela ci munu yomuhe okuanjipela mwapenji oli mu katulo thzoshokulu; kalo yomuhe oyu ambela mwapenji ci, 'Owe munu okupila okwathsi!' kenge aku atuliwa ko kuta; no munu yomuhe oyu ambela mwapenji ci, 'Owe shitomba!' kenge akupya mulilo o lihele. ²³ Uno honi ngeci po wapa shipiwa shoe kukatala mbeci ovuluke ci mwapoe onakuanjipela, ²⁴ oshiye shipiwa shoe pa katala, no kuthza. Tango mukaliyuve na mwapoe, mbeci okape shipiwa shoe. ²⁵ Muliyuve noyu onepishela wanguwangu komuli mulikun'wa lyo kuthza ku kuta, ngeci ko kwama kengeyo kenge akupaka mu moko a muatuli, ne muatuli akupake mu moko a kapaso, ne aye akupake mukamenga. ²⁶ Yoshemwa nakuambela ci, kowa kupuna shime ou wakumana kukula mali o mamaneneno ku mulandu woe. ²⁷ Munayuvu ci shime kwa ambiwile ci, 'Lelo walemeka.' ²⁸ Unone namiambela ci munu yomuhe o kutaneka mbuyama ko kumukumbwela ona mulemeka kale mu mucima wenji. ²⁹ Ngeci lithziho lyoye lyo kushilyo po likukun'ukisha, olitundishemo no kulikonja. Mukonda naho ci shilama shimweya shife kupita ci elama yoihe ikonjeliwe mu lihele. ³⁰ Ngeci lyoko lyoe lyo shilyo lya kukun'ukisha, olitete no kulikonjela kokule. Mukonda naho ci shilama shimweya shife kupita ci elama yoihe ikonjeliwe mu lihele. ³¹ Shime kwa ambiwileci kalo, 'Munu yomuhe oyu kana munu wenji, amupe lin'olo lyo kumukana.' ³² Unone namiambela ci munu yomuhe okukana munu wenji, ngeci kali ko luthziho, ona mukwama lihule. Munu yomuhe muyeka kunakaniwa onalemeka. ³³ ''Kalo, mwayuvile ci shime kwa ambeliwile akwa thsan'ulu ci, 'Katele muethze ko kulianga yo n'anda, unone oliange kwa Fumu.' ³⁴ Unone namiambela ci, ''Mwaethza shianga kamanaana, ko liwilu, mukonda woliyo wikalo wa Nyambi; ³⁵ shianga ko kaye, mukonda omalyatelo o maulu enji; shianga ko Jelusalema, mukonda thzoliyo mbongi thza Fumu shokulu. ³⁶ Lelo waliethza shianga ko mutwi woe, mukonda kotwesha kupilula lihuki lyofoci okenu nji wilu. ³⁷ Unone oambe pohuma ci 'Ee, ee,' nji 'Lyombo, lyombo.' eshi opakako shatunda kwa mumango. ³⁸ Mwayuvile ci shime kwa ambiwile ci, 'Lithziho ko lithziho, no lieo ko lieo.' ³⁹ Unone namiambela ci, mwakanisha oyu mikwama omango. Ambene, munu ou amimbandula kulitama lyo shilyo, mumupilukishele no ku litama lyo shimoho nalyo. ⁴⁰ Ngeci po munu ayepo kutwala ku kuta kukuthzekishela hembe woe, omupelele no canthzi woe. ⁴¹ Yomuhe oyu kuootela ci omushindekethze litambo lyofoci, omutwale matambo eli. ⁴² Mupe wahe awa amilomba, kalo mwahusha mokomoko awa afota kumikolotela. ⁴³ ''Mwayuvile ci shime kwa ambiwile ci, 'Muhime awa mwatunga no muthzimbe akwethzimbo yenu.' ⁴⁴ Unone namiambela ci, muhime akwethzimbo yenu noku lombelela awa aminyandisha, mu fiyaule awa amikuta mukwame nawa awa anamithzimbi, ⁴⁵ ci mukale ana tata wenu o muwilu. Mukonda aye avishelanga liyuwa lyenji owa mango nawa oawa, kalo alokishelanga mvula wenji kowa oawa nowa oawamango. ⁴⁶ Mukonda ngeci po muhime awa amihima, muyambo mwine muwana? Kali nakakutelisha lyanakwamanga nawo? ⁴⁷ Ngeci owepo vumenena apoe pohuma, wapita ngepi amweya? Kali anu angana nawo lyanakwamanga? ⁴⁸ Uno honi mukale uwawa, eci Tata wenu omuwilu eli ali omu wawa.