¹ Nehoni Jesu po twaliwa ko mupepo mumbulwa kukutu kuka elekiwa kwa Diavulosi. ² Ou amanine kuliyumena ilya mu mayuwa makumi ane no mashiku makumi ane, kuma afile njala. ³ Mukakueleka po keya nokuna muambela ci, ''Ngeci po yowe mwana Nyambi, otumene aa mawe ci apiluke eshima.'' ⁴ Unone Jesu po tawa no kumuambela ci, ''Kuna n'oliwa, 'Munu ka kuyoya no ishima pohuma, unone ko liywi lyolihe litundelela mukan'wa ka Nyambi.''' ⁵ Nehoni Diavulosi ayepo mutwala mu mbongi thzothzikenu no kukamupaka peulu thzo Tempele, ⁶ no kumuambela ci, ''Ngeci po yowe mwana Nyambi, oliwishele pashi, mukonda kunan'oliwa, 'Kenge atumena mangeloi enji kuna kunyunga,' kalo, kenge akuyelula mu moko oo, ci liulu lyoye lelo lya lingungula pa liwe.''' ⁷ Jesu po muambela, ''Kalo kunan'oliwa, 'Wa eleka Fumu Nyambi woe.''' ⁸ Kalo, Diavulosi ayepo mutwala pa mukinya oule no kumumonisha mivuthso thzokano kaye thzothzihe no kutethzima kwathzo. ⁹ Ayepo muambela ci, ''Yoihe ei kenge niikupa, ngeci onikinyamene ku manwi no kuni lombela.'' ¹⁰ Ne Jesu ayepo mu aambela ci, ''Otunde pa, Satani! Mukonda kunan'oliwa ci, 'Olombele Fumu Nyambi oye, kalo okwamene aye pohuma.''' ¹¹ Nehoni Diavulosi ayepo mushiya, popo mwene, mangeloi aopo akeya kuna mukwamena. ¹² Honi Jesu apa ayuvile ci Joani onaangiwa, ayepo thza ku Galilea. ¹³ Ayepo tunda mu Nathzareta no kuthza kukakala mu Kapenauma, lyumbo lyakalile pa n'aalo thzo lilkulu lwale lyo Galilea mu litunga lya Zavuloni no Nafetali. ¹⁴ Ei kuma yakwamahalile kuyalishelela ei ya ambiwile ko Isaya mupolofita, ¹⁵ ''Litunga lya Zavuloni no litunga lya Nafetali, kutamba likulu lwale, musambwa lyo Jodani, Galilea wa anu angana! ¹⁶ Anu nakala mu milema ana mono mwethzi oshokulu, nawa nakala mu litunga no munvule o kufa, peulu thzo mwethzi unawavela.'' ¹⁷ Kutunda apo pa shikati Jesu po tateka kukutathza no kuamba ci, ''Muhumbe, mukonda ofumu o kuwilu uneya popepi.'' ¹⁸ Apa andile ku mambali o liwate lyo Galilea, ayepo mona akwelume eli munu naminenji, Simoni oyu ishiwa Pitolosi, no Andreasi minenji, kwa langeka shiothzi mu likulu lwale, mukonda neli aka kupaa ethsi. ¹⁹ Jesu po amba kukwo, ''Mukeye, munishupwele, honi kenge nimikwama aka kulangeka anu.'' ²⁰ Popo mwene awopo ashiya iothzi no kumushupwela. ²¹ Jesu ou atundile apo kuthza ayepo mona akwelume eli munu naminenji kalo, Jakobo mwana Zevedea, no Joani minenji. Kuma akalile muwato no tata wo Zevedea kwa honga iothzi yo. Ayepo waisha, ²² kalo popo mwene awopo ashiya wato no tata wo no kumushupwela. ²³ Jesu ayepo thza mu Galilea momuhe, kufundisha mu masinagoge o, kukutathza evangeli thzo muvuso, no kupolisha mawethzi o kulishiya-shiya kwa anu. ²⁴ Itongola yenji ayopo ithza kapupo mu Siria momuhe, ne anu awopo aleta kukwenji anu awa akolile mawethzi o kulishita-shiya no kuyuva kukola, nawa nakala no mipepo thzo thzimango, nawa anawanga, na akaku kukutela elama. Jesu ayepo wapolisha. ²⁵ Mungi wa anu awopo amushupwela kutunda ku Galilea, ku Dekapolisi, ku Jelusalema, noku Judea, nokutunda musambwa lyo Jodani.